საბინა ჩუდიჩი – საქართველო მძიმე დემოკრატიულ უკუსვლას განიცდის

საქართველო მძიმე დემოკრატიულ უკუსვლას განიცდის, – ამის შესახებ ევროპის საბჭოს საპარლამენტო ასამბლეაში საქართველოში არსებული სიტუაციის შესახებ მიმდინარე დებატებზე დეპუტატმა საბინა ჩუდიჩმა (ბოსნია და ჰერცეგოვინა) სიტყვით გამოსვლისას განაცხადა.

„როდესაც წევრ ქვეყანაში არსებულ ვითარებას განვიხილავთ, ჩვენ მას ვაანალიზებთ დემოკრატიული სტანდარტებისა და დემოკრატიის საფუძვლების შესაბამისად. შეგახსენებთ, რომ ეს საფუძვლებია: 1. კანონის უზენაესობა, თანასწორობისა და სამართლიანობის უზრუნველყოფა, კერძოდ, ხელისუფლების დანაწილებაზე დამყარებული. 2. თავისუფალი და სამართლიანი არჩევნები. 3. ადამიანის უფლებების დაცვა, ინდივიდუალური თავისუფლებების უზრუნველყოფა.

თუ საქართველოში არსებულ ვითარებას გავაანალიზებთ, კერძოდ იანვარში მიღებული რეზოლუციის შემდეგ დღევანდელ დღემდე არსებულ ვითარებას, უნდა განვაცხადოთ, რომ დემოკრატიის ყველა ამ საფუძველთან დაკავშირებით ვითარება უარესდება. ქვეყანა მძიმე დემოკრატიულ უკუსვლას განიცდის“, – განაცხადა საბინა ჩუდიჩმა.

მისი თქმით, არსებული ვითარება საქართველოს ყველა მოქალაქეზე ახდენს გავლენას.

„არ გვჭირდება იმის შეხსენება, რომ ძლიერი სამოქალაქო საზოგადოება ჯანსაღი დემოკრატიის ერთ-ერთი მთავარი ელემენტია. შექმნილ ვითარებაში საქართველოში სამოქალაქო საზოგადოების სივრცე მცირდება. პარლამენტმა არ გაიწვია კანონი „უცხოური გავლენის გამჭვირვალობის შესახებ“, რომელიც აქ მრავალი განხილვის საგანი იყო და ჩაანაცვლა FARA-ს ქართული ვერსიით, რომელიც უცხოელი აგენტების რეგისტრაციასთან დაუმორჩილებლობას კანონსაწინააღმდეგოდ აცხადებს. მონიტორინგის კომიტეტმა ვენეციის კომისიას ამ კანონის შესახებ გადაუდებელი მოსაზრების დაფიქსირება სთხოვა და მოვუწოდებთ ხელისუფლებას, რომ ნებისმიერი სახის რეკომენდაცია სრულად დააკმაყოფილოს. ასევე, კიდევ ერთი მნიშვნელოვანი ელემენტი მედიაა. სამწუხაროდ, საქართველოში მედია გარემო უარესდება“, – აღნიშნა ჩუდიჩმა.

დეპუტატმა აღნიშნა, რომ საქართველოში კიდევ ერთი შემაშფოთებელი საკითხი „ქვეყანაში დემოკრატიული ოპოზიციის სრული სპექტრის აკრძალვის მიზნით ხელისუფლების მიერ განხორციელებული ქმედებებია“.

„გარდა იმისა, რომ ოპოზიციის აკრძალვა სრულად არღვევს ქვეყნის მიერ ევროპის საბჭოს წესდების წინაშე აღებულ ვალდებულებას, ეს სამოქალაქო საზოგადოებისა და დამოუკიდებელი მედიისთვის სივრცის შეზღუდვასთან ერთად, საქართველოში ავტოკრატიის დამყარებას ნიშნავს. ის, თუ როგორ ვექცევით ოპოზიციას, როგორ ვეპყრობით მედიასა და სამოქალაქო საზოგადოებას, მთავარი კრიტერიუმია, რომლითაც ვაფასებთ ქვეყნის პროგრესს ან ამ შემთხვევაში სერიოზულ უკუსვლას. ჩვენ მოვუწოდებთ ხელისუფლებას, აღადგინოს დიალოგი და თანამშრომლობა ასამბლეასთან და ევროპის საბჭოსთან. ჩვენ თანამშრომლობისთვის მზად ვართ. ეს არ არის ის ანგარიში, რომლის წარდგენაც გვინდა რომ გავაგრძელოთ. ანგარიში, რომლის წარდგენაც გვინდა, არის ანგარიში პროგრესის შესახებ, ევროპის საბჭოსთან ურთიერთობების შესახებ და ანგარიში, სადაც დავინახავთ, რომ ჩვენი კოლეგები წამყვანი პარტიებიდან და ოპოზიციური პარტიებიდან აქ, ამ დარბაზში იქნებიან ამის განსახილველად“, – განაცხადა საბინა ჩუდიჩმა.

გააზიარეთ და მოიწონეთ სტატია:

მსგავსი სტატიები:

ზურაბიშვილი მელიას დაკავებაზე: არც დრო და არც ფორმა არ იყო საუკეთესო, მაგრამ მე არ ვწყვეტ ერთ წელიწადში ღარიბი მოსახლეობის რაოდენობა 14,3%%-ით გაიზარდა – რამდენი ადამიანი იღებს შემწეობას “იწყება ახალი მარათონი – მნიშვნელოვანი რეფორმებისა და ინიციატივების”-ნინო წილოსანი “მოვუწოდებთ ოფიციალურ თბილისს, საჯაროდ გაემიჯნოს რუსეთის ფედერაციის გადაწყვეტილებას…” – უკრაინის საგარეოს განცხადება ოზურგეთის ტექნოპარკში, საქართველოს ინოვაციებისა და ტექნოლოგიების სააგენტოს საგრანტო პროგრამის შვიდი გამარჯვებული გამოვლინდა “სამწუხაროდ მოხდა… მიხეილ სააკაშვილის სახელისა და გვარის ინსტრუმენტალიზაციას….რაც არ მიკადრია და არც ახლა ვიკადრებ”- ნიკა მელია დღეს უკვე აშკარაა, რომ საქართველო გახდა რუსეთის უკანა ეზო, სადაც დირექტივებს იღებენ კრემლიდან – მიხეილ სააკაშვილი მოქალაქის ცნობით ნანგრევებში 3 მცირეწლოვანი ბავშვი და 2 ზრდასრული მოყვა