რა კავშირია აქვს ფარცხალაძეს ქართულ-ებრაულ კომპანია Elbit-ის ერთობლივ ბიზნესპროექტთან ?
ავტორი: გურიის მოამბე
რა კავშირია აქვს ფარცხალაძეს ქართულ-ებრაულ კომპანია Elbit-ის ერთობლივ ბიზნესპროექტთან ?

„საპარტნიორო ფონდში“ აცხადებენ, რომ მათსა და ქართულ-ებრაულ კომპანია Elbit-ისერთობლივ ბიზნესპროექტთან - სამოქალაქო თვითმფინავების კომპოზიტური ნაწილების მწარმოებელ ქარხანასთან (ATC) ყოფილ მთავარ პროკურორ ოთარ ფარცხალაძეს შეხება არასდროს ჰქონია.

 

როგორც „ინტერპრესნიუსს“ ფონდის იურიდიული დეპარტამენტის უფროსის მოადგილემ და ATC-ის სამეთვალყურეო საბჭოს წევრმა რეზო ტყავაძემ განუცხადა, ფარცხალაძის ადვოკატის მიერ დღეს გაჟღერებული ინფორმაცია აბსოლუტურად მცდარია.

 

„ამ ინფორმაციას არ ვადასტურებთ. ეს ინფორმაცია იყო აბსოლუტურად მცდარი და გადაუმოწმებელი, რადგან ბატონ ოთარ ფარცხალაძეს არასდროს მიუღია ანაზღაურება თუ გასამრჯელო ჩვენი ერთობლივი საწარმოსგან. იგი არც თანამშრომელია, არც კონსულტანტი, მასთან არანაირი სამართლებრივი ურთიერთობა არ გვაკავშირებს“, - აღნიშნა ტყავაძემ.

 

ადვოკატის ინფორმაციით, ოთარ ფარცხალაძე 5 წელია, რაც ბიზნესშია და მისი შემოსავლის მთავარი წყარო ქართულ-ებრაული კომპანია Elbit-ის ბიზნესპროექტია. ყოფილი მთავარი პროკურორის ბიზნესსაქმიანობაზე მისმა ადვოკატმა გაგი მოსიაშვილმა ისაუბრა. ადვოკატის თქმით, Elbit-ის პროექტი ოთარ ფარცხალაძისთვის ერთ-ერთი საამაყოა.

 

„არის ერთ-ერთი კომპანია Elbit-ი, რომელიც უშვებს ბოინგის დეტალებს. ამ პროექტით ოთარ ფარცხალაძე ამაყობს. ეს კომპანია არის ქართულ-ებრაული და საკმაოდ წარმატებულია. ეს არის ერთ-ერთი ის პროექტი, რომელიც შეიძლება ჩაითვალოს წარმატებულად. ეს არის მისი ძირითადი ბიზნესი“, - განაცხადა გაგი მოსიაშვილმა.

 

თუმცა, აქვე აღსანიშნავია, რომ თვითმფრინავის ნაწილების წარმოება ისრაელის კომპანია Elbit Cyclone-ს ჯერ არ დაუწყია. სამოქალაქო თვითმფრინავების კომპოზიტური ნაწილების მწარმოებელი ქარხნის მშენებლობა მაისში დასრულდა. პროექტი „საპარტნიორო ფონდის“ თანადაფინანსებით განხორციელდა. ასევე აღსანიშნავია, რომ სამოქალაქო თვითმფინავების კომპოზიტური ნაწილების მწარმოებელი ქარხანა (ATC) პირველ პროდუქციას 2019 წლის დასაწყისში გამოუშვებს, მას შემდეგ, რაც სერტიფიცირებას გაივლის.

'.$TEXT['print'].'