ირაკლი ღლონტი მანუჩარ კვირკველიას შტაბს ხელმძღვანელობს

პარტია „კანონი და სამართლის“ ყოფილი ლიდერი ირაკლი ღლონტი ამ ეტაპზე არცერთ ოპოზიციურ პარტიაში გაწევრიანებას არ აპირებს. როგორც ღლონტმა „პრაიმტაიმნუისთან საუბრისას განაცხადა, მას გაერთიანებული ოპოზიციიდან სიაში ჩასმის თაობაზე შემოთავაზებაც ჰქონდა, თუმცა აღნიშნულ წინადადებას არ დასთანხმდა.

„ჯერჯერობით, არცერთ პარტიაში ვფიქრობ გაწევრიანებას. არ არის აუცილებელი, რომ რომელიმე პარტიის წარმომადგენელი ვიყო, რათა ვიბრძოლო, როგორც აქტიურმა ოპოზიციონერმა.

იყო „ძალა ერთობაშიდან“ შემოთავაზება, რომ საარჩევნო სიაში ოცეულთან ახლოს მდგომი ადგილი დამეკავებინა, აღნიშნულზე გარკვეული მიზეზების გამო, უარი განვაცხადე. საზოგადოებას კიდევ ერთხელ დავანახე ჩემი დამოკიდებულება, რომ მე არ ვარ ხარბი კაცი, ჩემთვის მთავარია ცვლილებები და არა აუცილებლად პარლამენტის მანდატის ტარება“,- განაცხადა ღლონტმა.

როგორც პოლიტიკოსმა აღნიშნა, ის მხარს უჭერს „ძალა ერთობაშიას“ მაჟორიტარობის კანდიდატს, მანუჩარ კვირკველიას,  რომლის საარჩევნო შტაბს თავადვე ხელმძღვანელობს.

„აქტიურად ვარ ჩართული ოლიმპიური ჩემპიონის, ჩემი ახლო მეგობრის,  გურიაში გაერთიანებული ოპოზიციის კანდიდატის მანუჩარ კვირკველიას შტაბში და საარჩევნო კამპანიაში, ვარ შტაბის ერთ-ერთი ხელმძღვანელი. მანუჩართან ერთად ვცდილობთ, რომ დავარწმუნოთ ჩვენი გურული მოქალაქეები, რომ ცვლილებების დრო ნამდვილად დადგა და ყველაზე საუკეთესო კანდიდატს ჩემპიონს საქმეში და სპორტშიც მანუჩარ კვირკველიას ერგოს გურული ხალხის საპარლამენტო მანდატი. მასთან ერთად ვიბრძვი, რომ გურიაში დასრულდეს სიღარიბე და მანდატი ატაროს კაცმა, რომელიც ცხოვრებაში არასდროს დამარცხებულა“,- განაცხადა ღლონტმა.

ინფორმაციისთვის, “კანონისა და სამართლია” ლიდერმა ირაკლი ღლონტმა პარტია ერთ თვეზე მეტია, რაც დატოვა.

გააზიარეთ და მოიწონეთ სტატია:
Pin Share