თვითიზოლაციაში მყოფი 9 000 მოქალაქიდან, ცესკოს გადასატანი ყუთის მოთხოვნით 1 500-ზე მეტმა ადამიანმა მიმართა

ცესკოს პრეს-სპიკერის, ანა მიქელაძის განმარტებით, ამ დროისთვის გადასატანი საარჩევნო ყუთის მოთხოვნით ცესკო-ს 1 500-ზე მეტმა თვითიზოლაციაში მყოფმა ამომრჩეველმა მიმართა. ამის შესახებ მან დღეს გამართულ ბრიფინგზე განაცხადა.

მისივე თქმით, 25 ოქტომბრის მდგომარეობით დაახლოებით 9 000-მდე პირია რეგისტრირებული ბაზაში, რომლებიც არიან საარჩევნო ასაკის და კორონავირუსის გამო, კენჭისყრის დღისთვის თვითიზოლაციაში იქნებიან.

ცნობისთვის, გადასატან ყუთზე მოთხოვნა დღეს 10 საათზე იწურება. აქედან გამომდინარე,  ცესკო კიდევ ერთხელ მიმართავს თვითიზოლაციაში მყოფ ამომრჩევლებს, დარეკონ ცესკოს სატელეფონო-საინფორმაციო ცენტრში და მოითხოვონ გადასატანი საარჩევნო ყუთი.

საქართველოში 2020 წლის საპარლამენტო არჩევნები 31 ოქტომბერს გაიმართება.

გააზიარეთ და მოიწონეთ სტატია: