პროცესები უკიდურესობამდე მივიდა: – ულტრალიბერალურმა იდეოლოგიამ ახალი ფორმის ძალადობა წარმოშვა, რომლის იარაღად დემოკრატია იქცა – ისტერიული კამპანიით ტრადიციული იდეოლოგიის საზოგადოებას ძალით თავს მოახვიო ის, რაც მისთვის მიუღებელია, ესეც ძალადობის ერთ-ერთი ფორმაა, – აღნიშნული განცხადება პარლამენტის პლენარულ სხდომაზე “ხალხის ძალის“ დეპუტატმა, საპარლამენტო უმრავლესობის წარმომადგენელმა დიმიტრი ხუნდაძემ გააკეთა.
ხუნდაძის აზრით, მსოფლიოში განვითარებულმა მოვლენებმა ცხადყო, რომ ისტორია მეორდება. როგორც მან ამ კონტექსტში აღნიშნა, თითქმის ერთი საუკუნის წინ ულტრანაციონალურმა მოძრაობამ ევროპაში ფაშიზმი წარმოშვა, რასაც მეორე მსოფლიო ომი მოჰყვა.
ხუნდაძის თქმით, მას შემდეგ მსოფლიო თანამეგობრობამ ამის საპირისპიროდ გლობალიზაცია შემოგვთავაზა, რაც ბევრი კუთხით კარგია, მაგრამ პატარა სახელმწიფოებთან მიმართებით ხარვეზები აქვს.
“პროცესები აქაც უკიდურესობამდე მივიდა: – ულტრალიბერალურმა იდეოლოგიამ ახალი ფორმის ძალადობა წარმოშვა, რომლის იარაღად დემოკრატია იქცა. არადა, ასეთი ქმედება სწორედაც რომ ჭეშმარიტ დემოკრატიულ ღირებულებებს უთხრის ძირს და ყველაზე დიდი მსხვერპლი შესაძლოა ტრადიციული, პატარა ქვეყნები აღმოჩნდნენ.
ისტერიული კამპანიით ტრადიციული იდეოლოგიის საზოგადოებას ძალით თავს მოახვიო ის, რაც მისთვის მიუღებელია, ესეც ძალადობის ერთ-ერთი ფორმაა.
მსოფლიო პოლიტიკა ერთი უკიდურესობიდან მეორე უკიდურესობაში გადავიდა და დღეს ულტრალიბერალიზმმა კვლავ წარმოშვა ულტრარადიკალიზმი საზოგადოების გარკვეულ ფენაში.
გვსურს თუ არა ასეთი მსოფლიო წესრიგი, სადაც ერთ რადიკალიზმს ცვლის მეორეს და ორივე დამანგრეველია სახელმწიფოებისთვის?
რატომ ვერ ხერხდება დღემდე ლიბერალური თუ კონსერვატიული იდეოლოგიის ისეთი ფორმით განხორციელება, სადაც საკუთარი ღირებულებების აღიარება სხვისი უფლებების დარღვევას არ იწვევს? უფრო მეტიც, არ ძალადობს სხვაზე.
გარდა ამისა, დღეს კიდევ სხვა რეალობის წინაშე აღმოვჩნდით: -„ თანამედროვე პოლიტიკოსებად” შერაცხულები და საზოგადოების ნაწილი პოლიტიკურ კეკლუცს და პოლიტიკურ მოდას არის აყოლილი.
ზოგი სხვა ქვეყნის ინტერესების სასარგებლოდ განზრახ აკეთებს ამას, ზოგს საკუთარი დროშაც დაავიწყდა და სხვისას აფრიალებს, ზოგიც სხვაგვარად ფიქრობს, მაგრამ მაინც კეკლუცობს და სხვანაირად ამბობს.
მათი აზრით, რადგან ევროპულია, ცუდიც კი კარგია. ასე კეკლუც-კეკლუც, მოდა-მოდა შესაძლოა ჩვენი კულტურა, ტრადიციები და ჩვენი ღირსებაც სხვის ინტერესებს შევწიროთ. ევროპული ბევრი რამ მისაღებია და გასათვალისწინებელიც, მაგრამ არა ყველაფერი.
