“მსგავსი გადაწყვეტილება მოქალაქეებს უკრძალავს წინასაარჩევნოდ პოზიციის დაფიქსირებას და „აპატიმრებს ჩვენს სიტყვებს“- ვახუშტი მენაბდე ანტიკორუფციული ბიუროს მიერ მიღებულ გადაწყვეტილების შესახებ

კონსტიტუციონალისტი ვახუშტი მენაბდე ეხმაურება ანტიკორუფციული ბიუროს მიერ მიღებულ გადაწყვეტილებას და აცხადებს, რომ მსგავსი გადაწყვეტილება მოქალაქეებს ფაქტობრივად უკრძალავს წინასაარჩევნოდ პოზიციის დაფიქსირებას და „აპატიმრებს ჩვენს სიტყვებს“.

კერძოდ, ანტიკორუფციულმა ბიურომ „საერთაშორისო გამჭვირვალობა – საქართველო“ და მისი დირექტორი, ეკა გიგაური, საარჩევნო მიზნების მქონე სუბიექტად ცნო. ანტიკორუფციული ბიუროს თანახმად, გადაწყვეტილების მოტივი ისაა, რომ მათი ჩართულობა ამომრჩეველთა ინფორმირებისა და ქვეყნის პროდასავლური კურსის მხარდამჭერ კამპანიებში ემსგავსება ოპოზიციური პოლიტიკური პარტიების რიტორიკას.

ვახუშტი მენაბდე განმარტავს, რომ ბიუროს მიერ საარჩევნო მიზნების მქონე სუბიექტად ცნობის ნორმის ასეთი ინტერპრეტაცია სამართლის განმარტების ყველა წესს ეწინააღმდეგება. მენაბდის თქმით, ხელისუფლებამ აბსურდი მოქმედ წესად აქცია.

„ხომ გახსოვთ, 2012 წელს მაშინდელი ხელისუფლება სატელიტურ ანტენებს რომ აპატიმრებდა? ანტიკორუფციული ბიუროს დღევანდელი გადაწყვეტილებით „ქართულმა ოცნებამ“ სიტყვები დააპატიმრა.

კანონმდებლობაში გვაქვს ასეთი ცნება: „განცხადებული საარჩევნო მიზნის მქონე პირი“. პირი ასეთია, როცა:
(1) სურს არჩევნების გზით ხელისუფლებაში მოსვლა;
(2) აცხადებს ამას საჯაროდ და
(3) ხელს უწყობს ამის სასარგებლოდ საზოგადოებრივი აზრის ჩამოყალიბებას.

ასეთ სუბიექტებზე ვრცელდება ფინანსური გამჭვირვალობის ყველა წესი და შეზღუდვა, რაც პარტიებზე. ამ ჩანაწერის მიზანი მარტივადაა გასაგები: კანონს სურს, რეგულირების ქვეშ მოაქციოს ყველა, ვინც ცდილობს არჩევნების მეშვეობით ხელისუფლებაში მოსვლას. ანუ თუ პარტიად რეგისტრირებული არ ხარ, მაგრამ გაქვს ის მიზნები, რაც აქვს პარტიას – ეს კანონი არ მოგცემს საშუალებას, თავი აარიდო შეზღუდვებს და გამჭვირვალობის მოთხოვნებს.
ახლა როგორ განმარტა ეს ბიურომ (სასამართლოზე დაყრდნობით): მან თქვა, რომ განცხადებული საარჩევნო მიზნის მქონე პირად ყოფნა, ანუ ხელისუფლებაში მოსვლის სურვილი, მხოლოდ ის კი არ არის, როცა საკუთარი თავის სასარგებლოდ ცდილობ საზოგადოებრივი აზრის ფორმირებას, არამედ ისიც, როცა რომელიმე პოლიტიკური ძალის წინააღმდეგ აკეთებ საჯარო განცხადებას. ეს განცხადებები პირს აქცევს პოლიტიკური პარტიის ეკვივალენტ სუბიექტად და მასზე გაავრცელა ყველა ის წესი, რაც პარტიაზე ვრცელდება.

ბიუროს მიერ ნორმის ასეთ ინტერპრეტაცია სამართლის განმარტების ყველა წესს ეწინააღმდეგება. ეს ნიშნავს, რომ ნებისმიერი ადამიანი, ვინც საჯაროდ იტყვის: „ხმა არ მისცეთ ქოცებს!“ ან „ხმა არ მისცეთ ნაცებს!“, იძენს განცხადებული საარჩევნო მიზნის მქონე პირის, ანუ ფაქტობრივად არარეგისტრირებულ პარტიის სტატუსს.

ახლა ის ვთქვათ, რა არის ეს შეზღუდვები (არასრული ჩამონათვალი), რაც ასეთ პირებზე ვრცელდება (იმ ნაწილში, რა ნაწილშიც, რაშიც ისინი მოქმედებენ, როგორც განცხადებული საარჩევნო მიზნის მქონე პირები):

•  საერთაშორისო შემოწირულების (როგორც ფულადი, ისე მომსახურება, ან მის ნაცვლად ხარჯის გაღება, არამატერიალური ფასეულობა, ფასდაკლება) მიღების აკრძალვა;
• ყველა შემოწირულების დადეკლარირება;
• 5000 ლარზე მეტის ღირებულების საჩუქრის გაცემა;
• კრედიტის აღების ლიმიტი;
•  საქართველოს მოქალაქის ნებისმიერი რამით დაინტერესება, უფასო მომსახურება იქნება ეს თუ რამის გადაცემა, დაპირებაც კი.

„ქართული ოცნება“ ასეთი წესებით ცდილობს გააჩუმოს ნებისმიერი პირი, ვისაც საჭიროდ ჩათვლის. ის მოქალაქეებს ფაქტობრივად უკრძალავს წინასაარჩევნოდ პოზიციის დაფიქსირებას. ის აპატიმრებს ჩვენს სიტყვებს“, – წერს Facebook-ზე ვახუშტი მენაბდე.

გააზიარეთ და მოიწონეთ სტატია:

მსგავსი სტატიები:

დღეს საღამოს 9 საათიდან გადაადგილება აკრძალულია “საჭიროა უკრაინა და საქართველო ნატოში შევიყვანოთ” ბათუმში კორონავირუსით 20 წლის ქალი გარდაიცვალა ”ეს მთავრობა არის მოძალადე, სიძულვილის ენის გამავრცელებელი..არ უყვარს ადამიანი..-ქავთარაძე ამერიკული ბიოფარმაცევტული კომპანია რუსეთში ფილერსა და ბოტოქსს აღარ შეიტანს ნავთობი იაფდება – რა ღირს საწვავი საქართველოში “ევროკავშირი ჩვენი თვითმიზანი კი არ არის….ევროკავშირი იმიტომ მინდა…რომ სამართლიანობა იყოს დაცული”-ყაველაშვილი ხელისუფლება კონსტიტუციის წინააღმდეგ წავიდა და ქვეყანას საბოტაჟი გამოუცხადა – ლომჯარია