სადამკვირვებლო მისია „ჩემი ხმა“ წარმომადგენელი, ყოფილი სახალხო დამცველი, ნინო ლომჯარია თბილისის საქალაქო სასამართლოში მაგისტრატი მოსამართლის წინაშე იკითხება.
ის არჩევნების შესაძლო გაყალბების ფაქტებზე დაწყებული საქმის გამოძიების ფარგლებში აძლევს ჩვენებას.
როგორც გამოკითხვის დაწყებამდე ლომჯარიამ განაცხადა, ის სასამართლოში კონკრეტული მტკიცებულებებით არის მისული.
„პროკურატურამ ცესკო-ს მიმართვის საფუძველზე გამოძიება დაიწყო. მიუხედავად იმისა, რომ წინასაარჩევნო პერიოდში, ასევე, არჩევნების დღეს და შემდეგ პერიოდშიც, ჩვენი მხრიდან არაერთი ინფორმაცია ვრცელდებოდა დანაშაულის შემცველი ფაქტების შესახებ, პროკურატურას ამ ფაქტებზე გამოძიება არ დაუწყია. გამოძიება ცესკო-ს მიმართვის საფუძველზე დაიწყეს. მე დღეს გამოკითხვაზე ვარ დაბარებული, რა თქმა უნდა, ველოდი ამას და სურვილი მქონდა ამ გამოკითხვაში მონაწილეობის მიღების, რადგან აქ ბევრი მტკიცებულებით ვართ მოსული და ვაპირებთ, სათითაოდ ვისაუბრო ყველა იმ ინფორმაციაზე, რაც ჩვენს განცხადებებს, შეფასებებს ადასტურებს. საქმე ეხება არამხოლოდ იმ მუხლის გარშემო არსებულ მტკიცებულებებს, რომლის გარშემოც დაწყებულია გამოძიება, არამედ, კიდევ სხვა, არაერთი სისხლის სამართლის ნორმის დარღვევის შესახებ ინფორმაციას, მათ შორის, ამომრჩევლის ნებაზე ზეგავლენას, ამომრჩევლის პერსონალური მონაცემების უკანონოდ მოპოვება-დამუშავებას, ამომრჩევლის არჩევანის ფარულობის დარღვევას, ამომრჩევლის მოსყიდვას და ა.შ. ასევე გვაქვს კონკრეტული ინფორმაცია, რომელიც შეიცავს ცესკო-ს წევრების და საარჩევნო ადმინისტრაციების მხრიდან უფლებამოსილების გადამეტების თუ ბოროტად გამოყენების ინფორმაციას. ბევრი მტკიცებულება გვაქვს იმისთვის, რომ პროკურატურას დავეხმაროთ ეს საქმე გამოიძიონ, პროკურატურის ადგილას რომ ვიყო, ძალიან მადლიერი ვიქნებოდი სადამკვირვებლო ორგანიზაციების მიმართ, რადგან მათ ამ საქმის გამოძიებას ძალიან გავუადვილებთ, იმდენად ბევრი მტკიცებულება გვაქვს. იქიდან გამომდინარე, რომ ავტორიტარიზმში ვცხოვრობთ, სადაც დამოუკიდებელი სახელმწიფო ინსტიტუტები არ არსებობენ, მაგალითად, გუშინ ცესკო-მ პარლამენტის ფუნქცია შეითავსა, კანონის საწინააღმდეგოდ თავად დაადგინა პრეზიდენტის არჩევის ვადები, რაც კანონსაწინააღმდეგოა, ეს კონსტიტუციური და კანონისმიერი ჩარჩოებიდან გასვლაა, ამიტომ ასეთ დროს, როცა სრული თვითნებობაა, რა თქმა უნდა, განსაკუთრებული, პოზიტიური მოლოდინები არ გვაქვს“, – განაცხადა ლომჯარიამ.
მისივე თქმით, მათ მომზადება დაიწყეს, რათა ევროკავშირის „ტექნიკურ მისიას“ კონკრეტული მტკიცებულებები გადასცენ.
„ვემზადებით ევროკავშირის „ტექნიკურ მისიასთან“ შესახვედრად. იმედი გვაქვს, ისინი ობიექტურ შეფასებას დადებენ, რადგან მათაც მივაწვდით ყველა ამ ინფორმაციას და მტკიცებულებებს”,- განაცხადა ლომჯარიამ.
ცნობისთვის, ლომჯარიამ თავდაპირველად უარი თქვა პროკურატურაში გამოკითხვაზე, მან გამოკითხვაზე მისვლა მოითხოვა მაგისტრატ მოსამართლესთან. ნინო ლომჯარია სადამკვირვებლო მისია „ჩემი ხმის“ მესამე წარმომადგენელი იქნება, ვისაც პროკურატურა არჩევნების შესაძლო გაყალბების საკითხთან დაკავშირებით გამოკითხავს. მანამდე გამოკითხვაზე იმყოფებოდნენ სადამკვირვებლო მისიის „ჩემი ხმა“ წარმომადგენლები: ლონდა თოლორაია და ტატო ქელბაქიანი.
მსგავსი სტატიები:
გავიმარჯვეთ, ახლა მთავარია ოპოზიციის ერთობა – მიხეილ სააკაშვილი ეგზიტპოლის შედეგებზე
ნიკა მელია გმირია, ივანიშვილი კი დაუკრეფავში გადავიდა- სააკაშვილი
“განა ეგ არის ღვთიური სული, რაც ჯერ ეშმაკსაც არ ეკადრება”
პარლამენტში უსაფრთხოების საგანგებო რეჟიმი მოქმედებს, რათა მუშაობაში ხელი არ შეგვეშალოს -კუჭავა
კობახიძე, რატიანი, თალაკვაძე -“მთავარის” ინფორმაციით, ტიკარაძის შემცვლელად სამი კანდიდატურა განიხილება
”პრეზიდენტ სააკაშვილთან ერთობლივად გადავწყვიტეთ აქ წამოვსულიყავით და გვეჩვენებინა, რომ პრეზიდენტები ვდგავართ უკრაინელი ხალხის გვერდით ”
„სერიოზული დაზიანებები არ აღენიშნება“ – ზელენსკი ავარიაში მოყვა
“ძვირადღირებული დამოუკიდებლობის დღე” – წულუკიანის უწყება ბაკურ ბაკურაძის კომპანიას მილიონ ლარამდე თანხას გადაუხდის