იაშვილის სახელობის ბავშვთა ცენტრალური საავადმყოფოს სამედიცინო დირექტორმა, თსსუ-ის პროფესორმა, ივანე ჩხაიძემ განაცხადა, რომ საქართველოში ახლა A ტიპის ვირუსი ჭარბობს, რასაც „ღორის გრიპს“ ვეძახით.
როგორც მან ქვეყანაში არსებულ ეპიდვითარებაზე საუბრისას აღნიშნა, კორონავირუსი გრიპთან ერთად განიხილება, როგორც ვირუსი, რომელიც ყველაზე მეტად ცირკულირებს. მისივე განმარტებით, პირველ ადგილზე გრიპის ვირუსია 37%-ით, მეორე ადგილზე კი სწორედ კორონავირუსი, რომლის გავრცელების სიხშირე 30%-ს შეადგენს.
„კორონავირუსის ახალი ვარიანტი, რომელიც ახლა შეშფოთებას იწვევს, ჩინეთში ახალი ტალღის გამომწვევი ვარიანტია. ის თავისი ბუნებით, საქართველოში გავრცელებული მეხუთე ვარიანტის ერთ-ერთი სახეობაა. საქართველოში, ისევე როგორც ჩინეთსა და დანარჩენ მსოფლიოში, ძირითადად კორონავირუსის მეხუთე ქვევარიანტი ცირკულირებს. შესაბამისად, თუ გლობალურად შევხედავთ, ეს არ არის ახალი მუტაცია. ეს ისევ „ომიკრონია“, „ომიკრონის“ მუტაციის ქვევარიანტი. აქედან გამომდინარე, მას რადიკალური ცვლილება ინფიცირების მაჩვენებელში არ შეუძლია. კითხვაზე – „შეუძლია თუ არა, აღნიშნულ ვარიანტს გლობალურად კორონავირუსის ზრდა გამოიწვიოს?“- ამაზე ექსპერტებს ნეგატიური პასუხი აქვთ – არა.
მეხუთე ვარიანის მიმართ იმუნიტეტი მოსახლეობის ძალიან დიდ ნაწილს აქვს, განსაკუთრებით, მათ, ვისაც „ბუსტერი“ აქვს გაკეთებული, ის კარგად არის დაცული ამ შტამისგან, ამიტომ, ეს ვარიანტი არ განიხილება, როგორც საფრთხის შემცველი, ჯანმოს მისთვის ახალი შეშფოთების კლასიფიკაცია არ აქვს მინიჭებული. დაავადებათა კონტროლის ცენტრის ინფორმაციით, იმას, რაც ჩინეთისთვის საფრთხეს წარმოადგენს, თავისი მიზეზები აქვს. კერძოდ, აქ საუბარია იმაზე, რომ ჩინეთში ძალიან დაბალია მოსახლეობის მესამე დოზით ვაქცინაციის მაჩვენებელი, რამაც ხელი შეუწყო ინფექციის გავრცელებას, ასევე ძალიან მნიშვნელოვანი იყო ის, რომ ჩინეთი ნულოვანი კოვიდის პოლიტიკას ატარებდა, როდესაც თითოეულ შემთხვევას განიხილავდა საფრთხის შემცველად, ახლა კი გადავიდნენ შემდეგ პრინციპზე – ვიცხოვროთ კორონავირუსთან ერთად.
ჯანმოს მოსაზრება, რომ კორონავირუსი სეზონური ვირუსის მსგავსი გახდება, შეიძლება ითქვას, რომ ამ მონაცემებით გამართლებულია. კორონავირუსის სეზონური მატება გვაქვს. სეზონის დაწყების წინ კორონავირუსის ხვედრითი წილი არ აღემატებოდა 9%-ს, ახლა 2-ჯერ მეტი გვაქვს“, – აღნიშნავს ივანე ჩხაიძე.
რაც შეეხება გრიპის ვირუსების განაწილებას, როგორც ივანე ჩხაიძე განმარტავს, ახლა ქვეყანაში ძირითადად ე.წ. ღორის გრიპის ვირუსი ჭარბობს.
„ახლა ჭარბობს ძირითადად A ტიპის ვირუსი, რასაც „ღორის გრიპს“ ვეძახით. თუ წინა კვირას H3N2 ტიპის ვირუსი ჭარბობდა, ახლა უფრო მეტად „ღორის ტიპის“ ვირუსია გავრცელებული“,- განაცხადა ჩხაიძემ
მსგავსი სტატიები:
როგორ გავუმკლავდეთ სეზონურ დეპრესიას- რჩევა ნათია ფანჯიკიძისგან
დისტრიბუტორთა ასოციაცია ფასების ზრდის მორიგ ტალღას აანონსებს
ინდოეთში დაღუპულთა კრემაციას ვეღარ ახერხებენ და გვამებს მდინარეებში ყრიან
„შეიძლება ეს იყოს გაცილებით ადრე“ – როდის გამოცხადდება ეროვნული გამოცდების შედეგები?
რა ხარვეზები გამოვლინდა დაბა ნასაკირალის ახალი საჯარო სკოლის აშენების შემდეგ- განათლების სამინისტრო ინფორმაციას ავრცელებს
კალანდობის დღესასწაული შემოქმედში ჩატარდება
”დარწმუნებული ვარ გაიმარჯვებთ! რუსეთი თავს უფლებას აძლევს, დაეპატრონოს სხვისას და დაბომბოს მშვიდობიანი ქვეყანა”
სოფელ შრომის კლუბი გურიაში – გოგა ჩანადირის ფოტოები