ამერიკის ელჩის რეზიდენციაში “ქართულ ოცნებასა” და იმ ოპოზიციური პარტიების ლიდერებს შორის, რომლებმაც 31 ოქტომბრის არჩევნებში ზღვარი გადალახეს და პარლამენტში შესვლისთვის საჭირო ხმები მოიპოვეს, მეორე შეხვედრა გაიმართა. შეხვედრას ამერიკის ელჩთან ერთად ესწრებოდა ევროკავშირის ელჩიც. შეხვედრიდან გამოსული პოლიტიკოსების განცხადებები კონკრეტულ დეტალებს არ მოიცავდა, თუმცა დიალოგის გაგრძელების პერსპექტივების შესახებ წარმოდგენას ქმნის.
„კონკრეტული რაიმე ტიპის შეთანხმება დღეს არ შემდგარა, საუბარი იყო ისევ კონსტრუქციული, თუმცა ოპოზიციისა და ხელისუფლების პოზიციები ჯერჯერობით ისევ შორსაა… მთავარი საკითხი, რომელიც განიხილება, არის ხელახალი არჩევნები, ესაა ოპოზიციის პრინციპული პოზიციაა“, – თქვა “გირჩის” ლიდერმა ზურაბ ჯაფარიძემ ელჩის რეზიდენციიდან გამოსვლის შემდეგ ჟურნალისტებთან. ის, რომ ხელისუფლების და ოპოზიციის პოზიციები ერთმანეთისგან შორსაა, დაადასტურა არჩილ თალაკვაძის განცხადებამ, რომელიც მიიჩნევს, რომ საერთაშორისო პარტნიორების ჩართულობით ინიცირებული და მართული დიალოგის ფორმატი შეთანხმებამდე პარტიებს ვერ მიიყვანს და დიალოგის გაგრძელების პერსპექტივას ის პარლამენტში ხედავს.
„მოლაპარაკებები გრძელდება. მოგეხსენებათ, რომ საპარლამენტო არჩევნები ჩატარებულია. ჩვენ მივესალმებით დიალოგის ფორმატს და მაქსიმალურად ვცდილობთ დავაახლოვოთ პოზიციები, იმისთვის, რომ დემოკრატიამ და ჩვენი ქვეყნის პოლიტიკურმა სისტემამ განაგრძოს სტაბილურად ფუნქციონირება.
ჩვენ, რა თქმა უნდა, არ გვაქვს მოლოდინი, რომ ამ ფორმატში დიალოგი პოლიტიკურ პარტიებს შორის დასრულდება და ამოიწურება. ჩვენ მზად ვართ, რომ ეს დიალოგი განვაგრძოთ საქართველოს მე-10 მოწვევის პარლამენტში.
ვფიქრობ, რომ ახლა ჩვენი საზოგადოების და ქვეყნის ინტერესებში პოლიტიკური სტაბილურობაა, არის უფრო მეტი თანამშრომლობის შესაძლებლობის მოძებნა პოლიტიკურ პარტიებს შორის და ჩვენს მიერ ჩატარებული დემოკრატიული რეფორმები, რის მიხედვითაც ჩატარდა საპარლამენტო არჩევნები, ამის შესაძლებლობას აძლევს ნამდვილად ყველას. მოდით, გამოვიყენოთ ეს შესაძლებლობა”, – თქვა არჩილ თალაკვაძემ შეხვედრის დასრულების შემდეგ.
ევროპული საქართველოს ლიდერის, დავით ბაქრაძის თქმით, დიალოგი და პროცესი გაგრძელდება, თუმცა შედეგებზე საუბარი ჯერ ნაადრევია, რადგან მხარეთა პოზიციებს შორის ძალიან დიდი განსხვავებაა და მოლაპარაკების პროცესი გაართულა ცესკო-ში საჩივრების განხილვამაც 13 ნოემბერს. ბაქრაძემ დაადასტურა, რომ ხმების გადათვლის საკითხი არ განიხილება, ვინაიდან, მისი თქმით, ამის შესაძლებლობა დახურა ცესკოს ნაბიჯმა, როცა კომისიამ არცერთი საჩივარი დააკმაყოფილა.
“ამიტომ, დარჩა მოლაპარაკების მაგიდაზე ერთადერთი წინადადება. ეს არის ახალი არჩევნების ფორმა, ვადა, პაკეტი…” – ამბობს ბაქრაძე.
“ჯერჯერობით, პოზიციები ერთმანეთისგან არის დაშორებული, მხარეები განსხვავებულ პოზიციაზე დგანან, მაგრამ ჩვენ შევთანხმდით, რომ დიალოგი და პროცესი გაგრძელდება”. – თქვა დავით ბაქრაძე შეხვედრის დასრულების შემდეგ.
ჟურნალისტებთან კომენტარი გააკეთა “მოქალაქეების” ლიდერმა ალეკო ელისაშვილმაც. მისი თქმით, მოლაპარაკება გრძელდება და “საქმე პესიმისტურად არ არის”.
“კიდევ ერთხელ ვამბობ, რომ პესიმისტურად არ არის საქმე, მოლაპარაკება გაგრძელდება უახლოეს მომავალში, არა ვთქვათ, 1 კვირის მერე და 3 თვის მერე. ყველა გრძნობს და ხედავს, ელჩებიც, “ქართული ოცნებაც”, რომ ვითარება არის მძიმე და სასწრაფოდ არის გამოსავალი მოსაძებნი”.
მსგავსი სტატიები:
პედაგოგობიდან აშშ-ს პირველი ლედის სტატუსამდე – ვინ არის ჯილ ბაიდენი
რატომ გადაიფიქრა ივანიშვილმა ლანჩხუთის ჯანდაცვის ცენტრის რეაბილიტაცია, რომელიც დახურვის პირასაა
კანონზომიერია პარლამენტის გაკოტრება, უფუნქციობა- ხუხაშვილი NDI-ის კვლევებზე
მდინარაძე, ტურძელაძე, დაუშვილი – ვინ არის ინფიცირებული პარლამენტში
“საფრთხე იგრძნო ივანიშვილმა და დემონსტრაციულად ჩატოვა ნიკა მელია ციხეში”
შპს “ენკამ” მთავრობის განკარგულებით უძრავი ქონება 121 ლარად წყალტუბოში, ტყიბულსა და ცაგერშიც შეიძინა
თუ “ოცნებას” კიდევ 15 კაცი დატოვებს, ავტომატურად მივალთ რიგგარეშე არჩევნებამდე”
ყველაფერი მათთვის, ვისაც გავლენიანი მფარველები ჰყავს _ გომისმთის მოაგარაკების პრობლემები და გაქცეული გუბერნატორი