სამსახურის დატოვების მოთხოვნით, ასეულობით პატაკი დევს, რომელსაც არ უკმაყოფილებენ – მელია შსს-დან პოლიციელების წასვლაზე

უსამშობლო ოლიგარქმა ისეთი რეჟიმი დაამყარა, რომ აქ გაჩერება შეუძლებელი გახდა მათთვისაც, ვისთვისაც ძვირფასია სამშობლო – ენმ-ს თავმჯდომარე ნიკა მელია შსს-დან პოლიციელების წასვლის შესახებ გავრცელებულ ინფორმაციებს ეხმაურება.

უპერსპექტივობა, უიმედობა და უკანონო ბრძანებების შესრულება – ეს ის მიზეზებია, რის გამოც, ნიკა მელიას თქმით, შსს-ს გამოცდილი კადრები ტოვებენ და საზღვარგარეთ მიდიან.

მისი თქმით, გაუსაძლისია პოლიციელების მდგომარეობა, მინიმალური და “დამამცირებელია” მათი ხელფასი და არ აღემატება 1 600 ლარს მაშინ, როცა მათი მინისტრი გომელაური ძვირფასი სახლებითა და აგარაკებით იწონებს თავს და ოჯახის წევრის ქორწილისთვის, მხოლოდ ტორტში 5 ათას ლარს იხდის.~

მელიას თქმით, ხელისუფლების ცვლილების შემდეგ მოსული ძალა ყველაფერს გააკეთებს, რათა პოლიციელები ებრძოდნენ დამნაშავეებს და არა კვლავ ხელისუფლების ოპონენტებს.

