ლანჩხუთში მგელმა საცხოვრებელ კორპუსთან 100 მეტრში პირუტყვი დაგლიჯა

დღეს ქალაქ ლანჩხუთში, “მეურნეობის ბინებიდან” 100 მეტრში მდებარე საყანე ფართობში, მგელმა პირუტყვი დაგლიჯა.

„ღია ფერის იყო, მოფუზული კი დავინახე, მაგრამ არ მიმიქცევია ყურადღება, წავედი სახლში და მოგვიანებით ამოვბრუნდი ყანის ასაჭრელად, ერთი საათის მერე დაახლოებით და დამხვდა ეს ამბავი.გამოყონ ბრიგადა და მოგვეხმარონ ამ მტაცებელის მოშორებაში. აქვე ვცხოვრობთ , ბავშვები სათამაშოდ აქ ხშირად მოდიან. მოგვაქციონ ყურადღება” – გვიყვებიან  ადგილობრივები.

მომხდარ ფაქტთან დაკავშირებით“ გურიის მოამბე” ლანჩხუთის მუნიციპალიტეტის მერის მოადგილეს ბიძინა იმნაიშვილს დავუკავშირდა, რომელმაც  გვითხრა რომ მერიასთან არსებული მონადირეების ჯგუფი უკვე გაფრთხილებულია აღნიშნულ ფაქტზე და მიღებული იქნება შესაბამისი ზომები.

„ორი ხბო დაგლიჯა ამ დილით მგელმა ლანჩხუთის ტერიტორიაზე, ე.წ „მეურნეობის ბინებთან ახლოს, საყანე ფართობში.ჩვენ მერიასთან არსებული მონადირეთა ჯგუფი გვყავს, 6-8 კაცი გადის ორ ჯგუფად როცა შეტყობინება შემოდის. ისინი ყველა საჭირო ეკიპირებით არიან აღჭურვილი, ასევე ყავთ ძაღლები, რომლებიც უშუალოდ ნადირზე არიან დაგეშილები. ეს ჯგუფები ისედაც ახორციელებს მონიტორინგს მუნიციპალიტეტის ტერიტორიაზე თვეში ერთხელ, თუ გამოძახებაა უფრო ხშირად, ათი დღის წინაც გასულები იყვნენ რამდენიმე სოფელში საიდანაც შეტყობინება შემოვიდა რომ მგელი ნახეს. ამ კონკრეტულ ფაქტთან დაკავშირებითაც ყველა ზომა იქნება გატარებული და იმედია მტაცებელი ლიკვიდირებული იქნება უახლოეს საათებში.“- გვითხრა მერის მოადგილემ.

გააზიარეთ და მოიწონეთ სტატია:
Pin Share