“ვიდრე საქართველო არ დისტანცირდება რუსეთიდან, ე.წ. აფხაზეთის მოსახლეობას ვერაფერს შევთავაზებთ“ – პაატა ზაქარეიშვილი

უნდა შევქმნათ ახალი რეალობა, სადაც შესაძლებელი იქნება ამ საკითხის დაძვრა. მსოფლიოში ვითარება იცვლება, ჩვენ კი, სამწუხაროდ, არაფერს ვაკეთებთ. ვიდრე სახლს ააშენებ, მანამ ადგილი უნდა შემოღობო. მშენებლები ასე იქცევიან.ახლა რეალობა არის ის, რომ რუსეთი კავკასიაში სუსტდება. ჩვენ უნდა ვილაპარაკოთ რუსეთის ჯარების გაყვანის შესახებ. მას ხომ 2008 წლის აგვისტოში ჯარების გაყვანაზე ხელი აქვს მოწერილი და ამ პირობას არ ასრულებს. უკრაინის კონტექსტიდან გამომდინარე, ეს თემა აქტუალური იქნება. შემდეგ, როცა დადგება რუსეთის ეკონომიკური სანქციების მოხსნის დრო, იქ, შესაძლოა, ჩაიწეროს უკრაინასა და მოლდოვიდან რუსული ჯარების გასვლის თემები, მაგრამ ჩვენი საკითხი კი არ ჩაიდოს, იმიტომ რომ ამაზე ხმას არ ვიღებთ.

ამასთან, ჩვენ ღიად უნდა ვთქვათ, რომ ჩვენი ტერიტორიიდან რუსული ჯარებს გაყვანის შემდეგ, აქ უნდა გაძლიერდეს ევროკავშირის სადამკვირვებლო მისია, რომელიც უნდა გადაიქცეს EU-ს სამშვიდობო ძალებად.

ასევე საქართველომ ხელი უნდა მოაწეროს თურქეთთან უსაფრთხოების ხელშეკრულებას, როგორც ეს აზერბაიჯანმა გააკეთა. ანუ რუსეთმა უნდა იგრძნოს, რომ საქართველოს მარტივად ვერ წამოატყამს ხელს. თურქეთი ნატო-ს წევრი სახელმწიფოა, ჩვენ ამ ალიანსისკენ მისწრაფვით და ის ჩვენი უსაფრთხოების გარანტი უნდა იყოს. საჭიროა, კავკასიაში შეიქმნას თურქეთი-აზერბაიჯანი-საქართველოს ალიანსი, რათა რუსეთი მიხვდეს, რომ აქ მისი ადგილი აღარ არის.

აი, სწორედ ამის შემდეგ შეიძლება შევთავაზოთ რამე აფხაზეთს. ეს უკვე ახალი რეალობა იქნება. ჩვენ შეგვეძლება მათ ვუთხრათ, რომ აქ რუსები აღარ არიან, ჩვენ რევანშს არ ვაპირებთ და ამის გარანტი ევროკავშირის სამშვიდობო ძალებია. ამას დაემატება თურქეთის მიერ შავ ზღვაზე უსაფრთხოების ზომების გაძლიერება. ამ შემთხვევაში, ჩენ შეგვიძლია შევთავაზოთ დალაპარაკება აფხაზეთს მხოლოდ მშვიდობიანი ფორმებით.

ვიდრე ჩვენ რუსეთს ვეფერებით და მის გარეშე რიტუალურად ვცეკვავთ, აფხაზეთს ვერაფერს შევთავაზებთ. ისინი გვეტყვიან, რომ თქვენი პოლიტიკა რუსულია და ეს ჩვენ არ გვინდა, რამე სხვა შემოგვთავაზეთ.

ამდენად, ვიდრე საქართველო არ დისტანცირდება რუსეთიდან და არ დააფიქსირებს მკაფიოდ მის მიუღებლობას, აფხაზეთის საკითხში წინსვლა არ იქნება. ე.წ. აფხაზეთის მოსახლეობას ცუდი რუსეთი ურჩევნია ცუდ საქართველოს, ამიტომ ისინი რომ ჩვენკენ შემოტრიალდნენ, საქართველო უნდა იყოს რუსეთზე უკეთესი.