“უსამშობლო ოლიგარქმა ისეთი რეჟიმი დაამყარა ამ ქვეყანაში, რომ აქ გაჩერება გაუსაძლისი გახდა იმ ასი ათასობით მოქალაქისთვისაც კი, ვისთვისაც ძვირფასია სამშობლო.
ამიტომაც გარბის ხალხი ამ ქვეყნიდან! საკუთარ სამშობლოში დევნილად და გარიყულად ყოფნას, საკუთარ ქვეყანაში ემიგრაციას, უცხო ქვეყანაში ცხოვრება ურჩევნიათ!
დიახ, ამ ქვეყანას მხოლოდ ასი ათასობით უმუშევარი, სამუშაოს მაძიებელი კი არ ტოვებს, ამ ქვეყანას ტოვებს ათასობით პოლიციელი – შსს-ს სიტემაში დასაქმებული პატრიოტი პოლიციელები.
სამართალდამცავი სტრუქტურებიდან კადრების გადინება რომ მასიურია, ამას შსს-ს მიერ მხოლოდ აგვისტოში გამოცხადებული ვაკანსიაც ცხადყოფს -და მხოლოდ საპატრულო პოლიციის დეპარტამენტში 145 ვაკანსიის დასაკავებლად შსს-მ კონკურსი გამოაცხადა. ასეთი მასშტაბური ვაკანსია ამ პოლიციას არ ახსოვს!
უწყებაში სამსახურის დატოვების მოთხოვნით ასეულობით პატაკი დევს, რომელსაც არ უკმაყოფილებენ, მაგრამ ბევრი ისე გარბის, აღარც ეკითხებიან. გარბიან და მექსიკის გავლით ამერიკაში ჩასულები საუწყებლად რეკავენ რომ წავიდნენ უწყებიდან.
გარბიან იმიტომ რომ ეს ხელისუფლება გასაჩერებელ ადგილს არ უტოვებს ამ ქვეყანაში პატრიოტ ადამიანებს.
ქვეყანაში იმხელა უპერსპექტივობაა, იმხელა უიმედობა და მათგან იმდენი უკანონო ბრძანების შესრულებას ითხოვენ, რომ ამ უსამსახურო ქვეყანაში, თავისით ტოვებენ სამსახურს, ნაწილი ქვეყანას ტოვებს და ნაწილი სხვა სამსახურს ეძებს.
ტოვებენ იმიტომ რომ:
– ამ ქვეყანაში ვერ ხედავენ განვითარების, ცხოვრების პერსპექტივას! საკუთარი ოჯახების და შვილების მომავალს!
– არ სურთ რუსი ოლიგარქის პირად დაცვაში სამსახური.
– არ სურთ რომ რუსული ოცნება მათი ხელით ახდეს ამ ქვეყანაში!
– არ სურთ იცავდნენ რუსებს და მათ იმპერიალისტურ გამოხდომებს ქართველებისგან!
– არ სურთ საქართველოს დამოუკიდებლობის არმცნობი კრემლის პროპაგანდისტი ჟურნალისტის – პოზნერის ღომის წელვის დაცვა და აღშფოთებული ქართველი ახალგაზრდების დაჭერა!
_არ სურთ უსამშობლო კადიროვისა და სერგეი ლავროვის ახლო მეგობრის, ოკუპაციის კანონის არაერთხელ დამრღვევი (კადიროგელი )ლევ ძენგოვის უსაფრთხოებას იცავდნენ თბილისურ რესტორნებში დროსტარებისას.
– არ სურთ იყვნენ უკანონო მოქმედებებისა და დანაშაულებრივი უმოქმედობის თანამონაწილები.
ამ ქვეყანაში ოლიგარქმა და მისმა დაცვის ყოფილმა უფროსმა გომელაურმა შექმნეს სისტემა, რეჟიმი, რომელიც აგებულია სწორედ ამ ქვაკუთხედზე – უკანონო მოქმედება და დანაშაულებრივი უმოქმედობა. ეროვნული თავმოყვარეობის დაკნინება და ოკუპანტის მაამებლობა.
გაიხსენეთ რას აკეთებს ივანიშვილისა და გომელაურის პოლიცია, როდესაც ქვეყანაში თავისუფლად გადაადგილდებიან შეიარაღებული კრიმინალები?
როცა თბილისის უბნებს უკვე ეგრეთ წოდებული საძმოები აკონტროლებენ? არაფერს!
ივანიშვილის და გომელაურის პოლიცია უმოქმედოდაა, როცა დღისით , ქალაქის ცენტრში შავბნელი ძალები ფიზიკურად უსწორდებიან ჟურნალისტებს, რასაც ეწირება ლექსო ლაშქარავას სიცოცხლე. ამ რუსული პოგრომების ორგანიზატორები დაუსჯელები არიან, მეტიც ისინი სახელისუფლებო დაფინანსებით საზრდოობენ.
ივანიშვილის და გომელაურის პოლიცია უმოქმედოდაა, მეტიც ხელს უწყობს მუხთარლის გატაცებას!
ივანიშვილისა და გომელაურის პოლიცია უმოქმედოდაა, როდესაც ყოფილი ქმარი უკვე სისტემურად კლავს ქალს!
