“თუ ერთხელ მაინც მდგარხარ ქვეყნის სამსახურში, პოსტზე გამოცხადების დროა!” – პარლამენტთან აქცია ხვალაც იქნება

ვადამდელი პროპორციული არჩევნებისთვის! – ხვალ, 14 ნოემბერს “სირცხვილიამ” აქცია დააანონსა. აქცია რუსთაველის გამზირზე, პარლამენტის წინ, 19 საათზე დაიწყება – “თუ ერთხელ მაინც მდგარხარ ქვეყნის სამსახურში, პოსტზე გამოცხადების დროა!” – ნათქვამია მიმართვაში, რომელსაც ორგანიზაცია ავრცელებს.

ერთ-ერთ მთავარ მოთხოვნად მიხეილ სააკაშვილის სამოქალაქო კლინიკაში გადაყვანა დასახელდება:

2021 წლის ადგილობრივი თვითმმართველობის არჩევნებზე, ისევე, როგორც 2020 წლის საპარლამენტო არჩევნებზე – “ქართული ოცნების” ხელისუფლებამ ამომრჩევლის ნება მოიპარა.

დაშინების, მუქარის, გაყალბებისა და ფულადი თუ ადმინისტრაციული რესურსების გამოყენების უპრეცედენტო მასშტაბების მიუხედავად, მმართველი გუნდის უპირატესობა მინიმალური იყო.
არჩევნების გაყალბების შემდეგ, ქვეყანაში არსებული კიდევ უფრო გაღრმავებული პოლიტიკურ კრიზისიდან გამოსვლის გზად – “ქართულ ოცნებას” მხოლოდ ძალადობრივი და უკანონო მეთოდებით ბრძოლა ესახება.
იმის ფონზე, რომ ქვეყნის მესამე პრეზიდენტი 43-ე დღეა შიმშილობს, არჩევნები გაყალბებულია, ოპოზიციურად განწყობილი ამომრჩეველი კი გაბრაზებული – “ქართული ოცნება” სიტუაციის დეესკალაციის ნაცვლად ამძაფრებს დაძაბულობას და ცალსახად დგამს ნაბიჯებს სამოქალაქო დაპირისპირების გასაღვივებლად.
ხელისუფლება, რომელიც 9 წელია განსხვავებული აზრის მქონე ყველა ადამიანს ქვეყნის მტრად აცხადებს, თავად იქცა კოლაბორაციონისტად, რაც “ისე გვაშორებს ევროკავშირს, როგორც არასდროს” .
მაშინ, როდესაც ბიძინა ივანიშვილმა მოიპარა ამომრჩევლის ნება, მიიტაცა სასამართლო, შეზღუდა სიტყვისა და გამოხატვის თავისუფლება, შელახა ყველა დემოკრატიული ინტიტუტი და შედეგად დაამყარა ავტორიტარული მმართველობა, რუსეთისგან სულ ერთი ნაბიჯი გვაშორებს.
ქვეყნის მესამე პრეზიდენტის მიმართ “ქართული ოცნების” ამორალური და არაჰუმანური ქმედებები, პუტინის რუსეთის გეგმის ზედმიწევნით შესრულებაა. მიხეილ სააკაშვილის მრავალპროფილურ სამოქალაქო დაწესებულებაში გადაყვანის მოთხოვნით, პარლამენტის შენობაში შიმშილობა გამოაცხადა პარტია “დროას” ლიდერმა, ელენე ხოშტარიამ, რომლის ჯანმრთელობის მდგომარეობა ყოველდღე უარესდება. დღეს, იმავე მოთხოვნით, პროტესტის უკიდურეს ფორმას მიმართა “გირჩი – მეტი თავისუფლების” წევრმა, იმედა კლდიაშვილმაც.
ხელისუფლება ვალდებულია გადაიყვანოს მიხეილ სააკაშვილი მრავალპროფილურ სამოქალაქო კლინიკაში!
აქ და ახლა ყველაზე მართლები ვართ და არასდროს ყოფილა ჩვენი პროტესტი იმაზე უფრო ლეგიტიმური, ვიდრე ახლაა! 14 ნოემბერს, 19:00 საათზე, კიდევ ერთხელ და ერთად მოვითხოვთ იმას, რასაც უკვე ბევრი წელია ეს ქვეყანა იმსახურებს – სამართლიან, სრულად პროპორციულ ვადამდელ არჩევნებს, რადგან ლეგიტიმაციადაკარგული “ქართული ოცნება” არ შეიძლება ისევ აგრძელებდეს ქვეყნის მართვის იმიტაციას.
და თუ ერთხელ მაინც მდგარხარ ქვეყნის სამსახურში, პოსტზე გამოცხადების დროა! “- ნათქვამია განცხადებაში.

პარლამენტის წინ დაანონსებულ აქციას სხვადასხვა პოლიტიკური პარტიებიც უერთდებიან:

_ ბიძინა ივანიშვილის რეჟიმმი ყველაფერს აკეთებს რომ რუსეთს შეგვაერთოს. გაყალბებული არჩევნები,დაშინებული და დაკავებული აქტივისტები, ციხეში გამოკეტილი ქვეყნის მესამე პრეზიდენტი, რომელსის სოცოცხლეც რისკის ქვეშ დააყენეს, ჩატეხილი ხიდები ევროპასთან და ამერიკასთან _ ეს არის რეალობა, რომელშიც გვიწევს ცხოვრება და რომელთანაც შეგუებას არ ვაპირებთ. რამდენჯერ დაგვარბიეს აქციებზე, რამდენს შეექმნა პრობლემები, თუმცა, დანებებას რომ არ ვაპირებთ და არ შევეგუებით რუსეთში ყოფნას, ამას კიდევ ერთხელ დაინახავს ეს ხელისუფლება ამ აქციაზეც და ჩვენ ყველაფერს გავაკეთებთ იმისთვის, რომ ქვეყანა დაუბრუნდეს ჩენს მთავარ მიზანს _ ევროპულ გზას და ამ ქვეყანაში დაბრუნდეს დემოკრატია, _ აღნიშნა ჩვენთან საუბრისას “ნაციონალური მოძრაობის” წევრმა, ვლადიმერ ჟღენტმა, რომელიც ერთ-ერთია იმ აქციის მონაწილეებიდან, რომელმაც საპროტესტო აქციებზე სპეცრაზმის ჭავლიც გამოსცადა და არაერთი დაზიანებაც მიიღო, თუმცა, ყველაფრის მიუხედავად, თანამოაზრეებთან ერთად პროტესტის და ბრძოლის შეწყვეტას არ აპირბეს.