ვიდეო თამაშების ინდუსტრიის უმსხვილესი გარიგება, რომელიც ტექნოლოგიურ გიგანტ Microsoft-სა და Activision-Blizzard-ს უკავშირდება, შესაძლოა ევროკავშირისა და დიდი ბრიტანეთის მარეგულირებელმა სამსახურებმა ჩაშალონ.
ტექნოლოგიური გიგანტებისთვის დამახასიათებელი შესყიდვისა და შერწყმის აგრესიული სტრატეგიის მიმართ მსოფლიოს მასშტაბით ანტიმონოპოლიური სამსახურების დამოკიდებულების გამკაცრების ფონზე, არ არის გამორიცხული, რომ ისტორიული $75-მილიარდიანი შეთანხმება საგამოძიებო პროცესით გაჭიანურდეს და საბოლოო ჯამში ის ჩაშლამდე მივიდეს.
მარეგულირებლის წინასწარი შეფასებით, Microsoft-ის შესყიდვის პოლიტიკა ზღუდავს კონკურენციას და ბაზარზე მონოპოლიის განვითარებას უწყობს ხელს, რაც, თავის მხრივ, ზიანს მომხმარებელს აყენებს.
საგულისხმოა, რომ გარიგების წარმატებით დასრულებას Microsoft-ისთვის კრიტიკული მნიშვნელობა აქვს, რადგან Activision-Blizzard-ის შეძენით Microsoft-ის ფლაგმანი გეიმინგ-პლატფორმა XBOX-ი ისეთ საკულტო თამაშებს მიიღებს, როგორიცაა: Call of Duty, World of Warcraft, Diablo, Overwatch, StarCraft და Candy Crush.
ცნობისთვის, პანდემიის დროს ვიდეო თამაშების „ბუმის“ პერიოდში ტექნოლოგიური გიგანტების დაინტერესება გეიმინგ ინდუსტრიის მიმართ მკვეთრად გაიზარდა, თავად Microsoft-მა 2020 წელს $7.5 მილიარდად Doom-ის, The Elder Scrolls Skyrim-ისა და Fallout-ის შემქმნელი სტუდია Bethesda Softworks შეიძინა.
გარდა ამისა, იაპონურმა კომპანია Sony-მ, რომელიც XBOX-ის კონკურენტ პლატფორმა PlayStation-ს აწარმოებს, $3.6 მილიარდად HALO-სა და Destiny-ს შემქმნელი გეიმინგ-სტუდია Bungie შეიძინა; უმსხვილესი ჩინური კომპანია Tencent-ი კი Ubisoft-ში ახორციელებს ინვესტიციას – აღნიშნული სტუდია Assassin’s Creed-ს, Far Cry-სა და Rainbow Six Siege-ს ფლობს.
შეგახსენებთ, რომ Microsoft-ი მსოფლიოს რიგით მესამე უმსხვილესი კომპანიაა, მისი საბაზრო კაპიტალიზაცია კი 1.8 ტრილიონ დოლარს შეადგენს, შესაბამისად, მის მენეჯმენტს აქვს იმის ფუფუნება, რომ პოტენციური კონკურენტები ან საინტერესო პარტნიორი კომპანიები პირდაპირ შეისყიდოს, რაც კიდევ უფრო მეტად ზრდის Microsoft-ის საბაზრო ღირებულებასა და შესაძლებლობებს.
მსგავსი სტატიები:
“ბორია ივანიშვილმა ქართული სახელმწიფო თავის დონეზე დაიყვანა, ვიბრძოლოთ უკეთესი მომავლისათვის!”
“მონური ფსიქოლოგია”- არის ცივილიზაციისგან გარიყვის პირველი ნიშანი, განათლებული ერი კი ვერასოდეს გახდება მონა”
“დღეს იყავი ბედნიერი… იქნებ ღმერთმა წარღვნაც გადაიფიქროს”
“ზოგჯერ სხვას კია არა, საკუთარ თავს უნდა მოუგო ომი”
ცოტა რამ ქართველ ქალზე
ზოგ ბრძოლაზე არ ღირს დროის ფლანგვა
“ეჭვი ნებისმიერ ვაქცინაზე შეიძლება არსებობდეს როგორც უსაფუძვლო, ასევე საფუძვლიანი”
როცა ივანიშვილი გაიქცევა, ღარიბაშვილს დაიჭერენ და ისტორიაგამძლე მურუსიძე ადაპტაციას შეეცდება- ლაშა ბუღაძე