26-27 ოქტომბერს ნასაკირალის უღელტეხილზე გარკვეული ავტოტრანსპორტის მოძრაობა შეიზღუდება

საავტომობილო გზების დეპარტამენტის ინფორმაციით, 26-27 ოქტომბერს ნასაკირალის უღელტეხილზე მისაბმელიანი და ნახევრადმისაბმელიანი ავტოტრანსპორტის მოძრაობა დროებით იზღუდება. მიზეზი კი გზის სავალ ნაწილზე ასფალტ-ბეტონის ფენის დაგებაა.

“შიდასახელმწიფოებრივი მნიშვნელობის საჯავახო-ჩოხატაური-ოზურგეთი-ქობულეთის საავტომობილო გზის კმ35-კმ43.6 (ე.წ. „ნასაკირალის უღელტეხილი“) მონაკვეთზე, დეპარტამენტის კონტრაქტორი ორგანიზაცია „ჩინეთის გზებისა და ხიდების კორპორაციის“ ფილიალი საქართველოში, ახორციელებს გზის სავალ ნაწილზე ასფალტ-ბეტონის ფენის დაგებას. რის გამოც, 2022 წლის 26 ოქტომბრის 08:00 სთ-დან 27 ოქტომბრის 08:00 სთ-მდე, აღნიშნულ მონაკვეთზე იკრძალება მისაბმელიანი და ნახევრადმისაბმელიანი ავტოტრანსპორტის მოძრაობა, ხოლო დანარჩენი სახის ავტოტრანსპორტის გადაადგილება თავისუფალია.

დროის აღნიშნულ პერიოდში, მისაბმელიანი და ნახევრადმისაბმელიანი ავტოტრანსპორტის მოძრაობა შესაძლებელი იქნება საერთაშორისო მნიშვნელობის სამტრედია-ლანჩხუთი-გრიგოლეთის საავტომობილო გზის გავლით” – წერია განცხადებაში.

გააზიარეთ და მოიწონეთ სტატია:
Pin Share