რამდენი ცოლი ჰყავს კადიროვს – ჩეჩნეთის პრეზიდენტის იდუმალი ცხოვრება

გამოცემა “პროექტმა”, რომელიც რამდენიმე ხმაურიანი გამოძიების ავტორია, 44 წლის რამზან კადიროვისა და მისი ოჯახის შესახებ წერს და ირწმუნება, რომ რამზან კადიროვი სინამდვილეში, ორცოლიანია. 42 წლის ოფიციალური ცოლის, მედნისთან ერთად მეორე ცოლი – ფატიმა ხაზუევა ჰყავს.

მუსლიმური კანონებით, მრავალცოლიანობა დასაშვებია, სამაგიეროდ, რუსეთის ფედერაციაშია ორცოლიანობა აკრძალული.

როგორც ინფორმაციაშია აღნიშნული, კადიროვმა მეორე ცოლი 2006 წელს, ჩეჩნეთში გამართულ სილამაზის კონკურსზე გაიცნო.

მაშინ გოგონა 15 წლის იყო და მეორე ადგილი დაიკავა. ჩეჩნეთის პრეზიდენტმა ფატიმა ცოლად შეირთო.

ინფორმაცია ჩეჩენმა ბლოგერმა ტუმსო აბდურახმანოვმაც დაადასტურა, რომელსაც ხაზუევას ძმებსა და თანასოფლელ გოგონასთან ახლო ურთიერთობა აქვს.

“პროექტის” თქმით, კადიროვის მეორე მეუღლე დიდ ქონებას ფლობს. კერძოდ, ჩეჩნეთის დედაქალაქში მას მდიდრული სასახლე აქვს, რომელიც კადიროვის რეზიდენციის პირდაპირაა და მისი ზუსტი ღირებულება უცნობია.

გარდა ამისა, ფატიმა ჩეჩნეთის ხელმძღვანელის ადმინისტრაციის ოფიციალური თანამშრომელია, სადაც 100 ათას რუბლს გამოიმუშავებს. რუსეთის დედაქალაქში მის სახელზე რამდენიმე ელიტური ბინაა რეგისტრირებული, რომელთა საერთო ღირებულება, მილიონობით რუბლია.

კადიროვის ოფიციალური მეუღლე, მედნი, რომელთანაც 14 შვილს ზრდის, მოსკოვში ბინებს ფლობს. ორივე ცოლის უძრავი ქონების საერთო ღირებულება 800 მილიონ რუბლს სცდება. ამაში არ შედის ყველაზე ძვირად ღირებული სასახლე ჩეჩნეთის ისტორიაში, რომლის ფასიც ზუსტად ვერავინ გაიგო.

გამოცემის ინფორმაციით, მედნის ყალბი პირადობის მოწმობა აქვს, რომლითაც კიდევ აქვს დარეგისტრირებული უძრავი ქონება. ამიტომ, დეკლარაციის მიხედვით, ქალს მხოლოდ ერთი ბინა აქვს, დანარჩენი ქონება ყალბი პირადობითაა გაფორმებული.

გააზიარეთ და მოიწონეთ სტატია: