საქართველოს ხორბლისა და ფქვილის მწარმოებელთა ასოციაციის აღმასრულებელი დირექტორის, ლევან სილაგავას განცხადებით, ერთი ტომარა ფქვილის ფასი 13 ლარით შემცირდა.
როგორც მან „ინტერპრესნიუსთან“ საუბრისას განაცხადა, ფასის შემცირება ორმა ფაქტორმა განაპირობა, ე.წ. უკრაინის დერეფანმა და რუსეთში ხორბლის უხვმა მოსავალმა.
„მსოფლიო ბაზრებზე ხორბლის ფასი შემცირდა. ხორბლის ფასი 2-3 თვის წინ პიკზე იყო 400 დოლარის ფარგლებში, დღეს კი შემოსატანი ხორბლის ფასი 320 დოლარის ფარგლებშია. ასევე, პიკის დროს 1 ტომარა პირველი ხარისხის ფქვილის ფასი 85 ლარი იყო, დღეს არის 72 ლარის ფარგლებში. შესაბამისად, ეს არის ასახული ბაზარზე. რამდენადაც ცნობილია, ჩვენმა კოლეგა პურის მწარმოებლებმა პურის გარკვეულ სახეობებზე ფასი 10 თეთრით შეამცირეს. ეს ის ინფორმაციაა, რაც პრესიდან ვიცით.
ფქვილის ფასის შემცირება განაპირობა იმან, რომ რამდენიმე თვის წინ უკრაინის ე.წ.ხორბლის დერეფანი ამუშავდა. იცით, რომ სერიოზული პრობლემა იყო უკრაინის პორტებიდან მარცვლეულის გამოტანა, მათ შორის, ხორბლის, იქიდან გამომდინარე, რომ საომარი მოქმედებები მიმდინარეობდა. შესაბამისად, ამ დერეფნის ამუშავებამ შესაძლებლობა მისცა მსოფლიო ბაზარს, რომ მიწოდებულიყო ხორბალი და სხვა მარცვლეული კულტურები. ამან დააბალანსა მსოფლიო ბაზარზე ვითარება. აგრეთვე, დაიწყო ხორბლის ახალი მოსავლის მიღება რუსეთში, სადაც რეკორდული მოსავალია.
შესაბამისად, ორმა ფაქტორმა – უკრაინის ე.წ.დერეფანმა და რუსეთში ხორბლის ძალიან დიდმა მოსავალმა გამოიწვია ის, რომ ფასების კლება დაიწყო. გაიაფდა მცურავი ბაჟიც, ყოველკვირეული ბაჟი. როდესაც 2-3 თვის წინ 100 დოლარზე მეტი იყო, პიკზე 140 დოლარი, დღეს არის 45 დოლარი. საკმაოდ დიდი კლება მოხდა. ამ ყველაფერმა მოგვცა საშუალება ხორბლის შემოტანა განახლებულიყო“,- განაცხადა სილაგავამ.
მისივე თქმით, ე.წ. ხორბლის დერეფნის, პირველ მონაკვეთს მუშაობის ვადა ნოემბრის თვეში გადის, რამაც შესაძლოა ფასის სტაბილურობას გარკვეული რისკები შეუქმნას.
„წისქვილკომბინატების გარკვეული ნაწილი, რომელიც გაჩერებული იყო ამუშავდა. დიდი წისქვილები უყურებენ, რომ თუ ეს ტენდენცია გაგრძელდა, მათაც შეეძლებათ ამუშავება, რაც ხორბლის მარაგების შექმნისთვის ძალიან კარგი წინაპირობაა. უსაფრთხოებისთვის გვჭირდება ეს ყველაფერი.
ე.წ. ხორბლის დერეფნის პირველ მონაკვეთს მუშაობის ვადა გადის ნოემბრის თვეში. ეს გასაგრძელებელია. ნოემბრის თვეში ამ ვადის გასვლასთან დაკავშირებით შესაძლოა, გარკვეული რისკები შეიქმნას ბაზარზე. რუსეთის პრეზიდენტმა უკვე დააანონსა და განაცხადა, რომ ისინი უკმაყოფილოები არიან იმით, რომ ხორბლის დერეფნის მუშაობასთან ერთად, რუსეთს არ ეძლევა საშუალება, რომ მათ შორის რუსული ხორბლის აქტიური გატანა მოხდეს მსოფლიო ბაზარზე, ასევე სასუქების.
მემორანდუმი იყო გაეროსთან, რომ შეუფერხებლად მომხდარიყო რუსული ხორბლის გატანა. ხორბალი სანქცირებული არ არის, პრობლემა იყო ის, რომ რუსული ტვირთით დატვირთული გეგმების შესვლაა შეზღუდული პორტებში, მათ შორის ამსტერდამის, ჰამბურგის, ტრანსპორტირება არის შეზღუდული. აქედან გამომდინარე შესაძლოა, რომ ე.წ. ხორბლის დერეფანთან დაკავშირებით რისკები შეიქმნას. თუ გადაწყდა პოლიტიკურად და გაგრძელდება ე.წ. ხორბლის დერეფნის მუშაობა, მაშინ სტაბილური მდგომარეობა იქნება, თუ დაიბლოკება ეს დერეფანი, საომარი მოქმედებები გაგრძელდება ოდესის მხარეს, მაშინ შეიძლება საფრთხე შეექმნას და სხვაგვარად განვითარდეს მოვლენები“, – აღნიშნავს სილაგავა.
მსგავსი სტატიები:
საქართველოში კორონავირუსით კიდევ 20 ადამიანი გარდაიცვალა — StopCoV
გურიაში კოვიდით რეინფიცირების შემთხვევა დადასტურდა _ “2 თვის წინ მოვიხადე და ისევ დამემართა”
ჰერპეტოლოგი: თბილისში წელს 4 გიურზა დავიჭირეთ
ურეკელების მიმართვა ვახტანგ გომელაურს
მილანი, პრაღა, ათენი, სალონიკი, ლარნაკა და მემინგენი – Wizz Air-ის ბაზა ქუთაისში ბრუნდება
მსახიობი ჯერალდ ბათლერი უკრაინელ ლტოლვილებს 10 მილიონი დოლარით დაეხმარება
“ლაზი ვორე” – როგორ ცდილობენ ენის გადარჩენას თურქეთში ლაზები
ოზურგეთში ქუჩის კალათბურთის ტურნირი ჩატარდა