ბუბა კიკაბიძის წილები კუს ტბაზე და ელისო ბოლქვაძის უძრავი ქონება

პარლამენტის მუსიკოსმა წევრებმა – ელისო ბოლქვაძემ და ვახტანგ (ბუბა) კიკაბიძემ დანარჩენი კოლეგების მსგავსად ქონებრივი დეკლარაცია შეავსეს.

დეკლარაციებით ირკვევა, რომ ისინი ბათუმში, ხიმშიაშვილის ქუჩაზე მეზობლები არიან.

ბუბა კიკაბიძის დეკლარაცია

მართალია „ნაციონალური მოძრაობა – გაერთიანებული ოპოზიციის“ სიის პირველი ნომერი, ბუბა კიკაბიძე ბოიკოტის რეჟიმში იმყოფება, თუმცა დეპუტატის სავალდებული დეკლარაცია მაინც შეავსო.

დოკუმენტით ირკვევა, რომ ბუბა კიკაბიძის სახელზე ფიქსირდება 45 კვ.მ ფართობის ბინა ბათუმში, რომელიც 2018 წელს საჩუქრად მიიღო. ვინ აჩუქა მას ეს უძრავი ქონება, დეკლარაციაში მითითებული არ არის, ისევე როგორც Lexus LX570-ის მარკის ავტომობილი, რომელიც კიკაბიძეს 2017 წელს აჩუქეს.

მომღერალის სახელზე ირიცხება 2012 წელს შეძენილი 10 086 კვ.მ-ის მიწის ნაკვეთი წყალტუბოს რაიონში, სოფელ გეგუთში, რომელიც მან 12 000 დოლარად შეიძინა.

დეკლარაციის შევსების მომენტში მომღერალს „საქართველოს ბანკში“ გახსნილ ანგარიშზე 2992,14 დოლარი და 4166,28 ლარი უფიქსირდება. ნაღდი ფულის სახით კი 11 000 ლარი და 5 000 დოლარი აქვს.

ბუბა კიკაბიძე წილებს ფლობს სხვადასხვა კომპანიებშიც. დეკლრაციით ირკვევა, რომ ის შპს „კუს ტბა კალას“7-პროცენტიანი წილის მფლობელია.

გარდა ამისა, ბუბა კიკაბიძე შპს „კუს ტბა2“-ში 44-პროცენტიან წილს ფლობს, ხოლო შპს „კუს ტბა პალასში“ 22-პროცენტს.

მომღერალი-დეპუტატი კუს ტბასთან დაკავშირებული ბიზნესების გარდა, შპს „ფლაგ არტისაც“ ფლობს.

ელისო ბოლქვაძის დეკლარაცია

მმართველი პარტიის კვოტით პარლამენტის დეპუტატი, პიანისტი ელისო ბოლქვაძე ფლობს 1811 კვ.მ მიწის ნაკვეთს ჩოხატაურის რაიონის სოფელ გუთურში და 120 კვ.მ ბინას თბილისში. დეკლარაციით ირკვევა, რომ ორივე ეს ქონება პიანისტმა მემკვიდრეობით მიიღო.

თავად ელისო ბოლქვაძის შენაძენი ბათუმში, ხიმშიაშვილის ქუჩაზე მდებარე 65 კვ.მ ბინაა, რომელიც მან 2012 წელს 65 000 დოლარად იყიდა.

რაც შეეხება მუსიკოსის საბანკო ანგარიშებს, დეკლარაციის შევსების მომენტში ელისო ბოლქვაძეს „ლიბერთი ბანკში“ გახსნილ ანგარიშზე 18 477,75 ლარი უფიქსირდება. დეპუტატს CREDIT AGRICOLE-ში მიმდინარე ანგარიშზე დეკლარაციის შევსების მომენტში 123,99 ევრო, ხოლო “ქართუ ბანკის” მიმდინარე ანგარიშზე 8,64 ევრო აქვს.

მუსიკოსი დეპუტატი თავისივე სახელობის საქველმოქმედო ფონდში დირექტორის პოზიციაზე მუშაობს. ააიპ „ელისო ბოლქვაძის საქველმოქმედო ფონდი – ლირა“-ს ხელმძღვანელობაში ელისო ბოლქვაძემ 2020 წლის განმვალობაში ხელფასის სახით 27 562,76 ლარი აიღო.

გააზიარეთ და მოიწონეთ სტატია: