![](http://guriismoambe.com/wp-content/uploads/2021/03/162885156_248933960268044_3692004258169332428_o-1-300x213.jpg)
დახვრეტილი აჯანყებულის ნიკოლოზ კახთ აბაშიძის ძმა- ანტონ აბაშიძე უკრაინის ეკლესიამ 2011 წელს წმინდანად შერაცხა.
ნიკოლოზ აბაშიძის ცოლმა-თამარ ვახვახიშვილმა უსინათლოთა ქართული ანბანი შექმნა….
![](http://guriismoambe.com/wp-content/uploads/2021/03/162885156_248933960268044_3692004258169332428_o-197x300.jpg)
1924 წელს დახვრეტილ აჯანყებულთა არასრული სიები გამოვაქვეყნეთ და დასაწყისშივე აღვნიშნეთ, რომ შინაგან საქმეთა სამინისტროს არქივში არსებულ ფონდებში დახვრეტილ აბაშიძეთა რაოდენობა 22-ს შეადგენს.
ჟან შარდენის ქართულ-ფრანგულ აკადემიას გამოეხმაურა ნიკოლოზ ილიას ძე აბაშიძის (1869-1924) შვილიშვილი, ქალბატონი ქეთევან ლომიძე, რომელმაც საინტერესო ამბები და ფოტოები მოგვაწოდა კახთ აბაშიძეების, ვახვახიშვილების და აფხაზების საგვარეულო ალბომებიდან.
![](http://guriismoambe.com/wp-content/uploads/2021/03/162622922_248934560267984_6556740342119145785_o-217x300.jpg)
ნიკოლოზ კახთ აბაშიძე- კახეთის თავადი და ქველმოქმედი (ქეთევან ლომიძის დედის მამა) ეროვნულ-დემოკრატიული პარტიის წევრი იყო, რომელიც მატერიალურად ეხმარებოდა ქაქუცა ჩოლოყაშვილის „შეფიცულთა“ რაზმს. მას ჰყავდა ძმები: ქართველთა შორის წერა-კითხვის გამავრცელებელი საზოგადოების წევრი, ასევე ქაქუცა ჩოლოყაშვილის თანამოაზრე და შემწე- ზაქარია (შაქრო) აბაშიძე (1868-1923) და უფროსი ძმა, დიმიტრი აბაშიძე (1867-1943), რომელიც იყო მაღალი იერარქიის საეკლესიო პირი, მოღვაწეობდა როგორც საქართველოში, ასევე უკრაინაში.
2011 წელს უკრაინის მართლმადიდებლურმა ეკლესიამ ანტონ აბაშიძე (დიმიტრი კახთ აბაშიძე) წმინდანად შერაცხა. დაკრძალულია კიევო-პეჩორის ლავრაში.
![](http://guriismoambe.com/wp-content/uploads/2021/03/162869904_248934310268009_6239849196550035620_n-225x300.jpg)
ქეთევან ლომიძის ბებიაზე- თამარ ვახვახიშვილი-აბაშიძეზეც (1875-1936) უნდა ვთქვათ ორიოდე სიტყვა, რომელიც ღარიბი ოჯახების დიდი შემწე და მფარველი იყო. მან თელავში ჭრა-კერვის კურსები დააარსა, სადაც ღარიბ ბავშვებს ხელობას ასწავლიდა. იყო ქართველთა შორის წერა-კითხვის გამავრცელებელი საზოგადოების აქტიური წევრი, თანამშრომლობდა ჟურნალ „საქართველოს ქალთან“.
თამარ ვახვახიშვილმა შეადგინა უსინათლოთათვის ქართული ანბანი (1930 წელს), ასევე ის ხელმძღვანელობდა ახლადაარსებულ უსინათლოთა სკოლას.
თამარ ვახვახიშვილის დედა იყო ულამაზესი ნინო აფხაზი-ვახვახიშვილი (დავით აფხაზისა და დარუხან დადეშქელიანის შვილი), რომელთა სახლი და მამულები დახატა ელენე ახვლედიანმა თავის ცნობილ ტილოში „ობოლაანთკარი“.
![](http://guriismoambe.com/wp-content/uploads/2021/03/163025498_248934126934694_3335967942581192815_o-300x217.jpg)
1924 წელს დახვრეტილი ნიკოლოზ ილიას ძე კახთ აბაშიძის შვილიშვილმა ქალბატონმა ქეთევან ლომიძემ მრავალი საინტერესო, დღემდე უცნობი ისტორია გაგვანდო, რომლის სრულ ვარიანტს ჟან შარდენის ქართულ-ფრანგული აკადემია წიგნში შეიტანს და წარუდგენს ქართველ და ფრანგ მკითხველს.