ახალი საინვესტიციო პროექტი ოზურგეთში – სპეციალური ავტოტექნიკის მწარმოებელი ქარხნის მშენებლობა დაიწყო

ბოლო დღეეში “გურიის მოამბეს” ბევრი ადამიანი დაუკავშირდა კითხვით, თუ რა შენდება ოზურგეთის მუნიციპალიტეტის სოფელ მერიაში.

აღნიშნულთან დაკავშირებით გაწვდით ინფორმაციას, რომელიც აღებულია ოზურგეთის მუნიციპალიტეტის მერის, ავთანდილ თალაკვაძის “ფეისბუკის” ოფიციალური გვერდიდან.

ბატონმა თალაკვაძემ ეს ინფორმაცია გასული წლის 16 დეკემბერს გაავრცელა.

სოფელ მერიაში (ოზურგეთის მუნიციპალიტეტი) აშენდება და მუშაობას დაიწყებს თანამედროვე ტექნოლოგიებით აღჭურვილი ქარხანა, რომელიც სასწრაფო სამედიცინო დახმარებისა და სხვა სპეცდანიშნულების ავტომობილებს დააკომპლექტებს.

კომპანია „ბიელესი“ პროექტში 10 მილიონიანი ინვესტიციის ჩადებას გეგმავს, რაც საწყის ეტაპზე 70, საბოლოოდ კი 250 ახალ სამუშაო ადგილს შექმნის. კომპანია “ბიელესის“ დამფუძნებელი და პარტნიორები გაერთიანებულ სამეფოში სპეცავტოტექნიკის ერთ-ერთი წამყვანი მწარმოებელი ბრიტანელი ბიზნესმენები არიან.

ეს არის საქართველოსთვის მნიშვნელოვანი საინვესტიციო პროექტი, რომელიც ოზურგეთის მუნიციპალიტეტში განხორციელდება.

ახალი საინვესტიციო პროექტები ჩვენი 8 პუნქტიანი გეგმის ერთ-ერთი მთავარი პრიორიტეტია და ამ კუთხით ოზურგეთის მერია აქტიურად იმუშავებს შემდეგი წლების განმავლობაში.