ტიტე ბაქანიძე -“არჩევნებმა” ძველი დრო გამახსენა ჩვენს ბრიგადირად სულ “ბადიკას” რომ ირჩევდნენ

როგორც ბევრჯერ მითქვამს, სამფეხა და შუა ცეცხლი სოფელში 21 საუკუნეშიც აქტუალურია, მით უმეტეს ზაფხულში, მით უმეტეს წყლის სისტემა რომ გაფუჭებულია და შენი წყლის მარაგი აბანოს ვერ ყოფნის ჩასართავად…. ან ფერისცვალება ან მარიამობა დღეს რომ ტარო გინდა მოხარშო… რა სჯობია ნელ ცეცხლზე მოხარშულ ტაროს, პაწა ჭაჭის არაყს ან ავთოიეს სანთელს თუ ჩაარტყამ, ხომ მთლად კაი…

ახლაც, აგერ მანდარინის ძირში ჯორკოზე ვზივარ ურეკიდან დაღლილი მოსული და ველოდები წყლის გაცხელებას… მთელი დღე კუკუშკაზე ნამუშევარს ისევ ამეშალა ფიქრები…ყველა საჭირბოროტო საკითხი , მით უმეტეს წყლის პრობლემა, გინდა თუ არა პოლიტიკისკენ წაგიყვანს…

აგერ მალე არჩევნები იქნება, მარა რაღა არჩევნები, როცა ორბიტაზე მარტო მმართველი პარტიაა… ძველი დრო გამახსენდა, როცა ჩვენი, მე12 ბრიგადის ბრიგადირად სულ ჩვენს ბადიკას ირჩევდნენ, მერგოლურად მაყვალას, ბაბუაჩემ ტიტიკოს და ასე შემდეგ, მარა ერთი განსხვავება კი იყო, ისინი თავის საქმეს კარგად აკეთებდნენ და ყველა პატივს სცემდა სოფელში…ხოდა იმას ვამბობდი, აგერ კარზე არჩევნები მოგვადგა…ხოდა არჩევანი რომ გააკეთო კაცმა შეფასება უნდა დაიწყო ჯერ , ბრმად არ უნდა მისცე ხმა, შეფასება კი შენი უბნიდან უნდა დაიწყო, შენი სოფლიდან, შენი მეზობლების ყოფა ცხოვრება უნდა გაანალიზო… ხოდა თავისთავად ჯერ იმ პრობლემას ეხები ფიქრე ბში, ამ წუთს რომ გაწუხებს… თავისთავად წყლის სისტემის მოწყობა გამახსენდა, რომელიც წინა მერის მოღვაწეობის დროს დაიწყო… ნუ, მაშინდელ წინასაარჩევნო პერიოდში ორჯერ იყვნენ ამოსულები და ოქროს კოშკები დაგვიდგეს… ოსაო და ეხლა რაც პრობლემებია იმიტომ არის რომ საკრებულო ოცნებისაა და მერი არაო…ახლა მერიც ჩვენი აირჩიეთ და ყველაფერი კარგად იქნებაო, ერთ წელიწადში წყლის პრობლემაც მოგვარებული იქნება და გზისაცო, თავისი განათებებითო… სტადიონსაც აგიშენებთო…

მის მერე 4 წელი გავიდა …

ჯერ იყო და წელიწადზე მეტი რომ გავიდა, მივედით და წყალი მოვითხოვეთ, აღმოჩნდა რომ პროექტი დაუკარგავთ და კიდევ კარგი ძველ გამგებელს ჰქონდა ტელეფონში ის პროექტი, რომელიც ჩვენივე დაკვეთით გააკეთა ერთმა კარგმა კაცმა და მერე მერიას ვაჩუქეთ… მოკლედ ასე იყო თუ ისე, რამდენჯერმე დაჭრეს და შეკერეს ეს პროექტი და როგორც იყო დაიწყო მილების ჩაყრა… მაშინვე შევხედე რასაც აკეთებდნენ და რომ დავინახე ქვიშის მაგივრად ღორღი იყრებოდა, მაშინვე ვთქვი არ ივარგებს ასე მეთქი, მარა გამკიცხეს, მაგი და მისი ძმა სამსახურიდან რომ გამოყარეს იმიტომ გვიწუნებსო, არადა წესით გვერდში უნდა დამდგომოდნენ… კარგი ბატონო, გავჩერდი, არა აგერაა ფაქტი… ყველა მესამე , მეოთხე დღეს მილები სკდება სამი ოთხი დღე კი ვართ წყლის გარეშე, ხან რას დააბრალეს, ხან რას… ეხლაც თვეზე მეტია მოიტანეს ახალი მილები მარა შეცვლას ჯვარი წერია….

