თალაკვაძე: აგვისტოს ომზე სტრასბურგში წარსადგენი მტკიცებულებები ჩვენმა ხელისუფლებამ მოიძია

არჩილ თალაკვაძე ამბობს, რომ 2008 წლის ომზე ყველა მტკიცებულების მოძიება, დოკუმენტირება და სტრასბურგის სასამართლოში წარდგენა ქართული ოცნების ხელისუფლების მიერ მოხდა. და მიუხედავად ამისა, როგორც პარლამენტის თავმჯდომარე ამტკიცებს, მაინც არ უკადრებიათ ეთქვათ, რომ ეს [სტრასბუგრის სასამართლოს გადაწყვეტილება] მხოლოდ პარტიული გამარჯვებაა.

თალაკვაძე მიხეილ სააკაშვილის განცხადებას გამოეხმაურა – ექსპრეზიდენტმა თქვა, რომ 21 იანვარს სტრასბურგის ადამიანის უფლებათა სასამართლოს გადაწყვეტილება აგვისტოს ომის შესახებ არის “მისი მთავრობის მეორე გამარჯვება მისი გუნდის წასვლის შემდეგ”.

„700-ზე მეტი მტკიცებულება ჩვენ მოვიძიეთ და სტრასბურგში წარვადგინეთ ჩვენი ხელისუფლების პერიოდში და მინდა, შევახსენო საზოგადოებას, რომ 2013 წლამდე, მანამ, სანამ თეა წულუკიანმა, იუსტიციის სამინისტრომ და ყველა სამსახურმა არ დაიწყო ამაზე მუშაობა, ელემენტარულად, ამ საერთაშორისო სამართლებრივ დავაზე ჩვენ არ გვქონდა წარდგენილი ისეთი მნიშვნელოვანი მტკიცებულებები, როგორიც არის, მაგალითად, ბალისტიკური რაკეტის ფრაგმენტები, არ გვქონდა წარდგენილი სეისმური სადგურების ჩანაწერები, არ გვქონდა წარდგენილი რადარების მონაცემები, არ გვქონდა წარდგენილი ვიდეო-მტკიცებულებები, როდესაც აწამებდნენ და არაადამიანურად ეპყრობოდნენ ტყვეებს. არ გვქონდა წარდგენილი სატელეფონო ჩანაწერები და ის დოკუმენტები, რომელიც საქართველოს სახელმწიფომ გამოსცა ომის პერიოდში. შესაბამისად, ამ ყველაფრის დოკუმენტირება, ამ ყველაფრის მოძიება და წარდგენა მოხდა ჩვენი ხელისუფლების მიერ. მიუხედავად ამისა, ჩვენ არ გვიკადრია და არ გვითქვამს, რომ ეს არის ჩვენი პარტიული გამარჯვება – ეს არის საქართველოს გამარჯვება”. – თქვა არჩილ თალაკვაძემ.

2008 წლის აგვისტოს ომზე სტრასბურგის ადამიანის უფლებათა სასამართლომ გადაწყვეტილება 2020 წლის 21 იანვარს გამოაცხადა. სასამართლოს დიდმა პალატამ თავი შეიკავა, შეეფასებინა 8-12 აგვისტოს განვითარებული მოვლენები იმ დასაბუთებით, რომ გაუჭირდა იურისდიქციის დადგენა. 12 აგვისტოდან, ცეცხლის შეწყვეტის ხელშეკრულების ხელმოწერიდან განვითარებულ მოვლენებზე კი განაცხადა, რომ რუსეთს ეკისრება პასუხისმგებლობა სიცოცხლის, საკუთრების, პირადი და ოჯახური ცხოვრების, თავისუფლად გადაადგილების უფლების დარღვევაზე. სასამართლომ ასევე განაცხადა, რომ რუსეთმა ასევე დაარღვია წამების, არაადამიანური, დამამცირებელი მოპყრობის აკრძალვის მუხლებს.

რუსეთის წინააღმდეგ სტრასბურგის სასამართლოს საქართველომ 2008 წლის 11 აგვისტოს მიმართა.

2021 წლის 21 აგვისტოს გადაწყვეტილებით, სასამართლომ დაადასტურა, რომ 2008 წლის 12 აგვისტოს შემდეგ, რუსეთს აქვს ეფექტური კონტროლი ტერიტორიაზე და შესაბამისად, ყველა დარღვევა რაც მოხდა მას შეერაცხება.

სასამართლომ დაადგინა, რომ რუსეთმა “ეფექტური კონტროლი” განახორციელა ე.წ. სამხრეთ ოსეთსა და აფხაზეთის რეგიონებზე, “ბუფერულ ზონაზე” 2008 წლის 12 აგვისტოდან 2008 წლის 10 ოქტომბრამდე პერიოდში, რაც არის რუსეთის ჯარების ოფიციალურად გაყვანის თარიღი. ამ პერიოდის შემდეგ, რუსეთის წარმომადგენლობა იქ და აფხაზეთისა და ე.წ. სამხრეთ ოსეთის თვითგამოცხადებული ხელისუფლებების დამოკიდებულება რუსეთზე, მიუთითებს, რომ მისი “ეფექტური კონტროლი” ამ ორ რეგიონზე კვლავ გრძელდება.

გააზიარეთ და მოიწონეთ სტატია:
Pin Share