კატებმა დიდი შანსია არ გაგრძნობინონ, თუმცა ცნობენ, როცა მათ სახელს ეძახით. ამის შესახებ იაპონიის სოფიას უნივერსიტეტის მიერ ჩატარებული კვლევიდან ვიგებთ, რომელიც ჟურნალ Scientific Reports-ში გამოქვეყნდა.
მეცნიერების თქმით, წარსულში ჩატარებული კვლევებით დასტურდებოდა, რომ ძაღლები, თუთიყუშები და დელფინები ადამიანების ხმოვან სიგნალებზე რეაგირებდნენ, თუმცა უცნობი იყო, კატებსაც ესმოდათ თუ არა ადამიანების ხმები.
ეს პირველი შემთხვევაა, როცა დადასტურდა, რომ სახლში მცხოვრებ კატებს სხვადასხვა სიტყვებში საკუთარი სახელების გარჩევა შეუძლიათ.
“კატების უამრავმა პატრონმა იცის, რომ მათ ცხოველებს საკუთარი სახელები ესმით, თუმცა ეს მეცნიერებას აქამდე არ დაუმოწმებია”, – ამბობს კვლევის ერთ-ერთი ავტორი აცუკო საიტო.
იმის გამო, რომ კატების გაწვრთნასა და ადამიანების სიტყვებზე მათ ქცევით პასუხს დიდი დრო და ძალისხმევა სჭირდება, მეცნიერების ჯგუფმა გადაწყვიტა, რომ კვლევისას ის მეთოდი არ გამოეყენებინა, რასაც ძაღლების შესწავლისას მიმართეს.
კატები მათთვის ჩვეულ გარემოში იყვნენ, როცა ერთი და იგივე ინტონაციით მათ გასაგონად რთავდნენ ოთხ სიტყვას, რომელსაც მათი სახელი მოჰყვებოდა.
ვიდეოებში ჩანდა, რომ საკუთარ სახელზე ისინი ყურის აწევით, თავის შემობრუნებით ან კუდის გამოძრავებით რეაგირებდნენ. ცოტა მათგანი კი საკუთარ სახელს “მიაუთი” პასუხობდა.
მეცნიერების თქმით, შედეგები, რომლებიც თითოეული კატის რეაგირების 4-პუნქტიან შკალაზეა დამყარებული, აჩვენებს, რომ კატებს სხვა სიტყვებისგან საკუთარი სახელის გარჩევა შეუძლიათ.
პირველ ტესტში, თითოეულ კატას ასმენინებდნენ მათი სახელის სიგრძისა და ჟღერადობის მსგავს ოთხ სიტყვას, რომლებსაც მათი პატრონები ამბობდნენ. 16-დან 11-მა კატამ ქცევაში გამოავლინა, რომ პატრონის ხმები ამახსოვრდებოდა. 9 კატამ საკუთარ სახელზე ყურები ასწია.
ექსპერიმენტი მოგვიანებით კატების სხვა ჯგუფში განმეორდა, სადაც მათ უცნობის ხმებით მიმართავდნენ. მესამე სცენარში კი პატრონის ხმები იმ კატებს მოასმენინეს, რომლებიც სახლში ან თავშესაფარში სხვა კატებთან ერთად ცხოვრობდნენ.
საიტოს სიტყვებით, აშკარა არ იყო, რომ კატები ხვდებოდნენ, მათი სახელი რომ სახელს ნიშნავდა:
“არ არსებობს იმის მტკიცებულება, რომ კატებს საკუთარი ვინაობის აღქმა შეუძლიათ. მათთვის სახელი იყო ასოციაცია, რომელიც დაჯილდოებას ან დასჯას გამოხატავდა”.
თუმცა, ეს არ ნიშნავს, რომ კატები ყურადღებას ავლენდნენ “მიმართვისას”. იმის მიუხედავად, ეს ხმა უცნობის იყო თუ პატრონის.
“ისინი ისე არ გვპასუხობენ, როგორც ჩვენ გვსურს, თუმცა კატებს იმაზე მეტად ესმით ადამიანების, ვიდრე ჩვენს უმრავლესობას წარმოუდგენია”, – დასძენს მკვლევარი.
https://on.ge/
მსგავსი სტატიები:
კალანდა გურიაში – ეთნოგრაფ სერგი მაკალათიას მოგონებებიდან
“ივანიშვილი აფინანსებდა ტრამპს“-მიხეილ სააკაშვილი
დათოვლილი ოზურგეთი-ფოტოები
ფოლკლორის სახელმწიფო ცენტრს ანზორ ერქომაიშვილის სახელი მიენიჭება
“ხვალ ჩემი დაბადების დღეა, დღეს მნიშვნელოვან საჩუქრად, ჩემი ზღაპრების ახალი წიგნი გამოვიდა”
ქვეყნები, საიდანაც საქართველოში ბანანი შემოდის – პროდუქტი, შესაძლოა, მსოფლიო ბაზრიდან გაქრეს
ადგილობრივი მოსავლის რეალიზაციას იმპორტირებული პროდუქცია უშლის ხელს – რა ღირს საზამთრო
“დიახ ჩვენ ვართ პირველები, არა მარტო ჩვენს სკოლაში, არამედ გურიაში…”