მოხსენიებულია თუ არა შემოქმედი 1035 წელს გადაწერილ დავითნში

მოსე ჯანაშვილი, რომლის რედაქციითაც გამოქვეყნდა ვახუშტი ბატონიშვილის „საქართველოს გეოგრაფია“ შემოქმედთან დაკავშირებულ ინფორმაციაში, სქოლიოში აღნიშნავს შემდეგს – „ჩვენ გვგონია, დავით ჯიბისძე მის მიერ 1035 წელს ტყავზე გადაწერილს დავითნში იხსენიებს ამ შემოქმედს, როდესაც ამბობს: „ბრძანებითა ეზრა მამადმთავრისა შემოქმედისა და მწყალობელისა ჩემისაითა დავწერე“.

P.S. ამ შემთხვევაში ჯანაშვილი საუბრობს ანტიოქიაში მოღვაწე ტაოელ მწიგნობართა ცნობილი გვარის, ჯიბისძეების წარმომადგენლების იოანე და დავით ჯიბისძის მიერ 1035 წელს შატბერდში გადაწერილ დავითნზე – „ამისთჳსცა მე, დავით ჯიბისძემან, ტჳრთმძიმემან ცოდვითა და უდებმან სინანულითა, დავწერე ესე წიგნი ბრძანებითა ეზრა მამად მთავრისა შემოქმედისა და მწყალობელისა ჩემისაჲთა, რ(ომ)ლისა დამეკადრა და მერწმუნა საწყალობელი ს(უ)ლი ჩ(ე)მი.“

ეზრას (ეზრა წინასწარმეტყველის) მონასტერი გახლდათ სირიაში, შავ მთად წოდებულ ადგილზე ანტიოქიასთან ახლოს. შავი მთის რვა მონასტერში მოღვაწეობდა სამოცამდე ქართველი ბერი, მათ შორის: გიორგი ათონელი, გიორგი მცირე, გიორგი შეყენებული და ა.შ.

იოანე ზოსიმეს მიერ შედგენილ ენციკლოპედიურ/ლიტურგიკული კრებულში არის ერთ-ერთი უძველესი ასტროლოგიური ტრაქტატის თარგმანი – ეზრა წინასწარმეტყველის „კალანდაჲ“. იოანე ზოსიმეს მიერ შექმნილ ხელნაწერშივე არის თხზულება „ქაბაჲ და დიდებაჲ ქართულისა ენისაჲ“. ასევე დანიელის და ეზრას წინასწარმეტყველებაა ბოლო ჟამის (აპოკალიფსის) უკანასკნელ იმპერიაზე.

– „საქართველოს გეოგრაფია“ დაიბეჭდა ვახუშტი ბატონიშვილის ხელნაწერ დედნით, რედაქცია მ. გ. ჯანაშვილისა – 1904 წელი.

– „მასალები ორონტის ანტიოქიის დასავლეთით მდებარე ქართული მონასტრების კვლევა-ძიებისათვის“ ვ. ჯობაძე – 2017 წელი

– „ქართული ხელნაწერი წიგნი“ – 2010 წელი

– Wikipedia free online encyclopedia