“წყალწაღებულებივით ვართ” – როგორ ხვდებიან ახალ წელს გურიაში?

თამუნა ლომაძე, ერთ-ერთი სუპერმარკეტის გამყიდველი – პროდუქტებზე ძალიან მომატებულია ფასები. საგრძნობლად მოიმატა  ზეთზე ფასმა, ყველაზე დაბალი ფასი  5.50-ია.  საჭირო  რომაა ყიდულობს  ხალხი  რა ქნას. ძირითადად  ყიდულობენ  ზეთს, კვერცხს.  რასაც  ახერხებენ ყიდილობენ იმას, მარა გაძვირებულია ძალიან. საახალწლო  მზადება  ადრე უფრო ეტყობოდათ  ადამიანებს,  ვიდრე  ეხლა. ყველაფერზეა ფასები ცოტ-ცოტა  მომატებული- შაქარზე,  ტომატზე,  კვერცხზე.  ბურღულეულზე არაა.  ფასების მატებას ვუკავშირებ  ჩაკეტილი,  რომ არის პანდემიის გამო  აი მაგას. რამდენი ხანია ვმუშაობ და  ასეთი მდგომარეობა არ ყოფილა არასდროს. საახალწლოდ  ყოველთვის იმატებდა  ფასები, მაგრამ ახლა რომ არის ასე არასდროს.

ჯემალი დიასამიძე – ახლა კორონა რომაა  კერკეტა ნიგოზის  ფასი დავარდნილია და ღირს   8 ლარი, ისე 9 და 10 ლარი  ღირს. ქართული ნიგოზი კაი ნიგოზი – 25 ლარია და ადის ფასები  26, 27, 30  ლარია  მთლად  სუპერი. საშუალო  ნიგოზი 20 ლარია. ძალიან ძნელად ყიდულობს  ხალხი,  გაჭირვებული არიან და ვერ ყიდულობენ.  მე ვმუშაობ  წამღები რომ არიან იმათზე, თორემ ისე არაფერი არ იყიდება.

მზევინარ ნაკაშიძე -ხალხს უჭირს ყიდვა და კიდე როგორ ყიდულობენ  არ ვიცი, გაკვირვებული ვარ. საერთოდ ყველაფერი გაძვირებულია. როცა ერთი მეშოკი ფქვილი 100 ლარი იქნება, სხვაზე რა უნდა ვილაპარაკოთ. ერევნიდან  შემოდის ხილი და   დოლარი  გაძვირებული რომ არის,  გააძვირეს  ესენიც. ფასები ასეთია:- ყურძენი-4ლარი; ბანანი -4,50;  ვაშლი-1.80- 2ლარია; ბროწეული- 4, 50. ასევე გაძვირებულია  ლობიოც  7 ლარის ღირს, როცა  4 ლარი ღირდა გასულ წელს.

მანანა ქ. – ვაშლი-1-2-2.50 ლარია; მანდარინი -0.50 თეთრია; ყურძენი-3.50; ჩირი-5ლარია; ჩურჩხელა-1-50-2ლარია. შეძლებისდაგვარად  ყიდულობს  ხალხი. აგროვებენ,  ინახავენ ფულს  საახალწლოდ და  ყიდულობენ.

 ნანა მსხალაძე – საერთოდ არ მაქვს განწყობა ისეთი ამბებია. ძალიან ნაკლებად, რომ ნორმალური ახალი წელი ქონდეს ჩემ  შვილებს, სურვილები რომ აუსრულდეთ. სოციალური დახმარების  400 ლარზე რომ იქნები დამოკიდებული, როგორ  უნდა შეხვდე.

შორენა არსენიძე  – განწყობას რაც შეეხება, იმის მიუხედავად, რომ ასეთი გაჭირვება და უმუშევრობაა და კიდევ ეს კორონა ვირუსი დაემატა ცუდია, მაგრამ არ მაძლევს მაგის უფლებას სამი შვილი. ვალდებული  ვარ აუმაღლო განწყობა. ესენი ხო ბავშვებია და მათთვის ახალი წელი სახალისოა.  საახალწლო სუფრისთვის ვყიდულობ იმას, შესაბამისად რა საშუალებაც მექნება.

