ექსკლუზივი-ფილიმონ ქორიძისადმი მიძღვნილი ვოკალური მუსიკის საღამო - ქართველი ბანების კონცერტი
ავტორი: გურიის მოამბე
ექსკლუზივი-ფილიმონ ქორიძისადმი მიძღვნილი ვოკალური მუსიკის საღამო - ქართველი ბანების კონცერტი

პარასკევს, 23 ივნისს 19:00სთ-ზე თბილისის ვ. სარაჯიშვილის სახელობის სახელმწიფო კონსერვატორიის დიდ დარბაზში გამოჩენილი ქართველი ფოლკლორისტის, მომღერლის, ლოტბარისა და ქართული საოპერო ხელოვნების ერთ-ერთი ფუძემდებლის ფილიმონ ქორიძისადმი მიძღვნილი ვოკალური მუსიკის საღამო - ქართველი ბანების კონცერტი გაიმართება.

ამის შესახებ "გურიის მოამბეს" საღამოს ორგანიზატორმა, ილია ათანელიშვილმა აცნობა.

მისივე ცნობით, კონცერტში მონაწილეობენ: ლეგი იმედაშვილი, გია ასათიანი, გოჩა დათუსანი, ტარიელ ჭიჭინაძე და კონსერვატორიის სხვა წარმატებული კურსდამთავრებული ბანები, ასევე სამების ტაძრის საპატრიარქო გუნდი. კონცერტს გაუძღვება კონსერვატორიის საპატიო პროფესორი ელდარ გეწაძე.

"კონცერტის მიზანია ფილიმონ ქორიძის, არა მხოლოდ როგორც წმინდანის, არამედ როგორც პირველი ქართველი პროფესიონალი ბანის გაცნობა საზოგადოებისთვის"-გვითხრა ბატონმა ილიამ.

ფილიმონ ქორიძე (1835-1911წწ) ვოკალურ ხელოვნებას მილანში დაეუფლა, მღეროდა "ლა სკალაში". იტალიურმა პრესამ ის იტალიის საუკეთესო ბანად აღიარა. კონცერტებს მართავდა იტალიის ქალაქებში კორიჯიოს ფსევდონიმით.

იყო თბილისის ოპერისა და ბალეტის თეატრის სოლისტი. ქორიძე პირველი ქართველი მუსიკოსი იყო, ვინც ქართული მრავალხმიანობა ნოტებზე გადაიტანა. ქართული სახალხო გუნდების ორგანიზატორი და ლოტბარი. ეკლესიისა და სამშობლოს წინაშე გაწეული ღვაწლისა და თავდადებისათვის, საქართველოს ეკლესიის წმიდა სინოდმა, 2011 წლის 20 დეკემბერს ფილიმონ ქორიძე შერაცხა წმინდანთა დასში, წოდებით: წმიდა ფილიმონ მგალობელი, ერისათვის თავდადებული.

'.$TEXT['print'].'