ბინა გუდაურში, მიწის ნაკვეთები, კომერციული ფართები-ვასილ მაღლაფერიძის ქონება

საზოგადოებრივი მაუწყებლის ყოფილი გენერალური დირექტორი ვასილ მაღლაფერიძე პარტია „ქართული ოცნების“ თავმჯდომარის მოადგილე გახდა. ამასთან, დღეს გამართულ ყრილობაზე ის პარტიის პოლიტიკური საბჭოს წევრადაც აირჩიეს. ცნობისთვის, მაღლაფერიძემ საზოგადოებრივი მაუწყებლის გენდირექტორის პოზიცია 2020 წლის ზაფხულში დატოვა. რაც შეეხება მის ფინანსურ მდგომარეობასა და ქონებას, 2020 წლის 30 მარტს შევსებული ქონებრივი დეკლარაციის თანახმად, მის საკუთრებაშია: 2007 წელს შეძენილი 45 კვ.მ ბინა გუდაურში, რაშიც 40 000 აშშ დოლარი გადაიხადა. ასევე, მის სახელზეა 2300 კვ.მ მიწის ნაკვეთი და 190 კვ.მ საცხოვრებელი სახლი გომბორში, რომლის ჯამური ღირებულება 2008 წელს 15 000 ლარს შეადგენდა. ვასილ მაღლაფერიძეს ეკუთვნის 1972 წელს მემკვიდრეობით გადაცემული 2018 კვ.მ მიწის ნაკვეთის 50%-იანი წილიც გომბორში. გარდა ამისა, მის საკუთრებაშია მსუბუქი ავტომანქანა TOYOTA RAV4, რომელშიც 2015 წელს 13000 აშშ დოლარი გადაიხადა. რაც შეეხება მისი ოჯახის წევრების ქონებას, ვასილ მაღლაფერიძის მეუღლის სახელზეა: 12,6 კვ.მ სარდაფი და 18 კვ.მ ავტოფარეხი თბილისში, რომელიც 2014 წელს 10 000 აშშ დოლარად არის შეძენილი. ასევე, თბილისში 300 კვ.მ მიწის ნაკვეთის 30%-იანი წილი, რომლის ჯამური ღირებულება 66 400 ლარია. ვასილ მაღლაფერიძის მეუღლეს 2017 წელს საჩუქრად გადაეცა 22 კვ.მ ბინა მესტიაში. მის საკუთრებაშია 2009 წელს 300 000 ლარად შეძენილი 714 კვ.მ კომერციული ფართის 33,3%-იანი წილიც თბილისში და 1400 კვ.მ მიწის ნაკვეთი გომბორში, რაშიც 5000 ლარი გადაიხადა. 2015 წელს კი შეიძინა 164 კვ.მ ბინა თბილისში, რომლის ღირებულება 125 000 აშშ დოლარია. დეკლარაციის შევსების მომენტში ვასილ მაღლაფერიძე საბანკო ანგარიშებზე ფლობდა: 1656,64 ლარს, 4160,94 ევროს და 133,49 აშშ დოლარს. ნაღდი ფულადი სახით კი – 10000 ლარს. დოკუმენტის მიხედვით, ვასილ მაღლაფერიძეს საქართველოს საზოგადოებრივი მაუწყებლის გენერალური დირექტორის პოსტზე, ხელფასის სახით 2019 წელს 52 800 ლარი აქვს აღებული.