პროტესტი სპექტაკლის წინ, სპექტაკლისას, სპექტაკლის შემდეგ

„დღეს ჩვენი ქვეყანა დიდი გამოწვევის წინაშე დგას. წინ დიდი ბრძოლა გველის, ასე რომ, არ შევეგუოთ. არა რუსულ კანონს!“, – ამ სიტყვებით დაასრულეს სპექტაკლი „თეატრი სახელოსნო 42“-ის მსახიობებმა 18 აპრილს. „გამოვაკლდით ამ აქციებს, მაგრამ ჩვენი გულები იყო იმ ხალხთან ერთად“, – თქვა რეჟისორმა ლევან წულაძემ.

უფრო ადრე ვასო აბაშიძის სახელობის ახალი თეატრის სცენაზე სამხატვრო ხელმძღვანელმა დავით დოიაშვილმა მსახიობებთან ერთად დარბაზს მიმართა და „ქართული ოცნების“ მიერ ინიციირებული „აგენტების კანონი“ გააპროტესტა.

„რაც ჩვენი ქვეყნისთვის არ ვარგა, არც ჩვენ გვინდა“, – უთხრა მსახიობმა შორენა გვეტაძემ რადიო თავისუფლებას. ის ოზურგეთის თეატრის მსახიობია, ამ თეატრმაც სპექტაკლი საპროტესტო გამოსვლით დაასრულა.

სცენიდან კანონი გააპროტესტა სამეფო უბნის თეატრის რეჟისორმა დათა თავაძემაც.

„ყველაფერი უნდა გავაკეთოთ იმისთვის, რომ ეს კანონი არ გავიდეს. კიდევ ერთხელ უნდა გავაკეთოთ ის, რაც გავაკეთეთ შარშან. ამაში დარწმუნებული ვარ და ჩვენი ერთიანობის იმედი მაქვს“, – თქვა მან.

17 აპრილს ქუთაისის ლადო მესხიშვილის სახელობის თეატრის სცენაზე გამოვიდა რეჟისორი ნინო მაღლაკელიძე, ისიც ე.წ. რუსულ კანონს აპროტესტებს.

„არცერთ პარტიას არ ვემხრობი. ეს ჩემი სურვილია, საქართველო ევროკავშირში შევიდეს. 17 აპრილს ჩემი სპექტაკლი იყო „ფეისბუკის ქვეყანა“. მადლობის გადასახდელად რომ გამოვედი, ხელები ავწიე, ხელისგულებზე ევროკავშირის დროშა მეხატა, – ამბობს ნინო მაღლაკელიძე, – ჩემი პოზიციის გამო პრობლემა არ შემქმნია, ვფიქრობ, სხვებიც ბევრნი იქნებიან ამ აზრზე“.

თამრი ოხიკიანი სცენოგრაფია, სხვადასხვა თეატრთან თანამშრომლობს. მას შემდეგ, რაც პარლამენტმა ე.წ. რუსული კანონი დააინიცირა, აქციებზე დგას.

„ეს ჩვენი ქვეყნისთვის კატასტროფაა. იმ თეატრებში, რომლებიც სახელმწიფოსგან ფინანსდება, მსახიობები თვითცენზურის ქვეშ არიან. ძალიან ბევრს ჰგონია, რომ გააგდებენ, – ამბობს თამრი, – ახლა, როცა რუსეთიდან ასეთი წნეხია, ჩვენ ნეიტრალურ პოზიციაზე ვერ ვიქნებით. რა თქმა უნდა, ევროპის გზა უნდა ავირჩიოთ“.

ხელოვნებათმცოდნე ლელა ოჩიაური ამბობს, რომ ქართველი ხელოვანები ყოველთვის იდგნენ, ან ცდილობდნენ მაინც, დამდგარიყვნენ საზოგადოებისა და თავისუფალი აზრის მხარეს. თეატრი სწორედ ამისთვის შეიქმნა.

„ნურავინ იტყვის, ნურავინ დააბრალებს, რომ თავისუფალი სიტყვა მხოლოდ სპექტაკლებიდან ისმოდა. თავისუფალი სიტყვა ისმოდა სპექტაკლის წინ, სპექტაკლისას, სპექტაკლის შემდეგ, გადადიოდა ქუჩაში და ამის უამრავი შემთხვევა ახსოვს მსოფლიო თეატრსაც. ამ კანონმა შეიძლება არა მხოლოდ ჩიხში შეგვიყვანოს, არამედ საერთოდ გადაგვჩეხოს. როდესაც საფრთხე შენი შვილის მომავალს ექმნება, ყველაფერზე შეიძლება უარი თქვა, ეს კანონი კი ისეთ წუმპეში გვითრევს, რომლიდანაც 30 წლის წინ ძლივს ამოვედით. დავიღუპებით“, – ამბობს ლელა ოჩიაური.

„ქართული ოცნება” „უცხოური გავლენის გამჭვირვალობის კანონპროექტის” მიზნად ასახელებს უცხოეთიდან დაფინანსებული არასამთავრობო ორგანიზაციების და მედიასაშუალებების გამჭვირვალობას და სახელმწიფო სუვერენიტეტის დაცვას.

სამოქალაქო საზოგადოების დიდი ნაწილი და ოპოზიციური პარტიები კანონს რუსულს ეძახიან და მიიჩნევენ, რომ მმართველი პარტიის მიზანი დემოკრატიის განვითარებაზე მომუშავე ორგანიზაციების შეზღუდვა და ევროკავშირში გაწევრების პროცესის დაბლოკვაა.

კანონი პირველი მოსმენით უკვე დაამტკიცეს.

რადიო თავისუფლება