ქალები, რომელთა გარეშეც 2020 წელი ძალიან რთული იქნებოდა

2020 წელს სამყაროს სუპერგმირები და ყოვლისშემძლეები (ანუ ქალები) სამსახურებიდან სახლებში დაბრუნდნენ და მუშაობასთან ერთად ოჯახის საქმეებიც შეითავსეს. წლის გმირების სტატუსი მათაც ეკუთვნით, თუმცა გადავწყვიტეთ კიდევ რამდენიმე გამორჩეული ქალი გამოგვეყო, რომელთა მმართველობის, სიყვარულის, მზრუნველობის, გონიერების და ბრძოლის გარეშეც 2020 ბევრად უფრო რთული იქნებოდა.

მარნეულელი ქალები

ფოტო: UN Women Georgia

მაისში მარნეულელმა ქალებმა ყველას გულები გაგვითბეს, როდესაც პანდემიის პირობებში ერთ-ერთი პირველები იყვნენ, ვინც მაღალი საზოგადოებრივი სოლიდარობის მაგალითი გვიჩვენეს. სოფელ მარადისში ქალებმა COVID-19-ით ინფიცირებულ ოჯახს კარტოფილის მოსავალი შეუნარჩუნეს.

ადგილობრივმა ნაირა პაქსაძემ, სხვა აქტიურ ქალებთან ერთად, სარეველაშერეული ნაკვეთი გათოხნა და ოჯახს, რომლის წევრებიც იმ დროს საავადმყოფოში მკურნალობდნენ, შემოსავლის ერთადერთი წყარო არ დაუკარგა. რა თქმა უნდა, ქალებმა მუშაობისას სოციალური დისტანციაც დაიცვეს.

ქალთა საფეხბურთო კლუბი — ლანჩხუთი

ფოტო: ქსკ ლანჩხუთი

ქალთა საფეხბურთო კლუბი ლანჩხუთი საქართველოს ფეხბურთის ისტორიაში უმნიშვნელოვანესი მოვლენაა. ფინანსური პრობლემების და არც ისე მაღალი ცნობადობის მიუხედავად, გოგოებმა ისტორიული შედეგი გვიჩვენეს. ლანჩხუთი პირველი ქართული გუნდია, რომელმაც ჩემპიონთა ლიგაზე ორი საკვალიფიკაციო ეტაპი გადალახა და ევროპის 32 საუკეთესო კლუბს შორის მოხვდა.

წლის ბოლოს, 2020 წლის საქართველოს საუკეთესო ფეხბურთელ ქალად გუნდის ბომბარდირი, ხატია ჭყონია დასახელდა.

კამალა ჰარისი

ფოტო: Andrew Harnik/AP

“შესაძლოა, მე ვიყო პირველი ქალი ვიცე-პრეზიდენტი ამ ოფისში, მაგრამ არ ვიქნები ბოლო”, — განაცხადა კამალა ჰარისმა, მას შემდეგ, რაც აშშ-ის საპრეზიდენტო არჩევნების შედეგები გამოქვეყნდა. ის გახდა ამერიკის პირველი აფროამერიკელი, აზიელამერიკელი, ქალი ვიცე-პრეზიდენტი ამერიკაში. ისტორიული გამარჯვება, რომელიც ხელს უწყობს პოლიტიკაში ქალთა ხილვადობის ზრდას და მათთვის ახალ შესაძლებლობებს ხსნის, კამალა ჰარისს არა მხოლოდ გასული წლის, ჩვენი საუკუნის უმნიშვნელოვანეს ადამიანად აქცევს.

2020 წლის ნობელის პრემიის ლაურეატი ქალები

წელს ნობელის პრემიის დაჯილდოებაზე ქალებმა ისტორია შექმნეს და მრავალ ძირითად კატეგორიებში გაიმარჯვეს.

ანდრეა გეზი ნობელის პრემიის ისტორიაში მეოთხე ქალი ლაურეატია, რომელმაც ჯილდო ფიზიკის დარგში მოიპოვა, შავი ხვრელის კვლევისთვის.

2020 წლის ნობელის პრემია ქიმიის დარგში გენეტიკის, მიკრობიოლოგიისა და ბიოქიმიის ფრანგ მკვლევარს, ემანუელ შარპენტიესა და ამერიკელ ბიოქიმიკოსს, ჯენიფერ დუდნას, გადაეცათ — გენომის ცვლილების ტექნოლოგიის განვითარებისათვის. ეს ჯილდო აქამდე 5 ქალს აქვს მოგებული.

ამერიკელმა პოეტმა ლუიზ გლუკმა ლიტერატურის დარგში მოიპოვა ჯილდო და მე-16 ქალი გახდა, რომელსაც პრემიის 119 წლიან ისტორიაში ეს პატივი ხვდა წილად.

დეა კულუმბეგაშვილი

ფოტო: Forbes Woman

ფოტო: Wild Bunch International

დეა კულუმბეგაშვილის მხატვრული ფილმი — დასაწყისი სან სებასტიანის საერთაშორისო კინოფესტივალის ტრიუმფატორი გახდა. ია სუხიტაშვილმა საუკეთესო ქალი მსახიობის ნომინაციაში მოიპოვა ჯილდო, დეა კულუმბეგაშვილი კი საუკეთესო სცენარის, საუკეთესო რეჟისორისა და საუკეთესო ფილმის ნომინაციების გამარჯვებული გახდა. ფილმი დამოუკიდებელი ქართული კინოს ისტორიაში პირველია, რომელიც კანის კინოფესტივალის მთავარ სექციაში მოხვდა. დასაწყისი ოსკარის დაჯილდოების ნომინაციისთვისაც იბრძოლებს, საუკეთესო უცხოენოვანი ფილმის კატეგორიაში.

ჯასინდა არდერნი

ფოტო: Getty Images

როცა წამყვანი ქვეყნებს კრიზისთან გამკლავება გაუჭირდა, ახალი ზელანდიის პრემიერმინისტრი, ჯასინდა არდერნი 2020 წელს წარმატებული ლიდერობის მაგალითი გახდა. ქვეყნის ისტორიაში მესამე ქალმა პრემიერმა ქვეყანა პანდემიისას, ყველაზე რთული გლობალური გამოწვევებისას მინიმალური დანაკარგებით მართა. დაახლოებით 5-მილიონიანი ქვეყნის კოვიდ სტატისტიკა ასეთია: 2 162 დადასტურებული და 55 აქტიური შემთხვევა, 25 გარდაცვლილი. არდერნი ქვეყნის სათავეში მეორე ვადითაც აირჩიეს.

სარა გილბერტი — COVID-19-ის ვაქცინის შემქმნელი

ფოტო: JOHN CAIRNS/UNIVERSITY OF OXFORD

“რაღაც ეტაპზე მეცნიერებიდან წასვლას და რამე სხვა საქმით დაკავებას განვიხილავდი”, — ამბობს სარა გილბერტი. სამყარო მადლიერია, რომ მან მეცნიერულ კარიერას კიდევ ერთი შანსი მისცა, რადგან სწორედ მისი დამსახურებით გვაქვს ოქსფორდის უნივერსიტეტის კორონავირუსის ვაქცინა. მისი სამეცნიერო შრომის შედეგი პანდემიური 2020-ის დასასრულს იმედით გვავსებს.

ქალები, რომლებმაც ჰარვი ვაინშტაინი ციხეში ჩასვეს

ჰარვი ვაინშტაინი, მიმი ჰალეი და ანაბელა სიორა

ფოტო: Getty Images

2020 წლის 11 მარტს ციხეში წავიდა ამერიკის ერთ-ერთი ყველაზე გავლენიანი კაცი, რომელმაც 80-იანებიდან მოყოლებული უამრავი ქალზე იძალადა და მათი ნაწილის კარიერა დაასამარა კიდეც.

მსახიობი ეშლი ჯადი პირველი იყო, ვინც 2017 წელს, რონან ფეროუს მომზადებული სტატიიდან ჰარვი ვაინშტაინი სექსუალურ შევიწროებაში ამხილა. ქალების რაოდენობა, რომლებიც ვაინშტაინს შევიწროებაში, ძალადობასა და გაუპატიურებაში ადანაშაულებდნენ მალე 80-მდე გაიზარდა.

ვაინშტაინის წინააღმდეგ მთავარი მოწმეები მისი ყოფილი ასისტენტი მიმი ჰალეი და მსახიობი ანაბელა სიორა იყვნენ, რომლებმაც ის გაუპატიურებაში დაადანაშაულეს. ხმაურიანი ბრძოლა, რომელსაც ქალების გაძლიერება მოჰყვა, ნაწილობრივ დასრულდა და ერთ დროს ჰოლივუდის ყველაზე გავლენიანი პროდიუსერს 23-წლიანი პატიმრობა მიესაჯა. ის სასჯელს ნიუ-იორკის ციხეში იხდის.

დოლი პარტონი

2020 წელი არც ისე მარტივად დაწყებულა, თუმცა მაშინაც კი, დოლი პარტონმა შეძლო და სახალისო გამოწვევით აიყოლია მთელი მსოფლიო. როცა პანდემიამ იფეთქა, მან მშობლიურ ტენესში მედიკოსებს პირველადი საჭიროების ნივთები უსასყიდლოდ დაურიგა, სახლში დარჩენილი ბავშვებისთვის კი ზღაპრების კითხვა და ვიდეოსერიების ჩაწერა დაიწყო.

წლის ბოლოს, აღმოჩნდა, რომ დოლი პარტონმა კორონავირუსის ერთ-ერთი მთავარი ვაქცინის შექმნა დააფინანსა. მან ჯერ კიდევ აპრილში ვანდერბილტის უნივერსიტეტს მილიონი დოლარი გადაურიცხა, ეს თანხა მოდერნას ვაქცინის შექმნისთვის გამოიყენეს. ბოლო კვლევებით, Moderna-ს ვაქცინა 94,1%-ით ეფექტიანია.

on.ge

გააზიარეთ და მოიწონეთ სტატია:

მსგავსი სტატიები

  • 97
    "ის ახლა ვასიკოშია, ორ ირაკლიშია, თეაშია, გიაშია..ყველგანაა და წავიდაო"!თოფიანები და ფულიანები - ასე შეიძლება დავახასიათოთ „ქართული ოცნების“ პოლიტსაბჭოს ახალი შემადგენლობა. შეუცვლელი და ხელშეუხებელი მინისტრები, რომლებიც მთლიანად აკონტროლებენ ბიუჯეტს და ძალოვან ბლოკს, პლიუს საპარლამენტო წარმომადგენლობა ”დამამშვენებლის” როლით. ამათ დამატებული მარიონეტი გენერალური პროკურორი და მორჩილი პირებით დაკომპლექტებული სასამართლო სისტემა, მართული ეროვნული ბანკი და რა მივიღეთ? ივანიშვილის ოცნების ხელისუფლება. წავიდა თუ…
    Tags: და, საზოგადოება, მთავარი, თემა, ახალი, ამბები
  • 97
    მსოფლიო პატრიარქმა ბართლომეოსმა საშობაო ეპისტოლე ქართულადაც გამოაქვეყნაკონსტანტინოპოლის მთავარეპისკოპოსმა, მსოფლიო პატრიარქმა ბართლომეოსმა საშობაო ეპისტოლე სხვადასხვა ენაზე, მათ შორის, ქართულად გამოაქვეყნა. მსოფლიო პატრიარქის საშობაო ეპისტოლეს ქართულ ტექსტს მსოფლიო საპატრიარქო ავრცელებს. „ეკლესიას სისავსეს: მადლი, წყალობა და მშვიდობა ბეთლემში შობილი იესო ქრისტესი * * * ქრისტეში ყოვლად ღირსეულნო ძმანო და საყვარელნო შვილნო, ვმოგზაურობთ ყოვლადწმინდა ქალწულთან ერთად, და მადლიერების გრძნობით გამსჭვალულნი, მოუთმენლად…
    Tags: და, საზოგადოება, მთავარი, თემა, ახალი, ამბები
  • 97
    კალანდა გურიაში - ეთნოგრაფ სერგი მაკალათიას მოგონებებიდანროგორ ხვდებოდნენ გურულები ახალ წელს ცნობილი ქართველი ეთნოგრაფისა და ისტორიის მეცნიერებათა პროფესორის სერგი მაკალათიას ნაშრომის „ახალწელიწადი საქართველოში“ (1827 წლის გამოცემა) მიხედვით ძველად საქართველოში  ახალი წლის დასაწყისად  სხვადასხვა დრო და რიცხვი იყო მიჩნეული. მე-11 საუკუნიდან მიღებული იყო ორგვარი წელთაღრიცხვა, პირველი სექტემბერი და პირველი იანვარი. ერთი მათგანი განმწესებული იყო საეკლესიო წელთაღრიცხვისათვის ხოლო…
    Tags: და, საზოგადოება, მთავარი, თემა, ახალი, ამბები
  • 97
    "120 წლის წინ გურულებმა შეგვიფარა "თათრები და ჩამოთრეულები" არასდროს უწოდებიათ" ბუკნარელი მუსლიმის სატკივარიბუკნარში (ჩოხატაური) რელიგიურ ნიადაგზე განვითარებულ პროცესებს ადგილობრივი ომარ ირემაძე "ფეისბუკის" საკუთარ გვერდზე ეხმიანება და წერს: "120 წლის უკან როცა გურიაში აჭარიდან თურქის ბატონობასა და გაჭირვებას გამოქცეული ჩემი და ჩემი მეგობრების წინაპრები გადმოსულან მაშინდელ ადგილობრივ გურულებს მათთვის თათრები და ჩამოთრეულები კა არ უწოდებიათ, არამედ მიიღეს როგორც მტრის კლანჭებს გამოქცეული ძმები და…
    Tags: და, საზოგადოება, მთავარი, თემა, ახალი, ამბები