“გული არ დააკლო ნენა, ჩუუმატე ყვავილი, ჩუუმატე” – ზურა შევარდნაძე

”პირველი სამგლოვიარო გვირგვინი, რომ გავაკეთე ათი შეიძლება თორმეტი წლის ვიქნებოდი.
ოსტატურად ვაგორგოლავებდი ხავსის გუნდას, პალმის, მაგნოლიის, კამელიის ფოთლებს და კრიფტომერიის წიწვებს ვიყენებდი. თხილის წვრილი წკნელით მოვწნავდი კალათას და კოჭის ძაფით ვახვევდი მოხრილ რკალზე ნაძვის ტოტებს. ყვავილს სეზონის მიხედვით ვურჩევდი და ვამაგრებდი წვრილად დახეჩილ ფიჭვის ტკეჩებზე ალუმინის სინით.
მალე გამივარდა სახელი და არ იქნებოდა ტირილი გურიაში ჩემი გაკეთებული “ვენოკი” არ წაეღოთ. ქალაქიდან მოსულები ოზურგეთელი ანგელინა თოიძის საყვავილეში ნაყიდი კალათებით მოდიოდნენ, ჩემს თანასოფლელებს კი ყველას მე ვუკეთებდი.
“ჯერ რომ არ გაგიკეთებია იმფერი უნდა ქნა ნენა, ნამეტანი გულმოკლული და მგლოვიარე ვარ..”
“შენ იცი ჩემო ზურიკო, ქე იცი ბათუმში მიმაქ და არ მევიჯაყო..”
“დიდი გამიკეთე ნენა, კაი მინდა იყოს ბრიალა, მეისპო მაგის მომგონი..” და მისთანები ბევრი.
ზოგჯერ დამეზარებოდა, მარა უარის თქმას ბებია არ მანებებდა. “არ უთხრა ბებია ვარი, თუ რამე შეგიძლია დამწუხრებულ ადამიანს გუუკეთო, უნდა გუუკეთო ..”
“მაი ცოცხალიზა კეთდება ბებია თვარა იი გაჭივრებული მაგას ვეღარ დეინახავს..”
ნალიის ქვეშ მქონდა სახელოსნო გამართული, კეთების დროს ჩამომივლიდა და შემეხვეწებოდა: “გული არ დააკლო ნენა, ჩუუმატე ყვავილი, ჩუუმატე..” გურული წესების მიხედვით, ამფერ საქმეში გასამრჯელოს აღებაც არ ვარგოდა და ვიყავი ასე.
ამ “ხელობას” ვუმადლი, რომ მთელი სტუდენტობა არ მომშივებია. ვაკის პარკთან, ყვავილების რკინის ჯიხურში ვმუშაობდი, ქალაქში ვინმე, რომ გარდაიცვლებოდა ზუსტად ან დაახლოებით მაინც ვიცოდით რა დაკვეთები იქნებოდა და ვისგან, სათანადოდ ვიმარაგებდით მასალას და ყავილს. სამგლოვირო თაიგულის ან გვირგვინის კეთება ბევრად უფრო ძნელია ვინემ საზეიმო მორთულობის. თავშეკავებული უნდა იყოს “ვენოკი” მასწავლიდა ყველა ჩემი მასწავლებელი.
გერმანიაში უკვე ფლორისტულ, სამებაღეო სკოლაში ჩემი ნაკეთები ყველას ნაკეთბისგან გამოირჩეოდა, ჩვენი პედაგოგი, ტილდა ბაუმანი აღნიშნავდა რომ საბჭოთა იერი დაკრავს ზურაბის ნახელავს, არაზომიერიაო და ძალიან მიქებდა ნაკეთობას. მიწუნებდა მხოლოდ იმას რომ არაეკონომიურად იცი მასალის გამოყენებაო ზომიერება, ზომიერება, ზომიერებაო, დამზუოდა)). მე კი ხმა ჩამესმოდა სულ “გული არ დააკლო ნენა, ჩუუმატე ყვავილი, ჩუუმატე..”
30 წელი გავიდა მას მერე, ახლაც იგივეს ვაკეთებ, უფრო მეტს ლხილისთვის რასაკვირველია. გვირგვინის მოხვევას რომ ვიწყებ და ხავსის ბურთს ვაგორგოლავებ ისევ იგივე გრძნობა მეუფლება და ყურში ისევ იგივე ხმა ჩამესმის “გული არ დააკლო ნენა, ჩუუმატე ყვავილი, ჩუუმატე..” რამდენი პატივსაცემი მასწავლებელი მყავდა, ყველაზე უკეთესი მაინც ჩემი უსწავლელი ბებია გამოდგა. ყოველთვის ამრთლებს: “გული არ დააკლო ნენა, ჩუუმატე….” – წერს ზურა შევარდნაძე სოციალურ ქსელში.

ფოტო #ზაქარიაჭელიძე

გააზიარეთ და მოიწონეთ სტატია:

მსგავსი სტატიები:

პოზნერმა საქართველო დაგეგმილზე ადრე დატოვა ვინ არის “ოცნების” კურდღელი? – გიორგი გახარია “იქით კარგად მართავენ კოვიდს, აქეთ, ჩვენკენაა პრობლემა”- ვახო სანაია ”როგორ შეიძლება იმაზე ლოცულობდე, ყველა განადგურდეს ვინც არ გიყვარს..’საიდან ამდენი ბოღმა, ამდენი შურისძიების წყურვილი.. “ქართულ ოცნებას” 2022 წელს მხოლოდ 1 შემწირველი ჰყავს – პრემიერ-მინისტრის სიმამრი ”ისე ნუ წარმოვიდგენთ, რომ სხვა ყველაფერი წესრიგში იყო და ახლა მხოლოდ გვარამიას საქმე გახდება შემაფერხებელი ფაქტორი” “ქოცი”, “ნაცი” თუ “ბაცი” ჩემთვის ყველა ერთია..ამ ქვეყანას შადიმან ბარათაშვილები არასდროს მოჰკლებია” უკრაინაში კიდევ ერთი ქართველი მებრძოლი დაიღუპა