სამაგიეროდ ივანიშვილის ძალოვანი უწყებები მყისიერად მოქმედებენ, როდესაც პოლიტიკური ოპონენტის დევნა და თვალთვალია საჭირო, როდესაც ანტიპუტინისტური წარწერის წაშლაა საჭირო, როდესაც რუსი ოლიგარქის დაცვაა საჭირო.
პატრიოტი პოლიციელები ქვეყნიდან გარბიან! იზრდება საფრთხე და მცირდება მათი რაოდენობა ვინც საფრთხის შემთხვევაში შეიძლება დაგვიცვას.
ვინც უნდა გვიცავდეს, თავს ვერ იცავს და გარბის ქვეყნიდან!
ვინც უნდა გვიცავდეს, თავს ვერ ინახავს ამ ქვეყანაში და გარბის ამ ქვეყნიდან.
დიახ, ბატონებო, პოლიციელთა ხელფასები სასაცილო და დამამცირებელია!
მათი ხელფასი 1 600 ლარს არ აღემატება, მაშინ როცა მათი მინისტრი, ივანიშვილის პირადი მცველი გომელაური მდიდრული სახლებით და აგარაკებით იწონებს თავს, თავის ოჯახის წევრს რამდენიმე ასეულ ათას ლარად ქორწილს უხდის, სადაც 1 ტორტში 5 ათას ლარს იხდის!
ერთი სიტყვით, თავის ოჯახის წევრებს მარწყვის პირამიდებს უშენებენ ტორტად, სხვის შვილებს კი უშენებენ ქვეყანას, სადაც ცხოვრება აუტანელი, გაუსაძლისი და სახიფათოა!
ჩვენი და ჩვენი შვილების უსაფრთხოება ივანიშვილმა ჩააბარა თავის დაცვის უფროსს, რომელიც ისევ და ისევ მას იცავს მხოლოდ და არა სასოგადოებას.
მას არც პროფესიონალიზმი აწუხებს და არც სინდისი. დგას და ტელეკემერების წინ უტიფრად თავს იწონებს, 2 წელია ბანკის მძარცველი ესებუა ვერ უპოვია, არც რცხვენია ,პირიქით, ამ საკითხზე როცა კითხვას უსვამენ – საზოგადოებას დაგვცინის.
კორუმპირებული გომელაური დგას და კამერების წინ ლაპარაკობს ადამიანზე, ვინც ემუქრება ჩანაწერების გამოქვეყნებით, დგას და სახეწაშლილი და ნირწამხდარი წინასწარ უარყოფს ჯერაც გამოუქვეყნებელ ჩანაწერებს.
უტიფრად გველაპარაკება იმაზე, თუ როგორ აუწყო დაუმსახურებლად კარიერა თავის ყოფილ მეგობარს. სამაგიეროდ ცოცხალი თავით არ ყვება, თუ რატომ გაუშვა სამსახურიდან მისივე შეფასებით – დაუმსახურებლად აღზევებული არაფრისქმონე პირი.
რუსულ ოცნებაში ერთადერთი დამსახურება, რითიც კარიერის გაკეთება შეიძლება, საკუთარი ხალხის ინტერესების უგულებელყოფა და რუსი ოლიგარქის უპირობო მსახურებაა.
ასეთია რუსული ოცნება, ასეთია რუსული სისტემა, ასეთია რუსული სამართალი- უსამართლობა და ძალადობა არის რუსული წესი!
ქართველ ხალხს უნდა პროგრესი, კეთილდღეობა, თავისუფლება, უსაფრთხოება – ანუ ის რაც დასავლეთშია თავმოყრილი.
რუსულ ოცნებას უნდა თავისი დავალების შესრულება, მაგრამ ჩვენ არ ვიცხოვრებთ რუსული წესებით, არ შევეგუებით რუსეთის თარეშს საქართველოში, არ შევეგუებით უკუსვლას, ვივლით წინ ევროპისკენ და ყველა სახელმწიფო უწყების პატრიოტი საჯარო მოხელის თუ სამართალდამცავი უწყების თანამშრომლის გვერდში დგომის იმედი გვექნება ამ გზაზე, გზაზე რომელიც მათ შინ ევროპაში დააბრუნებს და ვინც არ წასულა, წასვლას გადააფიქრებინებს – ამ ქვეყანაში ცხოვრების და სახელმწიფოს მსახურების სურვილსა და მოტივაციას დაუბრუნებს, სიამაყის გრძნობას დაუბრუნებს, რომ ემსახურება სამშობლოს!
ამ ხელისუფლების ცვლილების შემდეგ მოსული ძალა ყველაფერს გააკეთებს, რომ პოლიციელები ებრძოდნენ დამნაშავეებს და არა კვლავ ხელისუფლების ოპონენტებს, იცავდნენ საკუთარი ქვეყნის მოქალაქეებს და არა ვინმე ერთ „მოქალაქეს“, როგორც დღესაა” – აღნიშნა მელიამ.