აგრარულ საკითხთა კომიტეტმა დღევანდელ სხდომაზე პარლამენტის თემატური მომხსენებლის ანგარიში მოისმინა თემაზე – „ინოვაციებისა და ტექნოლოგიების დანერგვა სოფლის მეურნეობაში“.
„ანგარიში მომზადდა იმ ძირეული პრობლემებიდან გამომდინარე, რომელიც ჩვენი ძალისხმევის მიუხედავად, კვლავაც რჩება სექტორში. ინოვაციებისა და ტექნოლოგიების დანერგვა და ამ მიმართულების გაძლიერება სოფლის მეურნეობაში – ეს საკითხი გამოიკვეთა იმ გამოწვევებიდან, რაც გვაქვს სოფლის მეურნეობის ეფექტიანობასთან დაკავშირებით. დღეს ამ სფეროში არის ცოდნის და ექსპერტიზის ნაკლებობა, ტექნოლოგიების გამოყენების დაბალი დონე, რელევანტური მონაცემების ნაკლებობა. აქედან გამომდინარე, შევისწავლეთ სოფლის მეურნეობის სექტორის მდგომარეობა სპეციფიკურად ტექნოლოგიების გამოყენების და სახელმწიფო პოლიტიკა სოფლის მეურნეობაში ტექნოლოგიების ხელშეწყობის კუთხით“, – განაცხადა თემატურმა მომხსენებელმა, აგრარულ საკითხთა კომიტეტის თავმჯდომარე ნინო წილოსანმა ანგარიშის წარდგენისას.
ნინო წილოსანმა აღნიშნა, რომ ბევრი მიღწევის პარალელურად, რაც სექტორშია და ამ მიმართულებით ბოლო 10 წელი რადიკალური კუთხით გარდამტეხი იყო, მაინც რჩება გამოწვევები, თუნდაც ის, რომ გამოიკვეთა ცოდნის და ექსპერტიზის ნაკლებობა.
მომხსენებლის თქმით, ჩატარებულმა გამოკვლევებმა ცხადყო, რომ დეფიციტურია სოფლის მეურნეობის თითქმის ყველა დარგის სპეციალისტი და, შესაბამისად, ფერმერების და აგრო სუბიექტებისთვის კვალიფიციური საკონსულტაციო სერვისების მიწოდება ვერ ხერხდება. ეს კი წარმოების დონეზე, პროდუქციის ხარისხზე და მაღალ თვითღირებულებაზე აისახება. ერთ-ერთ გამოწვევას წარმოადგენს ისიც, რომ დარგი განიცდის ტექნოლოგიების სიმცირეს.
იმ ძირითად მიგნებებს შორის, რომელიც მომხსენებელმა დაასახელა, არის დაბალი მოსავლიანობა, ტექნოლოგიების დანერგვის მთავარ ბარიერს წარმოადგენს ფერმერთა ცნობიერების დაბალი დონე, პროფესიონალი დარგობრივი სპეციალისტების დეფიციტი, ტექნოლოგიების ნაკლებობა, ფინანსური რესურსების ხელმისაწვდომობის საკითხი, ექსტენციის ცენტრებში თანამედროვე ტექნოლოგიებზე ხელმისაწვდომობის არარსებობა.
მისივე თქმით, ერთ-ერთი მნიშვნელოვანი ასპექტი სოფლის მეურნეობაში ახალგაზრდების ჩართულობის უზრუნველყოფაა.
„თუ არა ტექნოლოგიები და ინოვაციური მიდგომები, გაგვიჭირდება, ახალგაზრდების დაინტერესება. ამიტომ ტექნოლოგიების და ინოვაციების კომპონენტის გაჩენა სწორედ ახალგაზრდების დასაქმებასაც გულისხმობს“, – აღნიშნა ნინო წილოსანმა.
აგრარულ საკითხთა კომიტეტის თავმჯდომარის პირველი მოადგილის გელა სამხარაულის განცხადებით, ის რაც თემატურმა მომხსენებელმა წარმოადგინა, არის ფაქტობრივად სოფლის მეურნეობის დიაგნოზი.
„უდიდესი გამოწვევების წინაშე ვართ, ახალგაზრდობა არ არის დაინტერესებული აგრარულ სექტორში მუშაობით, თუ არ ჩავთვლით მეღვინეობის დარგს. ახალი ტექნოლოგიები კი ახალ მიდგომებს მოითხოვს. ყველა მიმართულებით გვაკლია სპეციალისტები. გარკვეული წახალისებებით ეს დეფიციტი უნდა შევავსოთ, რაშიც დიდია მთავრობის, შესაბამისი სამინისტროს როლი“, – აღნიშნა გელა სამხარაულმა.
როგორც გარემოს დაცვისა და სოფლის მეურნეობის მინისტრის პირველმა მოადგილემ გიორგი ხანიშვილმა განაცხადა, ეს კვლევა დაეხმარება სხვადასხვა მიმართულებით გადაწყვეტილებების მიღებასა და დაგეგმვაში, სხვადასხვა პროექტების განვითარებაში.
მიგნებებიდან გამომდინარე შემუშავებულია რეკომენდაციები. კომიტეტმა წარმოდგენილი ანგარიში ცნობად მიიღო.
bm.ge
მსგავსი სტატიები:
ნახეთ, როგორ გამოიყურება გაჭრილი სატვირთო გემი მასში მყოფი 4200 ავტომობილით
10 წლითა და 6 თვით პატიმრობა – გიორგი შაქარაშვილის მკვლელობაში მსჯავრდებულ არასრულწლოვნებს სასჯელი მიესაჯათ
“საქართველოში ყველანაირი ჰესი უნდა აშენდეს”
“წარმოუდგენელია, მერის ხელფასი თვეში 2,000 ლარს შეადგენდეს-ქალაქების მერებს ხელფასები გაუორმაგდებათ”
“საზიზღარი და ღრმად უპასუხისმგებლო” – იან კელი ღარიბაშვილის განცხადებაზე
ტემპერატურა 16 გტრადუსამდე აიწევს – როგორი ამინდი იქნება უახლოეს დღეებში საქართველოში
ქორწილი ომის ფონზე – ტყვიების წვიმის ქვეშ, უკრაინაში პოლიციელი და ჟურნალისტი შეუღლდნენ
ოზურგეთში სკოლის ავტობუსების მძღოლების გაფიცვის გამო ასეულობით ბავშვი კლასგარეშე დარჩა