გზის პროექტიც გვქონდა, გარდამავალ პერიოდში რომ უნდა გაკეთებულიყო, მარა წყლის პრობლემა სანამ არ გადაწყდება არაო, ამით იმართლებენ თავს, ვითომ ჩემი ბრალი იყოს უხარისხოდ გაკეთებული საქმე… განათების საკითხიც არ დაძრულა ჯერ, არადა თემურა მესხიამ და მე რამდენჯერმე გადავღეჭეთ ყველაფერი, რა გვჭირდებოდა… შედეგი ჯერ არაფერი….

რაც შეეხება სტადიონს, ერთი დენის ბოძი ვერ თუ არ გადაიტანეს, და ვეღარ გავაკეთებთო თქვეს… ჩემი საკარმიდამოდან მივეცი მიწა რომ სტადიონი გაეკეთებინათ… ახალ წლამდე ყველაფერი დამთავრდებაო გვითხრეს, მარა აგვისტო იწურება და ჯერ კიდევ დაუმთავრებელია…პირველად რომ დაასხეს რკინა არ ჩააყოლეს და დიდი ჩხუბის შედეგ მოუწიათ მეორედ გაკეთება… მერე გვითხრეს, ეხლა ნოხს ვერ დავაგებთო, ისე ათამაშეთ ბავშვებიო… საინტერესოა ასეთ სტადიონზე თავის ბავშვებს თუ ათამაშებენ… არც განათებაა, მრიცხველი ვერ დადგეს ამდენი ხანი, არც კალათბურთის ფარი და არც ფრენ ბურთის სათამაშოა მოწყობილი… თუმცა თავს იმით ვიმშვიდებ, ის მიწა ჯერ გაფორმებული არ მაქვს მაგათთვის და სანამ არ დასრულდება არც გადავუფორმებ, ისე კი მგონი ვერც პროექტი ჩაბარდება და ვერც ფულს გამოწერენ….

მგონი თვალნათლივ ჩანს რა შეფასებაც უნდა მიეცეს ჯერ კიდევ არსებულ მუნიციპალიტეტის მთავრობას…

ცოტა უფრო გლობალურად რომ განვავრცოთ, სოფელში ორი საშუალო სკოლაა და არცერთი არ ფუნქციონირებს, გაურკვეველ დრომდეა რემონტში… სპორტდარბაზმა ხომ საერთოდ მოგვჭამა ჭირი…

აღარაფერს ვამბობ დიდთოვლობაზე…

აგერ, ქალაქის ცეტრში რომ კუბოები დაგვიდგეს ორი მილიონით და მერე კიდე დიდი ჩხუბოს მერე კიდე მილიონი რომ გატანაზე მიადღლიზეს ეს ცალკე თემაა…

ეხლა ვინც მოდის მერად, იმას არ ვიცნობ, არ ვიცი მისი მართვის სტილი და პოლიტიკური გამოცდილება, ამიტომ ვერც შევაქებ და ვერც ვაძაგებ, მარა რომ გადავხედე საკრებულოს წევრობის კანდიდატებს, დიდი იმედი არ უნდა მქონდეს რომ რაიმე გამოსწორდება… რატომ? იმიტომ რომ ჩემი უბნის პრობლემებზე კი გელაპარაკეთ, მარა აგერ ნაღობილევში , მეუღლის უბანში, იქაც გააკეთეს წყალი და ისეთი საშინელი რაღაცაები მოყვება, დალევა კი არა დაბანა ეშინია ხალხს…

ვისი ბრალია ეს და კიდევ ბევრი სხვა თუ არა მოქმედი მერის? ხოდა ეს მერი შტაბის უფროსად ყავს მომავალს და მისი გუნდი შტაბის წევრებად…ხოდა რანაირადმექნება იმის იმედი რომ რაიმე გამოსწორდება? არ ვიცი, რა ვიცი ….

კიდევ ბევრი რამ წამომიტივდა გონებაში, მაგალითად სახურავების დარიგება, მაგალითად მეწყერიანი სახლების თემა და ბევრი სხვა, მარა, წყალი გაცხელდა და ეხლა შევწყვიტო უნდა ამაზე ფიქრი და მსჯელობა…. გაგრძელება რომ იქნება დარწმუნებული ვარ ჩვენი წყალის სისტემიდან გამომდინარე….

აბა დროებით…