ხუთი უმსხვილესი ყავის იმპორტიორი კომპანიიდან ორის წილებს რუსეთის მოქალაქეები ფლობენ

2024 წლის იანვარ-აგვისტოში საქართველომ 24.3 მილიონ დოლარზე მეტი ღირებულების 4 945 ტონა ყავა იყიდა. აღსანიშნავია ისიც, რომ წელს ქვეყანას 1 კგ. ყავის საშუალო საიმპორტო ფასი 4.9 დოლარამდე გაუძვირდა.

„ბიზნესპრესნიუსი“ დაინტერესდა კომპანიებით, რომლებიც ყავის იმპორტს ახორციელებენ. საქსტატის მიერ ჩვენი კითხვის საპასუხოდ მოწოდებული ინფორმაციის თანახმად, 5 უმსხვილესი იმპორტიორი კომპანია ასე გამოყურება: „ომპეტი“, „კინგ ორიგინალი“, კარენ ტრეიდი“, PB Distribution და „პრიმო გრუპი“. აღნიშნული კომპანიებიდან ორის წილებს რუსეთის მოქალაქეები ფლობენ.

უფრო კონკრეტულად, სამეწარმეო რეესტრის მონაცემებზე დაყრდნობით გთავაზობთ, ვის ეკუთვნის ჩამოთვლილი 5 კომპანია:

„ომპეტი“ სამეწარმეო რეესტრში 1998 წელს არის რეგისტრირებული. მისი დირექტორი და 100%-იანი წილების მფლობელი ალექსანდრე სიყმაშვილია.
„კინგ ორიგინალი“ ბაზრაზე 2012 წლიდან ოპერირებს. კომპანიის დირექტორი ნუგზარ სურმანიძეა. რაც შეეხება წილებს, 90%-ს რუსეთის მოქალაქე მარტიკ ანდრასიანი ფლობს, ხოლო დარჩენილ 10%-ს ამირან ბარამიძე.
„კარენ ტრეიდი“ 2017 წელს დარეგისტრირდა. კომპანიის დირექტორად კარენ კარაპეტიანი ფიქსირდება. „კარენ ტრეიდის წილების 100%-ს აღნიშნული პირი ფლობს.
PB Distribution სამეწარმეო რეესტრში 2011 წელს არის რეგისტრირებული. მისი დირექტორი თეიმურაზ კოკაიაა. წილებს კი თეიმურაზ და ფატმან კოკაია თანაბრად იყოფენ.
„პრიმო გრუპი“ 2022 წელს დარეგისტრირდა, დირექტორად ასლან ქამაშიძე გვევლინება. კომპანიის წილების ნახევარს რუსეთის მოქალაქე კარენ დავთიანი ფლობს, ხოლო მეორე ნახევარს გრიგორ ჩახმახჩიანი განკარგავს.

bpn.ge

გააზიარეთ და მოიწონეთ სტატია: