LED ნათურების შესასყიდად მერიის დაქვემდებარებაში არსებულმა “თბილსერვის ჯგუფმა” 3 ტენდერი უკვე გამოაცხადა.
33.5 მლნ ლარის, 32.7 მლნ ლარის და 34.5 მლნ ლარის ღირებულების ტენდერებით ჯამში 100,000 LED განათების შეძენა არის დაგეგმილი. თბილისის მთავრობის 28 აპრილის განკარგულების თანახმად, თბილისის მერიამ “თბილსერვის ჯგუფს” შესყიდული LED სანათების ფასი 10 წლის განმავლობაში “ეტაპობრივი გადახდით” უნდა აუნაზღაუროს. ამასთან, ამ ხარჯის დაფინანსების წყაროდ მითითებულია ელექტროენერგიის შესყიდვის დროს მიღებული მილიონობით ლარის ეკონომია, რადგან ახალმა LED ნათურებმა სოდიუმზე მომუშავე გარე განათებები უნდა ჩაანაცვლოს, რომლებიც რამდენჯერმე უფრო მეტ ელექტროენერგიას მოიხმარენ – შესაბამისად მათი შენახვა დედაქალაქის გადასახადის გადამხდელებს უფრო ძვირი უჯდებათ.
თავად სატენდერო განაცხადშიც ნათქვამია, რომ “თბილსერვის ჯგუფი” ამ LED ნათურების ღირებულებას 120 თვის ვადაში, ანუ 10 წელში აანაზღაურებს. ამასთან, მწარმოებელთან ანგარიშსწორების ხელშეკრულება უცხოურ ვალუტაში უნდა დაიდოს, მაგრამ მას ფიქსირებული კურსი ექნება.
“გამარჯვებულ პრეტენდენტთან ხელშეკრულება გაფორმდება უცხოურ ვალუტაში (აშშ დოლარი ან ევრო), შემსყიდველის მიერ სისტემაში ატვირთული წერილობითი მოთხოვნით, პრეტენდენტის მიერ წარმოდგენილი წინადადების მიღების დასრულების დღეს ეროვნული ბანკის მიერ დაფიქსირებული ოფიციალური გაცვლითი კურსის შესაბამისად დაკორექტირებული ფასების ცხრილის (აშშ დოლარში ან ევროში) მიხედვით,”- ნათქვამია დოკუმენტში.
საკითხთან დაკავშირებით განცხადებას ავრცელებს თავად თბილისის მერიაც. რომელიც აცხადებს, რომ გარე განათების სისტემა ელექტროენერგიაზე ყოველწლიურად 22 მლნ ლარს ხარჯავს.
“დედაქალაქის გარე განათების განახლებისთვის, “თბილსერვის ჯგუფის” მიერ ჩატარებული კვლევის საფუძველზე, საჭიროა 11 კატეგორიის 100 000 LED სანათის შესყიდვა. აღნიშნული სანათების ჯამური ღირებულებაა 100 781 200 ლარი.
დღესდღეობით, თბილისის მუნიციპალიტეტი გარე განათების მიმართულებით ყოველწლიურად ხარჯავს დაახლოებით 22 000 000 ლარს, აქედან ელექტროენერგიის ხარჯი არის 13 500 000 ლარი, ხოლო ექსპლუატაციის ხარჯი 8 500 000 ლარი.
აღსანიშნავია, რომ სოდიუმის არსებული ნათურები, რომელიც მოძველებულია, ფაქტობრივად, არსად გამოყენება მისი არაეკონომიურობისა და მომწამლავი ნახშირორჟანგის (CO2) გამოყოფის გამო. აქედან გამომდინარე, გადაწყდა, რომ ისინი ჩანაცვლდეს ეკონომიური და უსაფრთხო ნათურებით.
აღნიშნული პროექტი იმდენად ეკონომიურია, რომ ელექტროენერგიის და მომსახურების დანაზოგის სახით, დედაქალაქს, წლის განმავლობაში, 10 მლნ ლარით შეუმცირდება ხარჯები. სწორედ ამ დაზოგილი თანხით იგეგმება აღნიშნული პროექტის განხორციელება. თბილისის მუნიციპალიტეტს დამატებით არცერთი თეთრის გაღება არ მოუწევს. მიღებული ეკონომიის ხარჯზე, 10 წლის განმავლობაში, ეტაპობრივად დაიფარება პროექტის ღირებულება.
აღსანიშნავია, რომ პროექტი ფაქტობრივად წაუგებელია დედაქალაქისათვის, რადგან ამ პროექტის დასრულების შედეგად, დამატებითი თანხის მობილიზების გარეშე, ჩვენი დედაქალაქი მიიღებს მრავალმილიონიან ხარჯვით დანაზოგს, ასევე, სახელმწიფო მიიღებს გამოთავისუფლებულ 8 მგ/სთ ელექტროენერგიის სიმძლავრეს, ეკოლოგიურად უფრო სუფთა ქალაქს და ევროსტანდარტების შესაბამის განათებას თბილისში,”- ნათქვამია მერიის განცხადებაში.
მსგავსი სტატიები:
ივანიშვილის მოღვაწეობა იყო პოლიტიკური ქველმოქმედების 8-წლიანი აქტი- ნაცვლიშვილი
“ავანტიურისტი შულერი, “ოცნების მზე”, რომელმაც ყველა გადააგდო”- გიორგი თარგამაძე ივანიშვილზე
“ივანიშვილის მმართველობის 8 წლიან ეპოქაში ბიუჯეტიდან 100 მილიარდზე მეტი დაიხარჯა”
“გელათში კვლავ კატასტროფაა, ქარმა დროებითი სახურავი ახადა და წყალი და თოვლი ჩადის… ”
ჯო ბაიდენმა პირველ სამუშაო დღეს 15 ბრძანებას მოაწერა ხელი
გერმანიში სეზონურ სამუშაოზე, საქართველოს 5 000 მოქალაქე დასაქმდება
შევიტყვე ხმების შესახებ, თითქოს გახარიას პარტია ჩემი “პროექტია” – ივანიშვილი
ალბათ, “პუფის” საყიდლად წავიდა, რომ გვერდით “თავიანთ თავს მიუდგან”-ღუდუშაური ენმ-ზე