რძის პროდუქტების ფასი ზაფხულში 5%-7%-ით, შემოდგომიდან კი 20%-ით გაიზრდება – ამის შესახებ BM.GE-სთან რძის პროდუქების მწარმოებელი კომპანია „შირაქის“ დამფუძნებელი, ნიკოლოზ ბენიაიძე აცხადებს. ბენიაიძე თქმით, პროდუქციის გაძვირების ძირითადი მიზეზი არასაყოფაცხოვრებო ბუნებრივ აირზე ტარიფის ზრდასთან ერთად, დიზელის საწვავზე ფასის მატება და სასუქის გაძვირებაა.
„ტარიფის გაზრდა ბუნებრივ აირზე მნიშვნელოვნად იმოქმედებს პროდუქტზე ფასების მატებაზე, ვინაიდან პროდუქციის გადამუშავების ნაწილში გაზის წილი 20%-ია. პროდუქციას აძვირებს ასევე დიზელის საწვავზე ფასის მატება, რომელიც მოსავლის მისაღებად აუცილებელია და მისი წილი 30%-ს შეადგენს, ასევე გაორმაგებულია სასუქის ფასიც. მთლიანობაში, ეს ყველაფერი მნიშნელოვნად აისახება რძის პროდუქტების ფასების ზრდაზე“ – აცხადებს ბენიაიძე.
მწარმოებელი ასევე ამბობს, რომ ფასის მატებაზე მნიშვნელოვან გავლენას რუსეთ-უკრაინის ომიც ახდენს, რადგან რძის პროდუქტების დამზადებისთვის აუცილებელი კომპონენტის – შროტის მთავარი მომწოდებელი სწორედ რუსეთია. მიწოდების ჯაჭვში შექმნილი პრობლემების გამო, მწარმოებლები ახლა ალტერნატიულ გზებს ეძებენ.
„რუსეთიდან ძირითადად შროტი შემოდიოდა, თუმცა ომის გამო მიწოდება შეფერხდა, ახლა ვეძებთ ალტერნატიულ ქვეყნებს, საიდანაც პროდუქტის შემოტანას შევძლებთ, თუმცა მომწოდებელი ბაზრის ცვლილება რძის პროდუქტების ფასზე აუცილებლად აისახება, რადგან რუსეთის ბაზარი ყველაზე იაფი იყო“ – აღნიშნა „შირაქის“ დამფუძნებელმა.
მწარმოებლები ფიქრობენ, რომ პრობლემის გადაჭრისა და რძის პროდუქტებზე ფასების დარეგულირების ერთადერთი გზა იმ იმპორტირებული საკვების სუბსიდირებაა, რომლების საქართველოში არ იწარმოება. ამ მოთხოვნით მათ რამდენჯერმე მიმართეს სოფლის მეურნეობის სამინისტრო, თუმცა უწყება ამ დრომდე აღნიშნული მოთხოვნის დაკმაყოფილებაზე უარს ამბობს.
„ერთადერთი გამოსავალი სუბსიდირებაა, მთლიანად რძის პროდუქტებზე თუ არა, იმპორტირებული საკვების ნაწილში მაინც უნდა განხორციელდეს, მაგალითად, პროტეინებსა და შროტებზე“.
ცნობისთვის, 1 ივლისიდან თბილისში მოქმედი ბიზნესისთვის კუბური მეტრი გაზის მოხმარების ტარიფი 25 თეთრი გაძვირდა და 1.35 ლარი გახდა, ხოლო რეგიონებში ფასი 23 თეთრით გაიზარდა. მიმდინარე თვიდან კომერციული აბონენტები ერთ კუბურ მეტრ ბუნებრივ აირში 1.15 ლარის ნაცვლად 1.38 ლარს გადაიხდიან.
მსგავსი სტატიები:
საცხოვრებლად ყველაზე საშიში ადგილები დედამიწაზე
“ასეა ბიძია, ვინც ფულს იხდის, ხალხიც მის გვერდით დგას” -ვინ შეუერთდა ოზურგეთიდან “უცნობის” აქციას?
პრემიერი: “მალე დავიწყებთ ამერიკული M4-ის ტიპის შაშხანების, ხოლო მომავალი წლიდან კი უპილოტო საფრენი აპარატების წარმოებას”
გორის ჰოსპიტალთან სააკაშვილისთვის “შუმოკის” მოსაწყობად ე.წ. “მეცოცხე” ძველი ბიჭები მიიყვანეს
ნათელაშვილი პაპუაშვილს: “მომიკითხეთ ბიძინა ივანიშვილი”
“ნეტაი, აცრილებს არ დაგვიჭერდნენ” – Facebook გამოხმაურებები მწვანე პასპორტის გაუქმებაზე
ბორის ჯონსონმა ვოლოდიმირ ზელენსკი უინსტონ ჩერჩილს შეადარა
ინტერნეტის რეაქცია იორდანიაში პრემიერის ვიზიტზე – ფოტოები