პანდემიის დროს ნაშოვნი მილიონები - ბრიტანელი ექსპერტების საგანგაშო კვლევა საქართველოზე
ავტორი: გურიის მოამბე
პანდემიის დროს ნაშოვნი მილიონები - ბრიტანელი ექსპერტების საგანგაშო კვლევა საქართველოზე

კორუფცია კორონავირუსის დროს საქართველოში - გამომძიებლების ავტორიტეტული ჯგუფი, Bellingcat იმ საეჭვო სახელმწიფო შესყიდვებზე წერს, რომელიც პანდემიის პირობებში საქართველოს მთავრობასა და იმ კომპანიებს შორის განხორციელდა, რომელთა მესაკუთრეები ქართული ოცნების შემომწირველები არიან.

Bellingcat-ის გამოძიება ორი მიმართულებით დაინტერესდა - ჯანდაცვის სექტორის შესყიდვებით და საკარანტინე ზონად გამოყენებული სასტუმროებით.

Bellingcat-ის სტატიაში საუბარია შპს Ad Media-სთან გაფორმებულ ხელშეკრულებაზე. კომპანიას 40 000 ცალი სამსაფენიანი პირბადე უნდა მიეწოდებინა.

Ad Media-ს აქციების 75%-ს სერგო გალუსტიანი ფლობს. გალუსტიანმა "ქართულ ოცნებას" და სალომე ზურაბიშვილს საარჩევნო კამპანიის განმავლობაში 100 000 ლარი შესწირა.

სერგო გალუსტიანი ფლობს კომპანია შპს რესპირატორსაც. კომპანია მან 2020 წლის 15 აპრილს, სწორედ პანდემიის დროს დაარეგისტრირა და მეორე დღესვე, 16 აპრილს, ახლადშექმნილმა კომპანიამ 4 მილიონი პირბადის დამზადების შეკვეთა ივანიშვილის ფონდ "ქართუსგან" მიიღო.

Bellingcat-მა ასევე აღმოაჩინა, რომ ჯამში 17 გამარტივებული შესყიდვა გაფორმდა შპს Doctor Goods-თან, ჯამში 2 160 613 ლარის ღირებულების.

Doctor Goods-ს წილების 49.3% 2020 წლის 28 მაისამდე შპს Startup Georgia-ს ეკუთვნოდა, რომელსაც თავის მხრივ საპარტნიორო ფონდი ფლობს. ფონდის აღმასრულებელი დირექტორი კი "ქართული ოცნების" ყოფილი დეპუტატი დავით საგანელიძეა.

"როგორც ჩანს, გამარტივებული შესყიდვებით გაზრდილია რისკი, რომ სახელმწიფო ბიუჯეტის სახსრები კონცენტრირდება ხელისუფლების წარმომადგენლების შვილობილ კომპანიებსა და ადამიანებზე, რომლებმაც არჩევნებში თანხა მმართველ პარტიას შესწირეს" - წერს Bellingcat თავის გამოძიებაში.

საკარანტინე სივრცეები

Inn ჯგუფმა, რომელიც Iveria Inn-ს, Gudauri Inn-ს, Bakuriani Inn-ს და Royal Inn-ს ფლობს, 13 მარტს ხელი მოაწერა შეთანხმებას მთავრობასთან, რომლის მიხედვითაც საკარანტინე ოთახები გამოიყო.

Inn ჯგუფის ერთ-ერთი მთავარი პარტნიორი პაატა კოკაიაა. კოკაიამ სალომე ზურაბიშვილს 2018 წელს 55 000 ლარი შესწირა.

მმართველი პარტიის შემომწირველები არიან "ყვარლის ედემი" ხელმძღვანელებიც, სადაც ასევე საკარანტინე სივრცეები იყო მოწყობილი.

Bellingcat წერს, რომ როგორც გამოძიებიდან ჩანს, გამარჯვებული კომპანიების დიდი ნაწილი უშუალოდ კორონავირუსის პანდემიის დროსაა შექმნილი, მათი მფლობელები "ოცნების" ფინანსური მხარდამჭერები არიან და გაუმჭვირვალეა შერჩევისა და გადაცემის პროცესი, რაც კორუფციის საფრთხეს ზრდის

Bellingcat საერთაშორისო დამოუკიდებელი გამომძიებლების ავტორიტეტული ჯგუფია, რომელსაც მსოფლიოს 20-ზე მეტ ქვეყანაში ჰყავს თანამშრომლები.

ოპოზიციაში ამბობენ, რომ ქართულმა ოცნებამ პანდემიით ისარგებლა და "ფული გააკეთა", ხოლო არც ოპოზიციას და არც საერთაშორისო ექსპერტების კვლევას არ იზიარებს თეა წულუკიანი, რომელიც ამბობს, რომ ხელისუფლება კორონაპანდემიის დროს ეფექტური იყო:

მე ის ვიცი, რომ საქართველო და მისი ხელისუფლება და ხალხი არის დღესაც მაგალითი მსოფლიოში, ჩვენ ვიმოქმედეთ სწრაფად და ეფექტურად, დანარჩენი უბრალოდ ბელეტრისტიკაა - ამბობს წულუკიანი

'.$TEXT['print'].'