ეკა ბესელია-მინდა გაგიზიაროთ დღეს ჩემი ვიზიტი სინდისის პატიმრებთან გლდანის ციხეში

10 სთ უკვე ვიყავით მე , ნათია მეზვრიშვილი და ქეთი აბულაძე ადგილზე , რათა რაც შეიძლება მეტი სინდისის პატიმარი გვენახა .

3 ადამიანზე მეტის ნახვის უფლებას არ იძლევიან , თუმცა შესაძლებელი გახდა მეტთან გვესაუბრა რადგან სამნი ვიყავით …

ციხეში შესვლის პროცედურა ტრადიციულად იწყება ჩემი ჯვრის ისტორიით.

ვიდრე მოვისმენ იგივე განმარტებას , მე ვიწყებ ფრაზით

– ჯვარს არ ვიხსნი, ოქმი შეადგინეთ

– გადავამოწმებთ ქალბატონო ეკა _ ტრადიციული პასუხი და იწყება რეკვა …

ვიღაც ეუბნება ალბათ , მაინც არ მოიხსნის და ოქმს ადგენენ….

შევდივართ მძიმე, რამდენიმე რკინის ბარიერის გავლის შემდეგ და პირველი გიორგი მინდაძე ამოიყვანეს .

არაჩვეულებრივმა , უსაყვარლესმა დედამ- ნანი წულაიამ მთხოვა რამდენიმე დღის წინ , რომ ჩემს შვილს გიორგის ნახვა უნდაო .

დამხვდა ასაკით პატარა , მაგრამ შინაგანად დიდი გიორგი მინდაძე

თავშეკავებული ემოციით , მაგრამ სიხარულით სავსე თვალებით …

ვისაუბრეთ , მკითხა გარეთ რა ხდებაო? ვუამბე , როგორ უყვართ და ეამაყებათ სინდისის პატიმრების გაუტეხელობა !!!

დედას მიეფერა ჩემს ბლოკნოტში დახატული გულით და ხელები დაადო , რომ სითბო გადმოეტანა ამ ფურცელზე …

ვუთხარი გავუზიარებ ამ სითბოსთქო

გამიზიარა მისი მოსაზრებები…ამას აღარ დავწერ , კონფიდენციალურია .

შემდეგ ანდრო ჭიჭინაძე ამოიყვანეს , ხშირად მითქვანს გასაოცარი ადამიანური თვისებებით , სიკეთის , სიმშვიდის, გონიერების მატარებელი ახალგაზრდაა.

ჩვენი საუბრები ფილოსოფიური და ანალიტიკურია მუდამ და მიუხედავად იმისა , რომ მეორე წელი იწურება ციხეში ყოფნის, არ შეეცვალა არც ღიმილი, არც სიკეთის სხივი …

გული მიკვდება , როდესაც ვუსმენ ამ უდანაშაულო , ნიჭიერ ხელოვან ახალგაზრდას, რომელიც ამ უჟანგბადო კედლებში უსამართლოდ გამოკეტეს …. და ასეა სხვებიც … ყველა საქმე ცარიელი ფურცლებით ….

– უზენაესი სასამართლო რამეს შეცვლის ? – მეკითხება ანდრო …

რა უნდა ვუპასუხო ?

……

დაკარგულ მართლმსაჯულებას ვჭირისუფლობთ :((

ამ დროს ვეფხვია კასრაძე ამოდის და მიუხედავად ამ უსამართლობისა- გახარებული და ენერგიული მხვდება… თეთრი ლამაზი ჯვარი მომაწოდა … მიყვება რა როგორ შეიძლება გაკეთდეს ….

ვხედავ რომ უყურებენ ყველაფერს და აანალიზებენ ყველა მნიშვნელოვან მოვლენას….

ამ შეხვედრის შემდეგ , ქვედა სართულზე ჩავდივარ , რადგან გიორგი ჩიკვაიძე ეტლით გადაადგილდება და ზემოთ ვერ ამოყავთ…

ეს ყველაზე ემოციურია ადამიანური განცდის თვალსაზრისით …

არადამიანურ მოპყრობას უტოლდება ეტლით ციხეში სარგებლობა და მით უფრო როდესაც იცი , რომ პოლიტიკური ანგარიშსწორების მსხვერპლი ხარ …

გიორგი მეუბნება რომ ყველაზე მეტად ახარებთ , როდესაც მათზე ვსაუბრობთ , ვახსენებთ , არ გვავიწყდება …

ვპირდები რომ ასეც იქნება , ვიდრე ციხეში რჩებიან …

გიორგის დედა, მშვენიერი ეკა ჩვენი საუბრის განსაკუთრებული ,ემოციური ნაწილია და გიორგის ეს ძალიან აძლიერებს

გარეთ საზოგადოების თანაგანცდა , მათი სახელების ხშირად გაზიარება – ჟანგბადია უჰაერო სივრცეში !

ეს ჭირდებათ !

ეს აძლიერებთ მათ !

ნახევარი დღე მიიწურა და დროც გაჩერებულია თითქოს ციხეში …

მე მათ ოპტიმიზმი და იმედი დავუტოვე … ასე მჯერა მათ რომ ვუყურებ და ამიტომ!

მე ციხეში მათ თავისუფლებას სულ სხვა სიძლიერით ვხედავ

გიორგი მინდაძის დახატული გული – ეს დედების გასაოცარი ბრძოლის ემოციაა

შეუძლებელია ამ სინერგიის დამარცხება …

გავაგრძელებთ მათზე ზრუნვას ვიდრე არ დატოვებენ სატუსაღოებს …