“მოთხოვნა არის ძალიან ჰუმანური და სამართლიანი…მინდა იმედი მქონდეს, რომ მასთან დაშვებული იქნება ექიმი, რომელიც მას სჭირდება”-ნიკა მელია მიხეილ სააკაშვილზე

„ნაციონალური მოძრაობის” თავმჯდომარის, ნიკა მელიას განცხადებით, საქართველოს მესამე პრეზიდენტის მიხეილ სააკაშვილის მიერ ხელმეორედ უვადო შიმშილობის დაწყება მისი სიცოცხლისა და ჯანმრთელობისთვის სახიფათოა. როგორც მელიამ თბილისის საქალაქო სასამართლოში ჟურნალისტებს განუცხადა, იმედოვნებს, რომ მიხეილ სააკაშვილთან ციხეში ექიმს შეუშვებენ.

„ჩვენ ვთანხმდებით, რომ საუბარია არა პატიმარზე, არამედ მძევალსა და ტყვეზე. რატომ ვუწოდებ მიხეილ სააკაშვილს ტყვეს და არა პატიმარს? ტყვე ხარ, როდესაც 4 კედელში ხარ გამოკეტილი ერთი ადამიანის ნება-სურვილსა და „ხუშტურზე“. ტყვე ხარ, როდესაც სამედიცინო მომსახურების მიღების შესაძლებლობა არ გეძლევა. ტყვე ხარ, როდესაც კუთვნილი უფლებების რეალიზების შესაძლებლობა არ გეძლევა. მაგალითისთვის, სატელეფონო ზარების განხორციელება და უამრავი სხვადასხვა უფლება, რაც პატიმარს აქვს.

მიხეილ სააკაშვილის მოთხოვნა და უკიდურეს ზომაზე წასვლა დღეს ხელმეორედ, მას შემდეგ, რაც მან 50 დღე იშიმშილა და პრაქტიკულად, ფატალურად დაასრულა შიმშილობის უმძიმესი აქტი, რა თქმა უნდა, მისი სიცოცხლისთვის სერიოზულ საფრთხეს შეიცავს. მოთხოვნა არის ძალიან ჰუმანური და სამართლიანი, შეუშვან მასთან კვალიფიციური, პროფესიონალი სამედიცინო სამსახურის წარმომადგენელი. ის, რასაც საზოგადოება უკვე თვეების განმავლობაში ითხოვს. მინდა იმედი მქონდეს, რომ მასთან დაწესებულებაში ექიმი დაშვებული იქნება, რომელიც მას სჭირდება იმისთვის, რომ მისი სიცოცხლე და ჯანმრთელობა დაცული იყოს“,- განაცხადა მელიამ.