ოზურგეთში მოკლულ ქალბატონს 60 ჭრილობა აქვს დანით მიყენებული – ნასაკირალში მანიაკზე ალაპარაკდნენ

ოზურგეთის მუნიციპალიტეტის დაბა ნასაკირალში, გუშინ მოკლულ, 63 წლის ქალბატონს, დანით 60 ჭრილობა აქვს მიყენებული.

ამის შესახებ, “გურიის მოამბეს”, ნასაკირალიდან აცნობეს;

მკვლელობა, გუშინ ადრე დილით, დაახლოებით 5 საათზე მოხდა; პოლიცია მკვლელს მეორე დღეა უშედეგოდ ეძებს;

მოკლულის თანასოფლელების განცხადებით, მკვლელი, საცხოვრებელ სახლში, ნასაკირალის მეხუთე მიკრორაიონის სამსართულიანი საცხოვრებელი კორპუსი, ფანჯრიდან შევიდა, შესვლამდე მკვლელმა, ბინაში, ელექტროენერგია გათიშა; მკვლელობის იარაღი – დანა, ასევე ხელთათმანები, კი ადგილზე, მომხდარის შემდგომ დატოვა.

კორპუსში ხმაური მხოლოდ ერთმა მეზობელმა გაიგო, მან მეორე მეზობელს შეატყობინა, მეზობლები ბინაში მოგვიანებით, ფანჯრიდან შევიდნენ, თუმცა, ქალბატონი მათ უკვე გარდაცვლილი დახვდათ:

“საშინელი სურათი დაგვხვდა – მოკლული თითქმის აკუწული, დაჩეხილი იყო” – ყვება ერთ ერთი მეზობელი;

ქალბატონი სახლში მარტო ცხოვრობდა, მეუღლე კურორტ გომისმთაზე მუშაობდა, შვილები კი საკუთარ, სხვადასხვა საცხოვრებელ სახლებში, დამოუკიდებლად ცხოვრობენ;

ადგილზე მისულმა პოლიციელებმა, ძაღლები მოიყვანეს, თუმცა კვალი – მომხდარიდან ას მეტრში, ავტომაგისტრალზე გასვლისას დაიკარგა;

გამოძიებამ ათეულობით ადამიანი დაკითხა, თითქმის ნახევარი სოფელი-თუმცა, როგორც ჩვენთვის გახდა ცნობილი – რაიმე ხელშესახები, პოლიციას მომხდარზე, ჯერ არა აქვს.

დაბა ნასაკირალში მანიაკზე ალაპარაკდნენ-სოფლის უმრავლესობა დარწმუნებულია, რომ მკვლელი ადგილობრივი არაა, თუმცა, მსხვერპლის შერჩევა მიანიშნებს, რომ, ის დასახლებას კარგად იცნობდა;