“ევროპა ისევ არაფრის აზრზე არაა, სამწუხაროდ”

ტელეკომპანია “ფორმულას” გადაცემა “კვირაში ერთხელ” წამყვანი მიშა მშვილდაძე სოციალურ ქსელში ნიკა გვარამიას პოსტს ეხმაურება და ბრიუსელში გამართული შეხვედრის შემდეგ ევროკავშირის ასოცირების საბჭოს განცხადებას აფასებს.

“მე უფრო მარტივად ვიტყოდი – ევროპა ისევ არაფრის აზრზე არაა, სამწუხაროდ, და ამავდროულად საბედნიეროდაც, იმიტომ, რომ სულ მასეა ეგა და მივეჩვიეთ ამასობაში მთელი მსოფლიოც” – წერს მიშა მშვილდაძე ფეისბუქის საკუთარ გვერდზე.
აქვე გთავაზობთ ტელეკომპანია “მთავარის” დამფუძნებლის ნიკა გვარამიას შეფასებას, რომელსაც მიშა მშვილდაძე გამოეხმაურა: “არ შეიძლება წაყრუება და ენისმოჩლექა, როცა საქმე შენი ქვეყნისთვის გრანდიოზულ და დამღუპველ შეცდომას ეხება. 

ბატონი ბორელის მიერ მოხმობილ ეუთოს შემაჯამებელ დოკუმენტში, 2020 წლის 31 ოქტომბრის არჩევნები არაა შეფასებული, როგორც თავისუფალი და სამართლიანი.
ამის ნაცვლად გვაქვს მხოლოდ შემდეგი ჩანაწერი: “არჩევნები იყო ძირითადად კონკურენტული, ფუნდამენტური უფლებები და თავისუფლებები, ძირითადად, დაცული.” (the elections were competitive and, overall, fundamental freedoms were respected).
ამ ჩანაწერის აკუმულირებით მივიღებთ free (თავისუფალ) სტანდარტს, მაგრამ ვერანაირად fair (სამართლიან) სტანდარტს. მსგავსი ტექსტი, რუსეთის არჩევნების შეფასებებშიც გვინახავს, მეტიც, უკეთესი ტექსტებიც.
free and fair არის ფორმულა და ეს ფორმულა იწერება სწორედ დოკუმენტში, თუ რა თქმა უნდა, დაკმაყოფილებულია. და როცა ეს ფორმულა არ წერია, ა. ესე იგი დაკმაყოფილებული არაა, და ბ. მისი ციტირება მცდარი და არაკორექტულია, სულ მცირე.
ps თუ მე ვცდები და რაიმე მეორე ეუთო არსებობს ან ეუთოს მეორე დასკვნა, სიამოვნებით ვიხილავდი”.
შეგახსენებთ, რომ ევროკავშირის ასოცირების საბჭოს წარმომადგენლების განცხადებით, 2020 წლის 31 ოქტომბრისა და 21 ნოემბრის არჩევნები იყო კონკურენტული და დაცული იყო ფუნდამენტური თავისუფლებები.

გააზიარეთ და მოიწონეთ სტატია: