ორ კვირაში სკოლები დისტანციურ სწავლებაზე გადავლენ? – დირექტორები სამინისტროს გადაწყვეტილებას ელოდებიან

საქართველოში კორონავირუსის მეხუთე ტალღა იწყება, – ამის შესახებ დაავადებათა კონტროლის ეროვნული ცენტრის ხელმძღვანელმა ამირან გამყრელიძემ განაცხადა. 108 საჯარო სკოლა ეპიდვითარების გაუარესების გამო დისტანციურ სწავლებაზე გადავიდა. ასევე ონლაინ სწავლებაზეა ასეულობით კლასი სხვადასხვა სკოლიდან. მიუხედავად იმისა, რომ სკოლების ადმინისტრაციები რეგულაციებს ამკაცრებენ და ცდილობენ, საგანმანათლებლო დაწესებულებებში ვირუსის გავრცელება არ მოხდეს, ინფიცირებულთა რაოდენობა მაინც მზარდია.

დაავადებათა კონტროლის ეროვნული ცენტრის მონაცემებით, ინფიცირების დღიური მაჩვენებელი 10%-მდე ავიდა, რაც იმას ნიშნავს, რომ ქვეყანაში საგანგაშო მდგომარეობაა. განათლებისა და ჯანდაცვის სამინისტროს ხელმძღვანელები ერთხმად აღნიშნავდნენ, რომ მხოლოდ იმ ქალაქისა და სოფლის სკოლებში იქნებოდა დასწრებული სწავლება, სადაც ინფიცირებულთა დღიური მაჩვენებელი 4%-ს არ ასცდებოდა. დღესდღეობით კი ქვეყანაში ბევრად მძიმე ვითარებაა.

გარდა ზემოთ აღნიშნულისა, სანამ ახალი სასწავლო წელი დაიწყებოდა განათლებისა და მეცნიერების სამინისტროში ბევრჯერ განაცხადეს, რომ მხოლოდ ის სკოლები გააგრძელებდნენ დასწრებულ სწავლებას, სადაც პედაგოგთა მინიმუმ 80% იქნებოდა აცრილი. მასწავლებლების 52%-ია ორჯერადად აცრილია, რაც იმას ნიშნავს, რომ 29 000-მდე პედაგოგი ჯერ კიდევ აუცრელია. ეს პირობაც დაირღვა. გამოდის, რომ განათლებისა და მეცნიერების სამინისტრო თავადვე არ სცემს პატივს თავისივე გადაწყვეტილებებს, შესაბამისად, არ უნდა გაგვიკვირდეს თუ უწყების მოწოდებებს პედაგოგები გულგრილად ხვდებიან და არ ითვალისწინებენ.

სიტუაცია ყოველდღიურად უკონტროლო ხდება, ინფიცირების დღიური მაჩვენებელი 4000-ზე მეტია. სკოლების ადმინისტრაციები დისტანციური სწავლებისთვის მზად არიან და სამინისტროსგან ბრძანებას ელოდებიან. როგორც ჩვენთან პირად საუბრებში მასწავლებლები ამბობენ, დირექტორები მათ აფრთხილებენ, რომ ორ კვირაში სკოლები დისტანციურ სწავლებაზე გადავლენ, ამის მიზეზი კი კორონავირუსის ათასობით შემთხვევა და ასეულობით ონლაინ სწავლებაზე გადასული კლასია, ასევე იმატებს იმ მოსწავლეთა რაოდენობა, რომლებიც ონლაინ სწავლებას ირჩევენ. კითხვაზე – რატომ ორ კვირაში? – პედაგოგები გვპასუხობენ, რომ მათი ინფორმაციით, არჩევნების მეორე ტურის შემდეგ ქვეყანაში რეგულაციების გამკაცრება იგეგმება.

ამ ეტაპზე განათლებისა და მეცნიერების სამინისტროში სკოლების დახურვასთან დაკავშირებით კომენტარს არ აკეთებენ. მინისტრის მოადგილის, ეკატერინე დგებუაძის თქმით, განათლების სამინისტროში სკოლებიდან დისტანციურ სწავლებაზე გადასვლის განაცხადები ყოველდღიურად შედის, თუმცა კონკრეტულად სკოლა გადავიდეს ონლაინ სწავლებაზე თუ მხოლოდ კლასი, ამას ადგილობრივი ჯანდაცვის სამსახური წყვეტს.

გააზიარეთ და მოიწონეთ სტატია:
Pin Share