“ნაციონალური მოძრაობა” ოზურგეთის მერთან რაიმე სახის მოლაპარაკებების წარმოებას გამორიცხავს

“ნაციონალური მოძრაობა” ოზურგეთის მუნიციპალიტეტის მერთან რაიმე სახის მოლაპარაკებების წარმოებას კატეგორიულად გამორიცხავს
“ნაციონალური მოძრაობა” კატეგორიულად ემიჯნება “გურიის მოამბეს” მიერ გუშინ გავრცელებულ ინფორმაციას: “მიმდინარეობს თუ არა ოზურგეთის მერსა და “ნაციონალურ მოძრაობას” შორის მოლაპარაკებები”
“ჩვენი პარტიის წევრის მოქმედი მერის ოჯახში სტუმრობა ყველაფერს შეიძლება უკავშირდებოდეს, გარდა პოლიტიკისა და მოახლოებული არჩევნებისა. ნაციონალური მოძრაობა, წინა არჩევნებისგან განსხვავებით, ვერ და არ იქნება ოზურგეთის მოქმედი მერის ნებისმიერი ფორმით პარტნიორი და მოკავშირე ადგილობრივი თვითმმართველობის არჩევნებში, რადგან მყარად და არგუმენტირებულად მიგვაჩნია, რომ იგი კორუმპირებულია. იმიჯურად დაზიანებული მერობის კანდიდატი კი, ვფიქრობთ, არათუ ოპოზიციური პარტიისთვის უინტერესოა, არამედ მისი მშობლიური ქართული ოცნებისთვისაც კი ზედმეტი ტვირთია. ასე რომ, ჩვენ ვერავის დავუშლით ნათესავებში სტუმრობას,მაგრამ ამის პარტიასთან ასოცირებას არ დავუშვებთ.
ჩვენ ნამდვილად არ გვიხარია ის ფაქტი, რომ მოქმედი მერის მიმართ საზოგადოებაში დიდი იმედგაცრუებაა და საკმაოდ მძიმე შეფასებები კეთდება, მიგვაჩნია, რომ უკვე შემდგარ ფაქტში ჩვენი წილი პასუხისმგებლობაც დევს,თუმცა დღესაც ვფიქრობთ, რომ იმ მოცემულობაში ნაციონალურმა მოძრაობამ საზოგადოების შეკვეთა შეასრულა: საზოგადოებას კი ბეგლარ სიორიძის , როგორც ყოვლად მიუღებელი პერსონის, მოშორება უნდოდა.
თუმცა სხვა საქმეა რა მივიღეთ კოტე შარაშენისის არჩევით” – ნათქვამია “ნაციონალური მოძრაობის” ადგილობრივი ლიდერის, დავით მჟავანაძის განცხადებაში, რომელიც მან ფეისბუკის საკუტარ გვერდზე გაავრცელა.
გთავაზოვბთ ინფორმაციას, რომელიც “გურიის მოამბემ გუშინ გაავრცელა:

მიმდინარეობს თუ არა ოზურგეთის მერსა და “ნაციონალურ მოძრაობას” შორის მოლაპარაკებები

როგორც ჩვენი წყარო გვატყობინებს ამ დილით, ოზურგეთის მუნიციპალიტეტის მერს, კოტე შარაშენიძესა და “ნაციონალური მოძრაობას” შორის არაოფიციალური შეხვედრა შედგა.

წყაროს ინფორმაციით, შეხვედრა კოტე შარაშენიძის საცხოვრებელ სახლში, ქალაქ ოზურგეთში, 26 მაისის ქუჩაზე შედგა.

როგორც გვატყობინებენ, მერთან, ოზურგეთის საკრებულოს დეპუტატი, “ნაციონალური მოძრაობის” ერთ ერთი ლიდერი, მთავარი ოპოზიციური პარტიის კანდიდატი 2014 წლის ადგილობრივ არჩევნებში ოზურგეთის გამგებლობის პოსტზე, შალვა თავდიშვილი იმყოფებოდა.

თუ რა საკითხები განიხილეს მხარეებმა, ჩვენთვის უცნობია, შეხვედრაზე დამატებით ერთ პირი იმყოფებოდა, რომლის ამოცნობაც წყარომ ვერ შეძლო.

შეხვედრის დასრულებისას მერი “გზამშენო 18” – ის მფლობელმა, თემურ ჯახვამაც მოინახულა.

არაოფიციალური, გადაუმოწმებელი ინფორმაციით, ოზურგეთის მერისა და “ნაციონალური მოძრაობის” ერთ ერთი ლიდერის შეხვედრა დიდი ალბათობით მოახლოებულ ადგილობრივ არჩევნებს ეხებოდა.

ამ საკითხზე “გურიის მოამბე” ორთავე მხარეს დაუკავშირდება და მათ კომენტარებს მოგვიანებით შემოგთავაზებთ.

გააზიარეთ და მოიწონეთ სტატია: