“უსინდისობა და უტიფარი ტყუილია… სტრასბურგს არ დაუდგენია, რომ მიხეილ სააკაშვილი სათანადო პირობებშია” – თუთბერიძე პაპუაშვილზე

საქართველოს მესამე პრეზიდენტის ადვოკატი, შოთა თუთბერიძე პარლამენტის თავმჯდომარეს სიცრუეში ადანაშაულებს.

საუბარია შალვა პაპუაშვილის იმ განცხადებაზე, სადაც მან თქვა: “სტრასბურგის სასამართლომ დაადგინა, რომ მიხეილ სააკაშვილს ყველა სათანადო სამედიცინო მომსახურება მიეწოდება”.

ადვოკატი ამბობს, რომ სტრასბურგის ადამიანის უფლებათა ევროპულ სასამართლოს მსგავსი არაფერი დაუდგენია.

“სტრასბურგმა რაც გააკეთა, ერთ-ერთი პირველი დაცვის მხარის საჩივრის შედეგად იყო ის, რომ ხელისუფლებას დაავალა მიხეილ სააკაშვილისთვის სათანადო მკურნალობის გაწევა. ბატონი პაპუაშვილისგან, ამ დონის თანამდებობის პირისგან მსგავსი უსინდისობა და უტიფარი ტყუილი ან უბრალოდ იმას ნიშნავს, რომ მას მარტივი ფაქტობრივი მოცემულობის გაანალიზების უნარი აქვს დაკარგული და აგონიაშია, ან უბრალოდ იმას ცდილობს, რომ საზოგადოება შეიყვანოს შეცდომაში. სტრასბურგის სასამართლოს არცერთ ეტაპზე, დაცვის მხარის შუამდგომლობის დაკმაყოფილებაზე უარი არ განუცხადებია და მით უმეტეს, არ დაუდგენია, რომ მიხეილ სააკაშვილი სათანადო პირობებში იმყოფება”, – ამბობს შოთა თუთბერიძე.

გააზიარეთ და მოიწონეთ სტატია:
Pin Share