ანა ხარატი – საახალწლო განწყობა საშუალოდ, ასე თუ ისე მაინც მაქვს, თუმცა ისეთი არა, როგორიც წინა წლებში. ფინანსური საშუალება შედარებით შეზღუდულად, მაგრამ ძირითადად, მე პირადად, საახალწლო საჩუქრებს ვყიდულობ,  საჭმელი იქნება რაცხა.

ლალი სირაძე – ძალიან მიყვარს ახალი წელი და ძალიან კარგ განწყობაზე  ვარ.  საშუალო  ფინანსური შემოსავალი გვაქვს.  რაც საახალწლო საჭმელს  და  ახალწელს შეიძლება, ვყიდულობ ყველაფერს.

ანა ღლონტი-საახალწლო განწყობა პოზიტიური მაქვს. რაც შეეხება ფინანსებს, იმის მიხედვით, თუ ვიმსჯელებთ შეძლებისდაგვარად მაქვს. გოჭი და ინდაურის საშუალება არ მაქვს, მაგრამ რამე ტკბილეულით და იმედიანი განწყობით. ძირითადად, ვყიდულობ იმას, რაც თანხის საშუალება მაქვს.  ბევრს ვერაფერს, ბავშვებს რაც უხარია იმას.  ფული რომ მქონდეს, კი ვიცი რასაც ვიზამ, მაგრამ არ მაქვს და არც მცხვენია მაგის. მშვიდობა იყოს და ჯანმრთელობა,  სხვა ყველაფერი მეორე ხარისხოვანია. ყველას უყვარს მსუყე მაგიდა და გართობა. წელს მთლად წყალწაღებულივით ვართ, შარშან კიდე ყველაფერი მქონდა. მაგრამ, წელს რა გითხრა, არც ბავშვები არ მეყოლება სახლში და უხალისოდ ვარ.

 თამუნა ზაქარიაძე– საახალწლო განწყობას რაც შეეხება კარგი მაქვს,  იმ მხრივ რომ  ჩემს ახალ ოჯახში ვხვდები პირველად.  ფინანსური მდგომარეობა გასულ წელთან შედარებით ძალიან მოიკლო…. ყიდვას რაც შეეხება საახალწლო სუფრა როგორიც შეგვეფერება გურულებს, სამწუხაროდ ვერ იქნება, რადგან მცირე შემოსავალია, ამიტომ ელემენტარული პატარა,  სადა სუფრა მექნება მარტო მე კი არა, სამწუხაროდ, ნახევარ საქართველოს.

ნანა მექვაბიშვილი – საახალწლო განწყობა მაქვს. ზედმეტი არაფერი მიყვარს, ბედნიერებისთვის ცოტაც საკმარისია  ამისი განწყობა სულ უნდა ჰქონდეს ადამიანს. ძირითადად, სილამაზეებს ვყიდულობ, რასაც ჩემი ბიუჯეტი გასწვდება. ისე მე, შობას უფრო ამაღლებული განწყობით ვხვდები.

ნათელა ბერიძე – სადღაა ღირსეული შეხვედრა და ახალი წელი. მე თუ მკითხავ სულ არ მინდა ახალი წლის მოსვლა, რადგან რამდენი რამეა საჭირო და შესაძლებლობა არც ერთი მხრიდან არ ჩანს.  ასეთი ახალი წელი მოუვიდეს, ზევით მდგომ მთავრობას, როგორიც გლეხ ხალხს აქვს. სამსახური მე არ მაქვს და ხელფასი. პენსია ათასი პრობლემის გამო, წინასწარაა გამოტანილი და დარჩენილი ნახევარი პენსიით,  ძირითადად,  წნევის  და დიაბეტის წამლებს ვყიდულობ.  წნევიანი,  დიაბეტიანი ქალი ვარ.  იმ პენსიის მეოთხედით კი, ვყიდულობ პურს და საარსებო საშუალებას, რაც აუცილებელია და რომელი დღესასწაულია აქ მოსახსენიებელი. ვინც სრულ ჭკუაზეა, ის კი მიხვდება, რომ რატო არ მინდა ახალი წლის მოსვლა. ისევ გაჩნდება ახალი პრობლემები და თავსატეხები, თუ როგორ გაგრძელდეს ეს ტანჯული ცხოვრება.

ნათკა იმედაშვილი