შვილმოკლული მამა მალხაზ მაჩალიკაშვილი, რომელიც თვეების განმავლობაში ოცდაოთხსაათიან რეჟიმში რუსთაველზე აქციას ატარებდა, არჩევნების გაყალბებას დანარჩენ მოქალაქეებთან ერთად აპროტესტებს და აქციის მონაწილეებს ტრიბუნიდან მიმართავს.
ჩვენ ვართ მართლები, მე თქვენ მაძლევთ ძალას, რომ ვიყო მხნედ, ვიდგე აქ და არ დავიღალო, მინდა ყველას გითხრათ მადლობა, მინდა მადლობა ვუთხრა ემიგრანტებს, რომლებიც არიან აქედან შორს და ფიქრობენ ამ ქვეყანაზე. ჩვენ აქ ვდგავართ, ჩვენ ვართ მართლები და წელში გადავტეხავთ ბიძინა ივანიშვილს, – თქვა ტრიბუნიდან მალხაზ მაჩალიკაშვილმა.
31 ოქტომბერს ჩატარებული არჩევნების გაყალბების წინააღმდეგ რუსთაველზე ხალხი პირველად 8 ნოემბერს შეიკრიბა, აქციები გაიმართა ცესკოსთანაც. აქციის მონაწილეები ხელახალი არჩევნების დანიშვნას და ცესკოს თავმჯდომარის გადადგომას ითხოვდნენ. 13 ნოემბერს, ხმაურით ჩატარებული სხდომის ფონზე, ცესკომ პროპორციული არჩევნების შედეგები შეაჯამა მათ შორის იმ ოქმების საფუძველზეც, რომელთაც ოპოზიცია არამარტო აპროტესტებდა, სასამართლოშიც ჰქონდა გასაჩივრებული.
ამის მიუხედავად, ცესკომ მეორე ტური 21 ნოემბერს დანიშნა, თუმცა, ოპოზიცია აცხადებს, რომ მასში მონაწილეობის მიღებას არ აპირებს. ოპოზიცია და გაბრაზებული მოქალაქეები პარლამენტის შენობის წინ დღეს, 14 ნოემბერსაც შეიკრიბნენ. საქართველოს სახელმწიფო ჰიმნის ფონზე, 15:00 საათზე დაწყებული საპროტესტო აქცია დაახლოებით სამ საათს გაგრძელდა და ჰიმნის ფონზევე დასრულდა.
არჩევნების გაყალბების წინააღმდეგ გამოხატული პროტესტის პარალელურად, ოპოზიციასა და ხელისუფლებას შორის დიალოგი აშშ-ის საელჩოსა და ევროკავშირის ელჩის ფასილიტატორობით მიმდინარეობს, უკვე გაიმართა ორი შეხვედრა, თუმცა, კონკრეტული შეთანხმება ჯერ არ შემდგარა. “ქართული ოცნების” გენერალურმა მდივანმა კახა კალაძემ დღეს, 14 ნოემბერს განაცხადა, რომ მმართველი პარტია არ განიხილავს “ხელახალ არჩევნებს ან რაიმე მსგავსს”, ხოლო ოპოზიციასთან დაკავშირებით თქვა, რომ მათი მიზანი მხოლოდ დესტრუქციაა.
ოპოზიცია საქართველოში აშშ-ის სახელმწიფო მდივნის მაიკ პომპეოს ვიზიტის დღეს მდუმარე აქციას გეგმავს, ხოლო 21 ნოემბერს, მეორე ტურის დღეს, ოპოზიცია და მოქალაქეები ცოცხალი ჯაჭვით აპირებენ არჩევნების გაყალბების გაპროტესტებას.
მსგავსი სტატიები:
5 ფაქტი ვიკიპედიიდან ოზურგეთის შესახებ
ხანძარი ლანჩხუთში – ვაჟა ხუხუნის საცხოვრებელი სახლი მთლიანად დაიწვა
“ჩვენი თხოვნაა, დაგვეხმარეთ, გავერკვიოთ რა ვაქცინაა? რისგან შედგება? როდის წარმოიქმნა? რა ღირს? ვინ აიცრა ამ ვაქცინით? რატო თქვეს უარი?
ბავშვების 69%-ის მიმართ დასჯის ძალადობრივ მეთოდებს იყენებენ
რუსეთში 17 წლის ფეხბურთელი მატჩის დროს გარდაიცვალა
დეკანოზი ანდრია ჯაღმაიძე: “ნინოწმინდაში მცირე ზომის ბავშვთა სახლის მშენებლობა იგეგმება”
200 ლარიანი დახმარების გაცემა გრძელდება
5 ივლისიდან საქართველოში შემოსვლის წესები იცვლება – 144