მოკეკლუცე პოლიტიკოსებს ვურჩევდი, საკუთარი ღირსება მცირედით მაინც დაიტოვონ, თორემ იმ ევროპას და დასავლეთს მორჩილები მხოლოდ აღმსრულებლებად სჭირდებათ, პატივს კი მათ არ სცემენ.
შეგვიძლია ვთქვათ, რომ დღეს მსოფლიო პოლიტიკაში იდეოლოგიური ომია, მათ შორის საქართველოშიც. კულმინაციას მიღწეული ნებისმიერი პროცესი ვარდნას განიცდის.
ულტრალიბერალიზმმაც კულმინაციიდან ვარდნა დაიწყო და ეს პროცესები ულტრარადიკალებმა რომ არ გამოიყენონ, აუცილებელია არა ემოციებზე, არამედ, გონებაზე დაფუძნებული ეროვნულ-ევროპული, კონსერვატორული იდეოლოგია შევთავაზოთ მოსახლეობას.
ეს არის დღევანდელი მსოფლიო პოლიტიკური კრიზისის ერთადერთი გამოსავალი.
ლიბერალები უკვე დიდი ხანია არა რეალურ, არამედ ლამაზად შეფუთულ ყალბ პოლიტიკას სთავაზობენ ხალხს. პოლიტიკა კი მხოლოდ სიმართლეს უნდა ეფუძნებოდეს“, – განაცხადა დიმიტრი ხუნდაძემ.
მისი თქმით, “სწორედ სიმართლის თქმის პრინციპზე დაფუძნდა მოძრაობა “ხალხის ძალა”, რომლის მთავარი მიზანი ეროვნულ ღირებულებებზე დამყარებული, ევროპული კონსერვატორიზმის ჩამოყალიბებაა საქართველოში“.
“ჩვენ არ ვითვალისწინებთ მხოლოდ ერთი მხარის შეხედულებებს და მივყვებით თანამედროვე მსოფლიო პოლიტიკას, სადაც არ მოსწონთ ის “ლიბერალური ძალადობა”, რომელიც არა დემოკრატიის, არამედ, ავტოკრატიის გამოვლინებაა.
გლობალიზაციას მალე შეცვლის ეროვნულ-დემოკრატიულ ღირებულებებზე დაფუძნებული, თვითმყოფადი სახელმწიფოების ახალი იდეოლოგიური მიმართულება, სადაც გათვალისწინებული იქნება არა მხოლოდ დიდი სახელმწიფოების, არამედ, პატარა ერი-სახელმწიფოების ინტერესებიც. სწორედ ასეთ მსოფლიო თანამეგობრობაში ექნება საქართველოს ღირსეული ადგილი“, – განაცხადა ხუნდაძემ.
მსგავსი სტატიები:
“საჭიროა კრიზისის რაღაც ფორმით კუპირება და მისი საპარლამენტო ფორმატში გადატანა”
მოსახლეობა მამა ნაუმის მიწის მიტაცებაში ადანაშაულებს – “არ მაინტერესებს მოსახლეობა რას ამბობს”
სახელმწიფო დაცვის თადარიგის პოლკოვნიკის მიმართვა-“მეგობრებო, ნუ შეასრულებთ პუტინის რუსეთის მონა მთავრობის უკანონო დავალებებს”
ვოლსკი უკრაინაზე: საქართველოს მხრიდან “ყიყლიყოს” წამოძახებასავით განცხადებები, აუცილებელი არ არის
პატარა საბჭოთა მოღვაწეა… ეს არის რეპრესიები ჩემი პოლიტიკური პოზიციის გამო – გიორგი გაგოშიძე წულუკიანზე
“ალტ-ინფო“ რუსული პოლიტიკის ღია პროპაგანდააა… ხვალ რომ საქართველო რუსეთთან ომში ჩაებას, ვის მხარეს იბრძოლებთ?” – ხუნდაძე “ალტ-ინფოს”
უკრაინამ და რუსეთმა ომის დასრულების მიზნით ნეიტრალიტეტის გეგმა შეიმუშავეს – Financial Times
ქვემოჭალაში რუსული კოტეჯები შენდება | მოსახლეობა აქციებს აანონსებს