საქართველოს კათოლიკოს პატრაიარქი ილია მეორე მსოფლიო პატრიარქ ბართლომე I-ს წერილით მიმართავს და სთხოვს, რუსეთთან დაკავშირებულ უკრაინის მართლმადიდებლურ ეკლესიაში არსებული დაძაბულობის განმუხტვაში მონაწილეობა მიიღოს.
წერილში პატრიარქი აცხადებს, რომ უკრაინის ხელისუფლების მიერ სანქცირებულ მიტროპოლიტ ონოფორეს, რომელიც, ილია II-ის თქმით, რუსეთის ეკლესიას გაემიჯნა და “გარკვეული ნაბიჯებიც გადადგა მოლაპარაკებებისათვის” უკრაინამ კიევ-პეჩორის ლავრა ჩამოართვა.
ილია მეორეს აზრით, უკრაინის ეკლესია “მძიმე მდგომარეობაშია” და “ომში მყოფ უკრაინის ხელისუფლებას” უკრაინის მართლმადიდებელი ეკლესიის მიმართ “აქვს თავისი პოზიცია და რელიგიურ სიღრმეებს ნაკლებად ითვალისწინებს”. პატრიარქის თქმით, ამ მიზეზის გამო მიმართავს მსოფლიო პატრიარქს.
ილია II-ის წერილი მსოფლიო პატრიარქს:
“თქვენო ყოვლადუწმინდესობავ,
მოგესალმებით ქრისტესმიერი სიყვარულით და მოგმართავთ შემდეგი საკითხის გამო:
პირველ რიგში, გვსურს, კიდევ ერთხელ გამოვხატოთ ჩვენი დიდი გულისტკივილი რუსეთ-უკრაინის ომის გამო, რასაც სამშობლოს დამცველ ჯარისკაცთა და ათასობით უდანაშაულო ადამიანის სიცოცხლე ეწირება. ჩვენ ეს პროცესები გავიარეთ და კარგად გვესმის იქ არსებული ვითარების სიმძიმე. ზემოთქმულთან ერთად, ვწუხვართ უკრაინის მართლმადიდებელ ეკლესიაში ამჟამად არსებული მდგომარეობის გამოც.
ჩვენთვის ისიც გასაგებია, რომ მათთან მიმართებაში ომში მყოფ უკრაინის ხელისუფლებას აქვს თავისი პოზიცია და რელიგიურ სიღრმეებს ნაკლებად ითვალისწინებს. ამიტომაც მოგმართავთ თქვენ, თქვენო ყოვლადუწმინდესობავ.
როგორც ცნობილია, უკრაინის მართლმადიდებელი ეკლესიის მღვდელმთავრების, სამღვდელოებისა და მრევლის უდიდესმა ნაწილმა ამ ომში თავისი ქვეყნისადმი ერთგულება გამოიჩინა და უკრაინის ძლიერება მათმა ერთსულოვნებამაც განაპირობა. რა თქმა უნდა, იქნებოდნენ განსხვავებული პოზიციის მქონენიც, რაც საერთო სურათს არ ცვლის.
ის ფაქტი, რომ უნეტარესი ონოფრე სინოდალური გადაწყვეტილებით გაემიჯნა რუსეთის ეკლესიას და გარკვეული ნაბიჯებიც გადადგა მოლაპარაკებებისათვის, უაღრესად მნიშვნელოვანია.
მნიშვნელოვანია ისიც, რომ ამ ეკლესიის მხრიდან ამა თუ იმ საეკლესიო საკითხისადმი ერთგულება საუკუნეების განმავლობაში აღიარებული სულიერი ცხოვრების წესის დაცვით არის განპირობებული და სულაც არ ნიშნავს სხვა ეკლესიის უპირობოდ მორჩილებას.
დღეს არსებული მდგომარეობით, მიტროპოლიტ ონოფრეს ჩამოერთვა კიევ-პეჩორის ლავრა, პრობლემებია მის იურისდიქციაში არსებულ სხვა ეკლესია-მონასტრებთან დაკავშირებითაც. ფაქტია, უკრაინის მართლმადიდებელი ეკლესია მრავალი მხრიდან ძალიან მძიმე მდგომარეობაში აღმოჩნდა.
თქვენო ყოვლადუწმინდესობავ, ყველას ახსოვს სამშვიდობო მისიით გადადგმული თქვენი არაერთი ნაბიჯი და ამიტომაც ვფიქრობთ, იქნებ შეძლოთ, აქაც ხელი შეუწყოთ დაძაბულობის განმუხტვას, რაც, ჩვენი აზრით, პირველ ეტაპზე გულისხმობს მშვიდობიანი თანაცხოვრების პირობების შექმნას, შემდგომ კი, – ურთიერთდაახლოებისკენ მშვიდობიან სვლას.
მართლმადიდებელი სამყარო დღეს არაერთი სერიოზული გამოწვევის წინაშეა და ამ ფონზე ყოველი სასიკეთო ნაბიჯი დიდად ფასეული იქნება.
წერილი წმ. პავლე მოციქულის სიტყვებით მინდა დავასრულო: ,,ისწრაფდით დამარხვად ერთობისა მის სულისასა საკვრელითა მით მშვიდობისაითა”. (ეფ.4.3)
ღმერთმა მშვიდობა მიჰფინოს უკრაინას და მთელ მსოფლიოს.
ქრისტესმიერი სიყვარულითა და პატივისცემით,
ილია II” – წერია საპატრიარქოს განცხადებაში.
მსგავსი სტატიები:
რა დასკვნა დაიდო ადამიანების უფლებების დარღვევაზე- HRC 2020 წლის ანგარიში
“წელს ურეკი დამსვენებლებს წყლისა და კანალიზაციის პრობლემის გარეშე ხვდება”
“ამჯერად მიშა აუცილებლად დაბრუნდება” -როგორ განვითარდება მოვლენები საქართველოში
სამ თვეში 4 მლნ დოლარის მანდარინის ექსპორტი განხორციელდა
დემოკრატიის ინდექსში საქართველოს მდგომარეობა გაუარესდა
“ოცნება” პრაქტიკულად „ცივი ომის” მდგომარეობაშია უკრაინასთან – სააკაშვილი
ოხანაშვილს ძლივს ვასწავლე, რომ ევროსაბჭო და ევროკავშირი სხვადასხვა რამეათქო – ეკა ბესელია
“ან ვიდეოები, ან სცენა… არ ახსენოთ ომი, რუსეთი” – ბათუმის მერიის ულტიმატუმი უკრაინელებს