“საქართველოს არჩევანი იყო და არის ევროპა” | დეკანოზი გიორგი მამალაძე ევროკავშირის ქვეყნების მართლმადიდებელ პატრიარქებს მიმართავს

ე.წ. ციანიდის საქმეზე მსჯავრდებული დეკანოზი, გიორგი მამალაძე პენიტენციური დაწესებულებიდან ევროკავშირის ქვეყნების მართლმადიდებელ პატრიარქებს მიმართავს. მიმართვა დეკანოზმა გლდანის ციხიდან “ინტერპრესნიუსს” გაუგზავნა.

მიმართვაში დეკანოზი წერს, რომ საქართველოს ხელისუფლება ხალხის ნებას არ გამოხატავს და ასეთი მმართველობის გამო, მოქალაქეები არ უნდა დაისაჯოს. ის ევროკავშირის ქვეყნების მართლმადიდებელ პატრიარქებს სთხოვს, “არ დაიშურონ ევროპელი ხალხისა და მათი მთავრობების წინაშე შუამდგომლობები”.

“უწმინდესნო, უნეტარესნო და მაღალუსამღვდელესნო, მამამთავარნო, ეკლესიათა მეთაურნო ახალი რომისა და მსოფლიოს – ბართოლომეოს,რუმინეთისა – დანიელ, ბულგარეთისა -ნეოფიტე, კვიპროსისა ქსიზოსტომოს, ელადისა იერონიმე, პოლონეთისა საბა, ჩეხეთისა და სლოვაკიისა – როსტისლავ, ფინეთისა – ლეონ, წმინდანო მეუფენო, თხოვნა რომლითაც მოგმართავთ, ნაკარნახევია სამშობლოს სიყვარულით, რომელიც ყოფნა-არ ყოფნის ზღვარზე დგას, ამიტომ ვიმედოვნებ ჩემს გაბედულებას ბედნიერებად არ ჩამითვლით.

მოგმართავთ საქართველოს მართლმადიდებელი ეკლესიის მღვდელმსახური, რომელიც საქართველოს ეკლესიის პრორუსული ადმინისტრაციისა და საქართველოს მმართველი ხელისუფლების გარიგებით 5 წელზე მეტია (რომლიდანაც 3,5 საწოლს ვარ მიჯაჭვული) უკანონო ტყვეობაშია.

თუმცა, დღეს მოგმართავთ არა როგორც ტყვე, არამედ, როგორც უძველესი იბერიის შვილი, რომლის სამშობლო უმნიშვნელოვანესი ისტორიული გადაწყვეტილების მოლოდინშია.

თქვენთვის კარგადაა ცნობილი საქართველოს და საქართველოს ხალხის ქრისტიანობამდელი თუ ქრისტიანობის შემდგომი ისტორია, რომლის არჩევანი იყო და არის ევროპა – ევროპული ცივილიზაცია.

საქართველო ევროპელთა პირველი სამოსახლოა – ღვინის, ხორბლის 27 სახეობიდან 12-ის, ყველის, მედეას და ოქროს საწმისის, ფარნავაზისა და სამსახოვანი ანბანისა. ფარსმან დიდის სამშობლომ მეოთხე საუკუნეში, წმინდა მეფე მირიანის ზეობისას ქრისტიანობის სახელმწიფო რელიგიად გამოცხადებით, ჭეშმარიტ სარწმუნოებასთან ერთად, პოლიტიკურად ცალსახა ევროპული არჩევანი გააკეთა. საქართველოს ხალხი ამ არჩევანს წმინდა მეფე ვახტანგ გორგასლის ანდერძის თანახმად „ერთგულება ქრისტიანობისა, სიყვარული ბერძენთა“ (ევროპელთა) – უშურველად იცავს.

წმინდა იოანე თორნიკე ერისთავი, წმინდა დავით აღმაშენებელი – ქართველი ჯვაროსანი, წმინდა თამარ მეფე – კონსტიტუციური მონარქიის კონტურთა მსოფლიოში პირველი მომხაზველი, წმინდა გიორგი მთაწმინდელი, წმინდა ილარიონ ქართველი – ბალკანელ ევროპელთა ანბანის თანაავტორი, წმინდა ანთიმოზ ივერიელი – რუმინთა განმანათლებელი, წმინდა გრიგოლ ფერაძე, პეტრე იბერი, სულხან-საბა ორბელიანი, წმინდა ილია ჭავჭავაძე, წმინდა ამბროსი ხელაია, კატენში სხვა ევროპელებთან ერთად დახვრეტილი ქართველი ოფიცრები, აი, მცირე ჩამონათვალი იმ ქართველთა, რომელნიც სულიერ, ინტელექტუალურ და ფიზიკურ ღვაწლთან ერთად საკუთარ სიცოცხლესაც არ იშურებდნენ ევროპული ცივილიზაციის დასაცავად.

წმინდა მამამთავარნო, როგორც ზემოთ აღვნიშნეთ, საქართველო უმნიშვნელოვანესი ისტორიული გადაწყვეტილების მოლოდინშია. ევროკომისიამ წინა დღეებში მხარი დაუჭირა საქართველოს ევროკავშირში გაწევრიანების პერსპექტივას, თუმცა, აღინიშნა მრავალი ხელისშემშლელი ფაქტორი ამ გზაზე. დღეს საქართველოში, სამწუხაროდ, ის პარადოქსული ვითარებაა, როდესაც ხელისუფლება არ გამოხატავს ხალხის ნებას, აქედან გამომდინარე, ხელისუფლების გაუკუღმართებული პოლიტიკისა და მმართველობის გამო საქართველოს ხალხი არ უნდა დაისაჯოს. ხალხი მოახერხებს არჩევნების გზით გაუმჯობესდეს პოლიტიკური ვითარება და საქართველომ შეასრულოს ევროკომისიის რეკომენდაციები. ამისათვის კი, საქართველოს სჭირდება ევროპის ძლიერი მხარდაჭერა.

ევროპელი ხალხი და მათი მთავრობები, რომლებიც სწორედ ამ დღეებში დასრულებულ სახეს მისცემენ გადაწყვეტილებას საქართველოს მხარდაჭერის შესახებ, წარმოადგენენ თქვენს სამწყსოს, რომელნიც პატივს სცემენ და ითვალისწინებენ თქვენს მოსაზრებებს და პოზიციებს, სწორედ ამიტომ მოგმართავთ უმორჩილესი თხოვნით, არ დაიშუროთ შუამდგომლობანი თქვენი სამწყსოს – ევროპელი ხალხისა და მათი მთავრობების წინაშე, რათა ჩემი სამშობლო – უძველესი იბერია, საქართველო და საქართველოს ხალხი მხარდაჭერილ იქნას სათანადოდ, რათა ამ მხარდაჭერით გაძლიერებული ებრძოლოს ევროპული ცივილიზაციის დაუძინებელი მტრის, რუსეთის გავლენებს და შეუფერხებლად იაროს განვითარების გზაზე”, – ნათქვამია დეკანოზ გიორგი მამალაძის მიმართვაში.

გააზიარეთ და მოიწონეთ სტატია:

მსგავსი სტატიები:

პარლამენტთან აქცია იმართება – რუსთაველის გამზირი გადაიკეტა ევროპული საბჭოს პრეზიდენტი, შარლ მიშელი, საქართველოს ეწვევა ეს დღე ჩვენია-26 მაისი საქართველოს და,მოუკიდებლობის დღეა როდესაც პატიმარი შიმშილობს, ამაზე პასუხისმგებელია მოშიმშილე პატიმარი, მარტივადაა საქმე – კობახიძე სააკაშვილზე წამებისა და არაადამიანური მოპყრობის მორიგი ფაქტი-მიხეილ სააკაშვილის მდგომარეობა უკიდურესად მძიმდება 81 მომხრე 7 წინააღმდეგი – პარლამენტმა სახელმწიფო ინსპექტორის სამსახურის გაუქმებას მხარი დაუჭირა რუსულმა საბრძოლო თვითმფრინავებმა შვედეთის საჰაერო სივრცე დაარღვიეს – შვედეთის შეიარაღებული ძალები “ათასჯერ მოიტყუეს…ექიმების ნათქვამი ათასჯერ ვნახეთ წინა იგივე დრამატურგიაში…”-დავითულიანი