თავდაცვის სამინისტრომ სამხედროებს მინიატურული ახალი აღთქმა დაურიგა

თავდაცვის სამინისტროში აცხადებენ, რომ გიორგობის დღესასწაულზე სამხედროებს მინიატურული ახალი აღთქმა გადაეცათ. ინფორმაცია უწყებამ პრესრელიზით გაავრცელა, სადაც წერს, რომ “წმინდა წიგნების დარიგება” სამინისტროს ინიციატივა იყო.

“მინიატურული ახალი აღთქმა საველე პირობებზეა მორგებული, კომპაქტური და დრეკადია. მისი ყდა კომუფლირებულია, ფურცლები კი, მყარი, თხელი და გასანთლულია, რომ არ დასველდეს. 603-გვერდიან წმინდა წიგნს ქართული ჯარის შესახებ საქართველოს პატრიარქის სიტყვა უძღვის. ახალი აღთქმის, 4 სახარების, ეპისტოლეებისა და ფსალმუნების გარდა, წმინდა წიგნი მოიცავს სამხედრო ფიცს, საქართველოს სახელწმიფო ჰიმნს, საუფლო ლოცვას — 10 მცნება, მრწამსს, 9 ნეტარებას, ასევე ქართველი მეფეების – ვახტანგ გორგასლისა და დავით აღმაშენებლის მიმართვებს ქართული ლაშქარისადმი”, — წერია პრესრელიზში.

უწყებაში ამბობენ, რომ გიორგობის ღვთისმსახურების ჩატარების შემდეგ, სენაკში, II ქვეით ბრიგადაში მდებარე ტაძრის წინამძღვარმა მინიატურული ახალი აღთქმა დასავლეთის სარდალს და ქვედანაყოფის პირად შემადგენლობას დაურიგა და მისი ტარების ტრადიციისა და მნიშვნელობის შესახებ ესაუბრა.

გააზიარეთ და მოიწონეთ სტატია: