ყიდულობს თუ არა საქართველო თურქეთში წამლებს

Top-5 ქვეყანა, სადაც წელს საქართველომ დაფასოებული სამკურნალო საშუალებები იყიდა, ასე გამოიყურება:

გერმანია – 46,166 მლნ დოლარი
თურქეთი – 40,142 მლნ დოლარი
უნგრეთი – 32,509 მლნ დოლარი
საფრანგეთი – 28,709 მლნ დოლარი
უკრაინა – 18,519 მლნ დოლარი

თურქეთიდან დღეს რატომღაც აკრძალულია წამლების შემოტანა, იმპორტი. დავსვი კითხვა, რატომ? პასუხი არავის აქვს – ეს განცხადება პრემიერმა ირაკლი ღარიბაშვილმა „იმედის“ ეთერში საუბრისას გააკეთა და იქვე დასძინა, რომ „როგორც კი ამ გადაწყვეტილებას მივიღებთ, ეს შეიძლება ძალიან სწრაფი ეფექტი იყოს და მაშინვე შეიძლება გაიაფდეს წამლები“.

არადა, საქართველოში თურქეთიდან მედიკამენტები საკმაოდ დიდი რაოდენობით შემოდის, მეტიც, იმპორტიორ ქვეყნებს შორის თურქეთს მეორე ადგილიც კი უკავია. უფრო კონკრეტულად, 2021 წლის იანვარ-ნოემბერში თურქეთიდან 40,142 მლნ დოლარის ღირებულების დაფასოებული სამკურნალო საშუალებები შემოვიდა, რაც მთლიანი იმპორტის 12%-ს შეადგენს. საერთო ჯამში, წელს 11 თვეში ქვეყანამ 334,321 მლნ დოლარის ღირებულების შეფუთული წამალი იყიდა, ჯამში 67 ქვეყანაში.

ამასთან, წელს 11 თვეში საქართველომ 9,713 მლნ დოლარის ღირებულების დაუფასოებელი სამკურნალო საშუალებები შეიძინა, სულ 19 ქვეყანაში და თურქეთი იმპორტიორების სიაში არ არის.

გააზიარეთ და მოიწონეთ სტატია: