რა მოყვა ზელენსკიმ ტრამპის ადმინისტრაციასთან ურთიერთობაზე The Times-თან ინტერვიუში?

უკრაინის პრეზიდენტმა ვოლოდიმირ ზელენსკიმ გამოცემა The Times-თან ინტერვიუში აშშ-ს ტრამპის ადმინისტრაციასთან ურთიერთობისა და თეთრი სახლის ოვალურ კაბინეტში 28 თებერვალს მომხდარი მწვავე კამათის აქამდე უცნობ და სხვა დეტალებზე ისაუბრა.

მიუხედავად იმისა, რომ, როგორც The Times-ის კორესპონდენტი წერს, ინტერვიუს დასაწყისში უკრაინის პრეზიდენტი ცდილობდა, თავი აერიდებინა 28 თებერვლის ინციდენტზე დასმულ შეკითხვებზე პასუხის გაცემას (“მოდი, დავუტოვოთ ეს ისტორიას”), “მისი ინსტინქტები იშვიათად აძლევს მას საშუალებას, იყოს ჩუმად იმ საკითხების შესახებ, რომლებიც მას აწუხებს” – წერს კორესპონდენტი.

ზელენსკის თქმით, თეთრ სახლში დაგეგმილ შეხვედრამდე მას ყველაფერი დაგეგმილი ჰქონდა, თუმცა ვინაიდან აშშ-ს ახალ პრეზიდენტ ტრამპს ოვალურ კაბინეტში პირველად ხვდებოდა, შთაბეჭდილების დატოვება სურდა. ამ შთაბეჭდილების მოსახდენად ზელენსკიმ ტრამპისთვის საჩუქრების გადაცემა გადაწყვიტა. უკრაინის პრეზიდენტის თქმით, მისი მიზანი ნებისმიერი ცუდი განწყობის გაქარწყლება იყო, რაც ტრამპს უკრაინის მიმართ შეიძლებოდა ჰქონოდა და ამასთან, გაფანტვა იმისა, რასაც ზელენსკი თვლიდა, რომ რუსული პროპაგანდის გავლენა იყო თეთრ სახლში.

ზელენსკიმ 28 თებერვალს თეთრ სახლში უკრაინელი მოკრივისა და მისი მეგობრის, ოლექსანდრ უსიკის ჩემპიონის ქამარი მიიტანა. როგორც The Times-ის კორესპონდენტი პრეზიდენტის მონაყოლზე დაყრდნობით წერს, ზელენსკიმ უსიკის ქამარი ოვალურ კაბინეტში მასთან ახლოს მდგარ მცირე ზომის მაგიდაზე დადო. ტრამპისთვის ქამრის გადაცემას ჟურნალისტების წინ პირდაპირ ეთერში გასვლის შემდეგ აპირებდა. ამის ნაცვლად, ეთერში გასვლამდე ზელენსკიმ გადაწყვიტა, აშშ-ს პრეზიდენტისთვის თავდაპირველად სხვა საჩუქარი გადაეცა. აღნიშნული სხვა საჩუქარი საქაღალდე იყო, რომელშიც უკრაინელი ომის პატიმრების რუსეთის ტყვეობიდან გამოხსნის შემდგომ გადაღებული შემზარავი ფოტოსურათები იყო შეტანილი. ფოტოსურათებში აღბეჭდილი უკრაინელი ჯარისკაცები შემზარავად დასუსტებულები იყვნენ და ზოგს წამების კვალიც ეტყობოდა.

“საშინელი რამაა” – თქვა ტრამპმა ფოტოსურათების ნახვისას და როგორც გამოცემის კორესპონდენტი წერს – უემოციო სახით.

რამდენიმე ამერიკელი მაღალჩინოსნის თანახმად, უკრაინელი ომის პატიმრების ამსახველი ეს ფოტოსურათები აღმოჩნდა ის გადამწყვეტი მომენტი, როდესაც ზელენსკისა და ტრამპის შეხვედრამ უარესობისკენ დაიწყო განვითარება. როგორც გამოცემა წერს, უკრაინის პრეზიდენტს რომ თავდაპირველად ტრამპისთვის ჩემპიონის ქამარი გადაეცა, ეს ოვალურ კაბინეტში არსებულ განწყობას შეამსუბუქებდა, თუმცა ფოტოსურათებიან საქაღალდეს საპირისპირო ეფექტი ჰქონდა.

“როგორც ჩანს, ფოტოსურათებმა ტრამპს არაკომფორტულად აგრძნობინა თავი, თითქოს მას ბრალდებოდა [სურათებზე აღბეჭდილი] ჯარისკაცების ტანჯვა. თუმცა დღემდე ზელენსკი საკუთარ გადაწყვეტილებას, წარედგინა ეს სურათები ტრამპისთვის, არ ნანობს. ის ცდილობდა, გასცდენოდა ტრამპის ტრანზაქციულ ინსტინქტებსა და მაამებლობის საჭიროებას და დაეინტერესებინა ტრამპი, როგორც ადამიანს”. – წერს The Times-ის კორესპონდენტი.

“მას ოჯახი ჰყავს, საყვარელი ადამიანები, შვილები. ის უნდა გრძნობდეს ისეთ რაღაცებს, რასაც ყველა ადამიანი გრძნობს. რაც მე მსურდა, რომ მეჩვენებინა, ჩემი ღირებულებები იყო. თუმცა შემდეგ საუბარი სხვა მიმართულებით განვითარდა”. – თქვა ზელენსკიმ აღნიშნულზე.

ჩემპიონის ქამარი თეთრ სახლში დარჩა. შეხვედრაზე მომხდარი არეულობისა და კამათით გამოწვეული დაბნეულობის ფონზე, ზელენსკიმ ქამარი ოვალური კაბინეტის ერთ-ერთ მცირე მაგიდაზე დატოვა, სადაც ის თავდაპირველად გადადო. როგორც The Times წერს, იმავე დღეს, მოგვიანებით, თეთრი სახლის მომსახურე პერსონალმა ქამარი იპოვა და ტრამპის პირად სასადილო ოთახში წაიღო, სადაც დღემდე, სხვა სუვენირებთან ერთად დევს, როგორც “მოგონება წარუმატებელი დიპლომატიისა”.

როგორც გამოცემა წერს, რისი დანახვაც უკრაინელებს ოვალურ ოფისში გამართულ შეხვედრაზე სურდათ, იყო ის, რომ აშშ კვლავ მათ მოკავშირედ რჩებოდა.

“თუმცა იმ მომენტში იგრძნობოდა, თითქოს მოკავშირეები არ ვიყავით ან მოკავშირეების პოზიციას არ ვიკავებდით. იმ საუბარში მე უკრაინის ღირსებას ვიცავდი”. – თქვა ზელენსკიმ ინტერვიუში.

თუმცა, ოვალურ კაბინეტში მომხდარი კატასტროფული შეხვედრის მიუხედავად, უკრაინის პრეზიდენტის თქმით, ის აცნობიერებს, რომ აშშ-ს პრეზიდენტის გულის მოგების გარეშე უკრაინაში სტაბილური მშვიდობის შენარჩუნების შანსი მცირეა.

როგორც The Times წერს, ის, რაც ზელენსკის ტრამპის ადმინისტრაციის მიერ ოვალურ კაბინეტში მომხდარიდან მეორე დღეს უკრაინისთვის სამხედრო დახმარებისა და სადაზვერვო ინფორმაციის გაზიარების შეჩერებაზე მეტად აწუხებს, თეთრ სახლში არსებული რუსული დეზინფორმაციაა. ზელენსკიმ The Times-ის კორესპონდენტს უთხრა, რომ პუტინთან სატელეფონო ზარის შემდეგ ტრამპის მიერ გაკეთებული განცხადება, თითქოს უკრაინელი ჯარისკაცები კურსკის ოლქში “ალყაში იყვნენ მოქცეულები”, “ტყუილი იყო”. ზელენსკის თქმით, ამერიკელმა მაღალჩინოსნებმა რუსეთის პრეზიდენტის, ვლადიმირ პუტინის სიტყვების დაჯერება დაიწყეს თავიანთი დაზვერვის მონაცემების მიუხედავადაც კი, რომელიც საპირისპიროს აჩვენებდა.

“ვფიქრობ, რუსეთმა, ინფორმაციის საშუალებით, თეთრი სახლის გუნდიდან რამდენიმე ადამიანზე გავლენის მოხდენა მოახერხა. მათი [რუსების] სიგნალი ამერიკელებისადმი იყო ის, რომ უკრაინელებს არ სურდათ ომის დასრულება და რაიმეს გაკეთება იყო საჭირო, რომ ისინი ეიძულებინათ”. – უთხრა ზელენსკიმ The Times-ს.

და ბოლოს, როგორც გამოცემა წერს, მომავალი კვირების განმავლობაში უკრაინის პრეზიდენტი შეეცდება, დაარწმუნოს ტრამპი და აშშ-ს ვიცეპრეზიდენტი ჯეი დი ვენსი, რომ მათ ევროპის რუკაზე “მკვდარი ზონების”, როგორც მემკვიდრეობის დატოვება არ აწყობთ.

“უახლოეს კვირებში, ზელენსკი ამ საკითხს დაუბრუნდება ტრამპთან და ვენსთან საუბრისას, რისი მიზანიც არა მათი ვიწრო პოლიტიკური ინტერესების დაკმაყოფილება, არამედ მათი, როგორც ლიდერების და როგორც ადამიანების ღირებულებებზე ყურადღების გამახვილება იქნება.

ერთ-ერთი ბოლოდროინდელი სატელეფონო საუბრის დროს, [ზელენსკიმ] შესთავაზა კიდეც ვენსს, თავიდან გადაეხედა საკუთარი გადაწყვეტილებისთვის, არ წასულიყო უკრაინაში ომის განმავლობაში.

“ჩვენ ჯერ კიდევ გელოდებით”. – თქვა ზელენსკიმ ღიმილით. ვიცეპრეზიდენტმა არ უპასუხა”. – წერს The Times.

გააზიარეთ და მოიწონეთ სტატია: