ბარდი, უხამსი ქალი, შტრიბანი და ტელეღრუტუნობა

ტელეწამყვანს საჯაროდ უპასუხა ეკატერინბურგელმა მოკრივემ, ოლიმპიურმა ჩემპიონმა ეგორ მეხონცევმა:

„ვწერ ამ ჩემს ვიდეოს ლიბეროტების საზიზღარი ცენტრიდან. ნეონაცისტებისა და ნაძირლების ეპიცენტრიდან, როგორც ვლადიმირ რუდოლფოვიჩ სოლოვიოვი ამტკიცებს. ესე იგი, გამოდის, ასეთი ვარ მე, ასეთია მთელი ჩემი გარემო, ჩემი ოჯახი, ჩემი მშობლები. აი, რა მინდა ვთქვა, ვლადიმირ რუდოლფოვიჩ, თქვენ ყველანი გაგიჟდით მაგ ტელევიზიაში. სწორედ თქვენ ხართ ის ნეონაცისტი, რომელზეც საუბრობთ. ეს თქვენ ყოფთ ხალხს ურალის და მოსკოვის მკვიდრებად, უკრაინელებად და რუსებად, ეს თქვენ ხართ ნაძირალა. ალბათ, კმაყოფილი არ დარჩით თქვენი სემინარებით, რომლებიც აქ, ეკატერინბურგში ჩაატარეთ. მთელი ქალაქი გავსებული იყო თქვენი პლაკატებით: “ხისტი საუბრები ვლადიმირ სოლოვიოვთან”. აი, რა! ჩამოდით ეკატერინბურგში, ურალში, ჩვენ გასწავლით, რა არის ნამდვილი ხისტი საუბარი“.

ვლადიმირ სოლოვიოვს მიმართა ურალის ფედერალური ოლქის გუბერნატორმა ევგენი კუივაშევმაც, რომლის თქმითაც, მართალია, შეურაცხმყოფელი განცხადების გამო „ეკატერინბურგში სოლოვიოვის ლექციების მსმენელთა რაოდენობა საგრძნობლად შემცირდა“, მაგრამ, მიუხედავად ამისა, ეკატერინბურგელები მოთმინებით ელიან ტელეწამყვანს თავიანთ ქალაქში ახსნა-განმარტების მოსასმენად. ურალის გუბერნატორმა ასევე ურჩია სოლოვიოვს, „ლაპარაკისას სიტყვები შეარჩიოს“.

რუსული პროპაგანდისტური მედიის ვარსკვლავმა ურალის მხარის გუბერნატორისა და მმართველი პარტიის წევრის ამ მიმართვაში ძველბიჭური ტონი და მუქარა ამოიცნო, ამიტომ თვითონაც ძველბიჭურად ურჩია ევგენი კუივაშევს, „ცოტა აზრზე მოდიო“:

„შენ რა, ცდილობ, ქურდული გაგებით წამომიყენო პრეტენზიები?! ანუ ახლა გუბერნატორთან საუბრისას ბაზარი უნდა გავფილტრო ხოლმე? რაო, გუბერნატორო, სტრელკას ხომ არ მინიშნავ? ან იქნებ კუივაშევი შეუერთდეს მათ, ვინც ჩემს გაგორებას ცდილობდა? ერთი ამას დამიხედეთ, როგორი ყოჩაღი ყოფილა“.

ვლადიმირ სოლოვიოვმა ურალის გუბერნატორი ასევე შეადარა გასული საუკუნის 90-იან წლებში მოქმედი ურალმაშის კრიმინალური დაჯგუფების წევრებს.

სწორედ იმ დროს, როცა ბევრს ეგონა, რომ გავლენიანმა ჟურნალისტმა ადგილი მიუჩინა პროვინციელ ოპონენტს, ურალის გუბერნატორს ნამდვილი „ქურდული ლექსიკით“ გამოექომაგა რუსული ბლატნოი რომანსების ლეგენდარული შემსრულებელი და ლაგერების ყოფილი მკვიდრი, ალექსანდრ ნოვიკოვი, რომელმაც ვლადიმირ სოლოვიოვს მიმართა ისე, როგორც მიმართავდნენ ჟურნალისტის მიერ ნახსენები ურალმაშის კრიმინალური დაჯგუფების ლიდერები:

„მისმინე, შე შტრიბანო! როცა ჩვენს ქალაქზე ლაპარაკობ, გაფილტრე შენი ღრუტუნობა. დამპალ ნესტარს დააჭირე და ნუ ბლატაობ!“

რუსი ბარდის, გასული საუკუნის 90-იანი წლების რუსული შანსონის ვარსკვლავის ამგვარმა მიმართვამ სოციალურ ქსელებში ნამდვილი აფეთქება გამოიწვია. გარდა იმისა, რომ საყოველთაო დაცინვის საგნად იქცა პუტინის რეჟიმის ერთ-ერთი მთავარი პროპაგანდისტი, მნიშვნელოვანი შინაარსითა და ლექსიკური მარაგით „გამდიდრდა“ დღევანდელი რუსეთის პოლიტიკური ელიტისა და ექსპერტული წრეების საჯარო დისკურსი.

შტრიბანი – ციხის ბლატნოი ჟარგონის მიხედვით, ბებერი, ჭკუისგან დაცლილი კუანა კაცი ყოფილა, ღრუტუნობა (хрюканина როგორც писанина-ს ზეპირი ფორმა) კი ისედაც ნათელია, რაც არის.

სამოქალაქო აქტივისტის, ალექსანდრ ორლოვის თქმით, ღრუტუნობა შესანიშნავი სიტყვაა, ამომწურავი, რომელიც აღწერს თითქმის ყველაფერს, რაც დღეს რუსეთში პირით ითქმის. გარდა ამისა, როდესაც ურალის ბლატნოი ენის ცნობილი მთარგმნელი ეუბნება პუტინის მთავარ პროპაგანდისტს „გაფილტრე შენი ღრუტუნობა და ენას დააჭირეო“, იმ ვითარებაში, როდესაც თავად პუტინი და მისი გარემოცვა ახლახან საჯაროდ წუხდნენ ამ პროპაგანდისტზე თითქოსდა შესაძლო თავდასხმის გამო, ეს „ღრუტუნობა“ ძალიან ჰგავს შავი ნიშნის დასმას.

„ღრუტუნობა – ამ დღეების აღმოჩენაა. განსაკუთრებით მოეწონა მათ, ვისაც არ მოსწონს არც პუტინი და არც სპეციალური სამხედრო ოპერაცია. შეიძლება ითქვას, რომ ეს არის სპეციალური სამხედრო ოპერაციის დროების სიტყვა. აწი სწორედ ასეთ შეფასებას მისცემენ ერთმანეთის მოძულეები ოპონენტების მიერ წარმოთქმულ სიტყვებს. ღრუტუნობა – ესაა საყოველთაო სიძულვილის დროების მეტყველება. ჯერ ხეირიანად არც ვიცით, როგორ იწერება ეს სიტყვა და უკვე საყოველთაოდ იყენებენ“.

როგორ იყენებენ?

ერთ-ერთმა რუსმა სამოქალაქო აქტივისტმა (მაშა ფილიმორ-სლონიმმა) ფეისბუკში დაწერა, რომ ფრაზა „როგორ დეგრადირდა მედვედევი“ სულელურად ჟღერს. ახალი სიტყვის გამოყენებით შესაძლებელია მედვედევის საპირველმაისო პერფორმანსის უფრო ზუსტი შეფასება. ასე მაგალითად:

„ეს არის სრული ღრუტუნობა, ბევრად მეტი თავისი ღრუტუნელობით, ვიდრე კატის უკანალი, რომელიც პუტინმა დაუხატა დაფაზე სკოლის მოსწავლეებს თავისი პრეზიდენტობის გარიჟრაჟზე!“

1 მაისს რუსეთის ყოფილმა პრეზიდენტმა და პრემიერ-მინისტრმა, დმიტრი მედვედევმა დაფაზე მარკერით დაწერა „გილოცავთ 1 მაისსა და გამარჯვების დღეს“, შემდეგ ხელი მოაწერა ლათინური ანბანის ბოლო ასოთი და მრავალმნიშვნელოვანი მზერით შეხედა მაყურებელს.

რადიო თავისუფლება