“რეალური საფრთხე ექმნება… იქნებ სთხოვოთ და გადაარწმუნოთ თქვენი სულიერი შვილი” – მიმართვა პატრიარქს

საქართველოს კლინიკების ასოციაცია საქართველოს კათოლიკოს-პატრიარქს, ილია II-ს , წერილით მიმართავს.

წერილს ხელს კლინიკების ასოციაციის პრეზიდენტი, ვილი პაჭკორია აწერს.

“ნიუპოსტი” წერილს უცვლელად გთავაზობთ:

“საქართველოს კლინიკების ასოციაციის ღია მიმართვა საქართველოს კათოლიკოს-პატრიარქს, მცხეთა-თბილისის მთავარეპისკოპოსს, უწმინდესსა და უნეტარეს ილია II-ს

თქვენო უწმინდესობავ,

საქართველოს მესამე პრეზიდენტი მიხეილ სააკაშვილი, სამშობლოში დაბრუნების შემდეგ, დაკავებული იქნა სამართალდამცველების მიერ და უკვე მეექვსე დღეა, პროტესტის ნიშნად, შიმშილობს საპყრობილეში. პატივს ვცემთ მის ბრძოლას სამართლიანობისთვის, მაგრამ ყოვლად შემაშფოთებელია მისი განცხადება პროტესტის უკიდურეს ფორმასთან დაკავშირებით და ამასთან ერთად, იგი უარს აცხადებს საჭიროების შემთხვევაში სამედიცინო დახმარებაზე.

ადამიანის ორგანიზმი ინდივიდუალურად პასუხობს შიმშილს, ბევრი რამ დამოკიდებულია ქრონიკული დაავადებების არსებობაზე. ადამიანებს შიმშილობის დაწყებიდან, ერთი კვირის შემდეგ, ეწყებათ ნივთიერებათა ცვლის მოშლა და ინტოქსიკაციის მოვლენები, გრძნობენ დაუძლურებას და აწუხებთ თავის ტკივილი. მე-10 – მე-12 დღიდან გამოიხატება არტერიული წნევის მკვეთრი ცვალებადობა, ირღვევა გულ-სისხლძარღვთა სისტემის, კუჭ-ნაწლავის ტრაქტის, ნაღვლის ბუშტის, პანკრეასის და თირკმლის ფუნქციები, ამასთანავე შესაძლოა განვითარდეს ჰიპოგლიკემია და მასთან დაკავშირებული კოლაფსი. დარღვეული ტროფიკის შედეგად ზიანდება ცენტრალური ნერვული სისტემა და ვითარდება თავის ტვინის იშემიური მოვლენები. მოგვიანებით პერიოდში შესაძლებელია განვითარდეს პოლიორგანული უკმარისობა, რითიც საფრთხე ექმნება ორგანიზმის სასიცოცხლო ფუნქციებს. ამავე დროს, რაც უფრო დიდ ხანს გაგრძელდება შიმშილი, მით უფრო ჩნდება რისკი შეუქცევადი პროცესების განვითარებისა.

უწმინდესო და უნეტარესო, ზემოაღნიშნულის გათვალისწინებით, რეალური საფრთხე ექმნება საქართველოს მესამე პრეზიდენტის სიცოცხლეს, ამიტომ მოგმართავთ უმორჩილესი თხოვნით, სანამ მდგომარეობა უკიდურესად დამძიმდება, იქნებ სთხოვოთ და გადაარწმუნოთ თქვენი სულიერი შვილი, შეცვალოს მისი გადაწყვეტილება პროტესტის უკიდურეს ფორმასთან დაკავშირებით, რამეთუ ღვთისგან ბოძებული სიცოცხლის ხელყოფა დაუშვებელია.

საქართველოს მესამე პრეზიდენტის სახელს უკავშირდება, ჩვენს ქვეყანაში, მრავალი სასიკეთო საქმეები, მისი ხელისუფლებაში ყოფნისას დასრულდა სამების საკათედრო ტაძარი, განახლდა ბაგრატის ტაძარი, აშენდა და რესტავრირებულიქნა მთელი რიგი ქალაქები, ჩამოყალიბდა სახელმწიფოს მართვის თანამედროვე ინსტიტუციები, იგი საერთაშორისოდ აღიარებული პოლიტიკოსია და დიდი ავტორიტეტით სარგებლობს მსოფლიოს ცნობილ პოლიტიკოსთა შორის.

ხაზგასმით აღსანიშნავია, რომ ბატონი მიხეილ სააკაშვილის პოლიტიკური პოტენციალის რეალიზაცია, ჩვენი სახელმწიფოს განვითარების მოცემულ ეტაპზე, სასიცოცხლოდ მნიშვნელოვანია.

ქართველებმა დავუშვით საბედისწერო შეცდომა და სათანადოდ არ დავიცავით საქართველოს პირველი პრეზიდენტის სიცოცხლე, დღეს ვალდებული ვართ არ გავიმეოროთ იგივე შეცდომა.

ჯანმრთელობას და მშვიდობას გისურვებთ თქვენ და სრულიად საქართველოს!
პატივისცემით,
ვილი პაჭკორია
საქართველოს კლინიკების ასოციაციის პრეზიდენტი,
მედიცინის დოქტორი, პროფესორი,” – ნათქვამია მიმართვის წერილში.

ცნობისთვის, მიხეილ სააკაშვილი ციხეში შიმშილობს და მის შეწყვეტას არ აპირებს, ცუდად გახდომის შემთხვევაში, სამედიცინო ჩარევა პენიტენციური დაწესებულების ექიმებსაც აუკრძალა.

გააზიარეთ და მოიწონეთ სტატია: